Diutronomi 5
5
Tenkomanmen
(Eksodas 20:1-17)
1Nao Mosis hemi kolem pipol blong Israel fo kam tugeta. an hemi tok olsem long olketa, “!Olketa! Yufala lisingud long olketa lo an olketa rul wea bae mi talemaot long yufala distaem. Yufala mas lanem olketa ya, an oltaem yufala mas obeim. 2Yawe, God blong yumi, hemi bin mekem wanfala agrimen wetem yumi long maonten long Horeb.#5:2 “Horeb hemi narafala nem blong maonten long Saenae. 3Hemi no mekem wetem olketa olo blong yufala nomoa. Hemi mekem wetem yumi evriwan wea yumi stap tude. 4Long datfala taem long maonten ya, Yawe hemi toktok stret long ae blong yufala, an disfala toktok hemi kamaot long faea. 5An mi stap long midol long yufala an Yawe, an mi gohed fo talemaot long yufala olketa toktok wea Yawe hemi talem, bikos yufala fraet tumas long faea ya an no save go antap long maonten.
“Nao long datfala taem, Yawe hemi tok olsem, 6‘Mi nao Yawe, God blong yufala. An mi nao mi tekem yufala fo kamaot from Ijip wea yufala bin waka olsem slev.
7‘Yufala mas no wosipim eni narafala god moa, yufala mas wosipim mi seleva nomoa.
8‘Yufala mas no mekem eni tambu kaving blong enisamting long heven, o long wol, o long solwata, fo wosipim. 9Yufala mas no bendaon long eni tambu kaving olsem fo wosipim, bikos mi Yawe, God blong yufala, mi barava les fo yufala tinghevi long eni narafala god moa. Wei blong mi hemi olsem nao: olketa pipol hu i no laekem mi, an gohed fo agensim mi, bae mi panisim olketa wetem olketa pikinini blong olketa, an olketa smol grani blong olketa, go-go kasem olketa mektu smol grani blong olketa. 10Bat evriwan hu i lavem mi an obeim olketa lo blong mi, bae mi tinghevi long olketa, wetem olketa pikinini blong olketa an plande taosen pipol hu bae i kamaot bihaen long olketa.#Eksodas 34:6-7; Nambas 14:18; Diutronomi 7:9-10.
11‘Yufala mas no yusim nem blong mi fo eni nogud samting, bikos mi nao Yawe, God blong yufala, an bae mi panisim eniwan hu hemi yusim nem blong mi fo eni nogud samting olsem.#Levitikas 19:12; 24:10-23.
12‘Yufala mas gohed fo kipim Sabat de, an barava mektambu long hem olsem wea mi talem finis long yufala bifoa. 13Yufala garem siksfala de fo duim olketa waka blong yufala, 14bat long mekseven de, hemi Sabat de, an hemi de fo onarem mi Yawe, God blong yufala. Long de ya, bae yufala mas no waka long hem. Yufala, wetem olketa pikinini blong yufala, an olketa slev blong yufala, an olketa animol blong yufala, an olketa strensa hu i stap long ples blong yufala, bae yufala evriwan mas no waka long de ya. Long wei olsem olketa slev blong yufala olketa save res tu olsem yufala nomoa.#Eksodas 16:23-30; 23:12; 31:12-14; 34:21; 35:2; Levitikas 23:3. 15Yufala mas tingabaot datfala taem bifoa wea yufala i slev long Ijip an mi nao Yawe, God blong yufala, mi tekemaot yufala from dea long strongfala han blong mi. Dastawe mi talem strong long yufala fo kipim Sabat de.
16‘Yufala mas tinghae long dadi an mami blong yufala olsem wea mi talem finis, mekem yufala save garem gudfala laef fo long taem long lan wea bae mi Yawe, God blong yufala, mi givim long yufala.#Diutronomi 27:16; Matiu 15:4; 19:19; Mak 7:10; 10:19; Luk 18:20; Efesas 6:2-3.
17‘Yufala mas no kilim dae eniwan falom ravis plan.#Jenesis 9:6; Levitikas 24:17; Matiu 5:21; 19:18; Mak 10:19; Luk 18:20; Rom 13:9; Jemes 2:11.
