Diutronomi 2
2
1 “Yumi bin stap longtaem long Kades. Bihaen, yumi taneraon an falom rod wea hemi go long Akaba Bei, fo gobaek long drae eria, olsem wea Yawe hemi bin talem. An yumi gohed fo wakabaot longtaem olobaot long olketa maonten long eria blong Seia.”#2:1 “Seia” hemi narafala nem blong Idom wea hemi eria blong laen blong Iso.
2Mosis hemi tok moa olsem, “Yawe hemi sei long mi, 3‘Yufala wakabaot fo longtaem finis long olketa maonten. Distaem yufala mas go long not.’ 4An hemi talem mi fo tokstrong olsem, ‘Bae yufala gotru long eria long Seia wea hemi lan blong olketa wantok blong yufala long laen blong Iso.#2:4 “wantok blong yufala long laen blong Iso” Iso hemi brata blong Jekob. Jekob hemi olo blong laen blong Israel. Iso hemi olo blong laen blong Idom. Lukim Jenesis 36:8. Olketa ya bae i fraetem yufala. So yufala mas tingting gudfala. 5Yufala mas no faetem olketa, bikos bae mi no save givim eni smol pisgraon blong olketa fo yufala. Mi givim finis disfala lan long maonten long Seia long laen blong Iso. 6So taem yufala gohed fo gotru long lan ya, bae yufala mas peim kaikai an wata long olketa.
7“‘Yufala mas no fogetem wei wea Yawe, God blong yufala, hemi blesim yufala long evrisamting wea yufala duim. Olowe long foti yia wea yumi wakabaot long bikfala drae eria, hemi lukaftarem yufala, an yufala nating save sot long enisamting.’
8“So yumi goraon long eria blong olketa wantok long laen blong Iso. An yumi lusim rod wea hemi go long Ded Si an tufala taon long Elat an Esion-Geba. Den yumi gogo fo kasem drae eria long Moab.#Nambas 21:4-20. 9Yawe hemi tok olsem long mi, ‘Mosis, yufala mas no raoa o faet wetem olketa pipol blong Moab bikos mi no save givim yufala eni lan blong olketa. Olketa ya long laen blong Lot, an mi givim finis ples long Ara long olketa.’”#Jenesis 19:37.
10(Yu save, bifoa kam wanfala laen long olketa strongfala man i stap long Ara, wea olketa kolem laen blong Emim. Olketa ya i barava tolfala, olsem olketa long laen blong Anak. 11Tufala laen ya, plande pipol nao i kolem olketa olsem Refaem, bat olketa pipol blong Moab i kolem olketa ya Emim. 12An bifoa kam, olketa laen blong Hoa i stap long lan long Seia,#2:12 “Seia” hemi narafala nem blong Idom wea hemi eria blong laen blong Iso. bat laen blong Iso i bin ronemaot olketa, an spoelem olketa hu i bin stap long datfala ples. Olketa ya i duim barava olsem wea olketa blong Israel i mekem long enemi wea olketa ronemaot from disfala lan wea Yawe hemi givim long olketa.)
13Nao Mosis hemi tok moa olsem, “Yawe hemi sei, ‘Tude, yufala mas getap, an yufala mas katkros long Sered Riva.’ So yumi duim wanem hemi talem. 14Stat long taem wea yumi lusim Kades-Banea, kam kasem taem wea yumi krosim Sered Riva, hemi teti-eit yia. An long datfala taem, evri man fo faet, olketa evriwan i dae, barava olsem wea Yawe hemi bin talem.#Nambas 14:28-35. 15Oltaem Yawe hemi agensim olketa, an hemi mekem olketa dae, go-go no eniwan long olketa hemi laef.
16“An taem olketa evriwan i dae finis, 17Yawe hemi tok olsem long mi, 18‘Tude, yufala mas lusim eria blong Moab, an go long rod wea hemi gopas long Ara. 19Taem yufala lusim ples ya, bae yufala go kolsap long eria blong laen blong Amon. Olketa ya i long laen blong Lot, an mi bin givim finis lan ya long olketa. Bae yufala mas no raoa o faet wetem olketa, bikos bae mi no save givim lan blong olketa long yufala.’”#Jenesis 19:38.