18‘Yufala mas no brekem lo blong marit.#Levitikas 20:10; Matiu 5:27; 19:18; Mak 10:19; Luk 18:20; Rom 13:9; Jemes 2:11.
19‘Yufala mas no stil.#Levitikas 19:11; Matiu 19:18; Mak 10:19; Luk 18:20; Rom 13:9.
20‘Yufala mas no laea abaotem wantok blong yufala.#Eksodas 23:1; Matiu 19:18; Mak 10:19; Luk 18:20.
21‘Yufala mas no kavetem olketa samting blong wantok blong yufala fo tekem fo yufala seleva. Yufala mas no kavetem waef blong hem, o haos blong hem, o lan blong hem, o slev blong hem, o buluka blong hem, o dongki blong hem, o eni narafala samting wea hemi garem.’”#Rom 7:7; 13:9.
22Nao Mosis hemi tok moa olsem, “Hem nao olketa toktok wea Yawe hemi talem long yumi, long taem wea yumi kam tugeta long maonten ya. Hemi tokaot strong long yumi from datfala faea an datfala klaod wea hemi tudak. Olketa lo ya nomoa hemi talem, an hemi no garem eni narafala. Den hemi katem olketa long tufala flat ston, an hemi givim tufala ston ya long mi.”
Pipol blong Israel i fraet
(Eksodas 20:18-21)
23Mosis hemi gohed fo tok olsem, “Taem bikfala faea hemi bone long maonten ya, yufala herem toktok wea hemi kamaot long ples hemi tudak. Den olketa lida blong yufala an olketa bikman blong olketa traeb i kam lukim mi. 24Olketa tok olsem, ‘Yawe, God blong yumi, tude, hemi somaot saen blong paoa blong hem, an wei wea hemi barava hae fogud. Hemi stap long faea ya, hemi toktok kam an yumi herem hem. Tude nomoa, mifala jes save dat mifala pipol save herem toktok blong God an mifala no dae long hem. 25Bat, mifala no laek fo dae long bikfala faea ya. Ating sapos mifala herem voes blong Yawe, God blong yumi, narafala taem moa bae mifala dae nao. 26?Waswe, eni man hemi herem disfala God hu hemi laef, hemi toktok kam from faea olsem mifala bin herem, an man ya hemi laef yet? 27Yu gobaek moa, yu lisingud long olketa samting wea hemi talem. Den, bae yu save kam talemaot long mifala evrisamting wea Yawe, God blong yumi, hemi talem. An bae mifala save herem an obeim.’#Hibrus 12:18-19.
28“Nao taem Yawe hemi herem olketa samting ya, hemi tok olsem long mi, ‘Mosis. Mi herem olketa toktok ya an hemi tru nao. 29Yu save, sapos olketa garem disfala tingting olowe nomoa, bae hemi gud tumas. Mi laekem tumas fo olketa tinghae long mi olowe an obeim olketa lo blong mi. Bikos sapos olketa duim olsem, den bae laef blong olketa an laef blong olketa pikinini blong olketa hemi save gud tumas. 30Distaem, yu go talem olketa fo gobaek long olketa haostent blong olketa. 31Yu nomoa bae yu stap long hia wetem mi. An bae mi givim evri lo, an evri rul, an evri strongfala toktok blong mi long yu. An bihaen, yu mas tisim olketa samting ya long olketa pipol, mekem olketa obeim long disfala lan wea mi givim long olketa fo onam.’”
32Den Mosis hemi tok moa olsem, “!Olketa! Yufala mas lukaot fo duim evrisamting wea Yawe, God blong yufala, hemi talem long yufala. Yufala mas barava falom stret olketa lo ya. 33Yufala mas obeim olketa evriwan ya. An sapos yufala duim olsem, laef blong yufala bae hemi save gud tumas, an bae yufala save stap longtaem long lan wea bae yufala tekova long hem.”
Currently Selected:
Diutronomi 5: SIPB
Highlight
Copy
Compare
Share
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