20Yu save, bifoa kam, eria blong laen blong Amon hemi ples blong olketa strongfala man wea olketa kolem Refaem. Bat olketa pipol blong Amon i kolem olketa man ya Samsumim. 21Olketa ya i barava tolfala olsem olketa long laen blong Anak. Fastaem, olketa i barava plande fogud, an olketa i strong tumas, bat Yawe hemi kilim dae olketa evriwan. An laen blong Amon nao ronemaot olketa an tekova long lan ya. 22Hem nao sem wei wea Yawe hemi mekem fo helpem laen blong Iso wea i stap long Seia, long olketa ples long maonten. Hemi kilim pipol blong Hoa, an laen blong Iso i tekova long lan blong olketa, an stap long hem kam kasem tude. 23An long sem wei tu, olketa lan kolsap long solwata long Mediterenian Si, olketa pipol blong Krit#2:23 “pipol blong Krit” Olketa pipol blong Krit i laen blong Filistia. i tekova an stap long hem. Bifoa kam, ples ya hemi ples blong laen blong Avim, bat olketa pipol blong Krit i kilim dae olketa evriwan, an olketa tekova long olketa lan blong olketa go kasem Gasa long saot.
24Mosis hemi tok moa olsem, “Long datfala taem Yawe hemi sei, ‘Distaem yufala mas go akros long Anon Riva. Mi putum Sihon, Paramaon Sif long laen blong Amoa long Hesbon, long han blong yufala, hem wetem evri lan blong olketa. Yufala mas go faetem hem, an stat fo tekova long lan blong olketa. 25Stat tude, bae mi mekem pipol long evri ples fo fraet long yufala. Sapos olketa herem dat pipol i tokabaotem yufala, bae olketa fraet tumas an seksek fogud.’”
Pipol blong Israel i winim Paramaon Sif Sihon
(Nambas 21:21-32)
26An Mosis hemi tok moa olsem, “Taem yumi stap kam long drae eria long Kedemot, mi bin sendem samfala man fo go long Hesbon fo lukim Sif Sihon. Olketa go fo talemaot wanfala gudfala toktok olsem, 27‘Mifala laek fo gotru long eria blong yu. Bae mifala gotru long rod nomoa, mifala bae no go olobaot. 28An sapos mifala nidim eni kaikai o wata from yufala, bae mifala mas peim. Bat mifala laekem nomoa fo yu letem mifala fo wakabaot gotru long eria blong yu. 29Laen blong Iso long Seia, an pipol blong Moab long Ara, olketa ya letem mifala gotru long eria blong olketa finis. Plis, mifala laek fo gotru long ples blong yu an katkros long Jodan Riva, fo go long lan wea Yawe, God blong mifala, hemi givim long mifala.’ 30Bat Sif Sihon hemi no save letem yumi fo gotru long lan blong hem, bikos Yawe hemi mekem tingting blong Sif sat finis an mekem hemi bikhed tu. Yawe hemi duim olsem mekem yumi save winim Sif ya.
31“Long datfala taem Yawe hemi tok olsem long mi, ‘Distaem yu save finis wea mi mekem Paramaon Sif Sihon fo no garem paoa. So yufala go an stat fo tekova long lan blong hem mekem yufala stap long hem.’ 32Den Sihon wetem ami blong hem i kam fo faetem yumi kolsap long taon long Jahas. 33An Yawe hemi putum hem long han blong yumi. So yumi kilim hem dae wetem olketa pikinini blong hem an olketa man blong hem. 34An yumi bin winim olketa taon blong olketa an spoelem finis#2:34 “spoelem finis” Disfala toktok hemi transletem wanfala Hibru wod wea hemi garem spesol mining. Datfala wod hemi “kerem”. Kerem hemi minim wea olketa putum tambu long evrisamting wea olketa winim long faet. Disfala tambu hemi minim wea olketa mas mekem evrisamting ya olsem wanfala sakrifaes fo givim long God, dastawe olketa bonem ples an kilim dae evriwan an evrisamting. Lukim tu Diutronomi 20:10-18. olketa taon ya. An yumi kilim dae olketa man, an olketa woman an olketa pikinini long olketa. Long taem ya, no enisamting i stap laef long olketa taon ya. 35Yumi bin tekem olketa animol blong olketa, wetem olketa narafala samting blong olketa taon ya fo yumi. 36Long taem ya, Yawe hemi helpem yumi fo tekova long evri taon blong olketa, stat long Aroa long saet long Anon Riva, an taon long flat ples kolsap long riva ya, go-go kasem ples long Gilead long not. No eni taon hemi garem wolston wea hemi hae tumas o strong tumas, mekem yumi no save winim. 37Bat yumi no go long lan blong laen blong Amon, nomata long Jabok Riva o antap long olketa maonten, bikos Yawe, God blong yumi, hemi stopem yumi.”
Currently Selected:
Diutronomi 2: SIPB
Highlight
Copy
Compare
Share
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
