Emos 3
3
1Yawe hemi tok moa olsem, ?!Olketa pipol blong Israel! Yufala mas lisin gudfala long olketa toktok wea mi Yawe mi talem agensim yufala. Ya, hemi agensim yufala evriwan long laen blong olketa olo blong yufala, wea mi bin lidim fo kamaot from Ijip. 2Long evri pipol long wol, yufala nomoa mi bin siusim fo kamap olketa pipol blong mi. Bat bikos yufala sin tumas agensim mi, bae mi barava panisim yufala.?
Waka blong Profet
(Profet hemi tok)
3!Yufala trae fo tingim diswan!
?Hao nao bae tufala man save wakabaot tugeta
sapos tufala nating agri tugeta fastaem?
4?Hao nao bae laeon save singaot bikfala long bus
sapos hemi no faendem enisamting fo hemi kilim fo kaikaim?
?Hao nao bae yangfala laeon save singaot bikfala kam from ples wea hemi stap long hem
sapos hemi no kasholem enisamting fo kaikaim?
5?Hao nao bae eniwan save kasem bed
sapos hemi no redim trap?
?Hao nao bae disfala trap save jam
sapos no enisamting hemi go insaet long hem?
6?Waswe, sapos olketa lida i bloum olketa trampet fo kolem olketa man fo faet,
yufala tingse bae olketa pipol long ples ya i no seksek?
?An sapos bikfala trabol hemi kasem wanfala taon,
yufala tingse i no Yawe nao hemi sendem kam long hem?
7Ya, Lod Yawe hemi no duim enisamting
sapos hemi no somaot yet long olketa profet hu i wakaman blong hem.
8Taem laeon hemi singaot bikfala,
man wea hemi herem mas fraet nao.
Lod Yawe hemi olsem disfala laeon an hemi tok finis.
Mi nao mi herem an mi mas talemaot olketa toktok blong hem.
Yawe hemi talemaot dat bae hemi panisim olketa pipol blong Israel
9 (Profet) Yufala mas go long olketa bikman hu i stap long haos blong king blong Filistia long taon long Asdod, an olketa long haos blong king blong Ijip, an tok olsem long olketa, ?Yufala evriwan i kam an hipap antap long olketa hil raonem taon long Samaria. Bae yufala save lukim olketa bikfala trabol long disfala ples, wea plande pipol i gohed fo mekem olketa narafala pipol safa.?
10Hem ya mesij blong Yawe, ?Olketa pipol hu i gohed fo fulumapem olketa strongfala sefples blong olketa long evrisamting wea olketa bin stilim o winim long faet, olketa nating save hao fo stap long stretfala wei.?
11Dastawe nao Lod Yawe hemi tok moa olsem long yufala pipol blong Israel, ?Bae olketa enemi i winim yufala long faet, an bae olketa brekemdaon olketa strongfala sefples blong yufala, an tekem evrisamting blong yufala. 12Taem wea laeon hemi kaikaim sipsip, man wea hemi lukaftarem sipsip save faendem tufala bon long lek o smolfala pis long ia nomoa hemi stap. Long sem wei tu, taem olketa enemi i spoelem finis olketa haos blong yufala, bae lelebet pat long lek blong bed o smolfala pis long sea nomoa hemi stap.?
13Hem ya mesij blong Yawe, Masta God hu hemi garem evri paoa, ?Evriwan hu hemi save herem disfala toktok blong mi, yufala mas lisin gudfala long hem. Yufala mas tokstrong an wonem evriwan long laen blong Jekob. 14Long datfala De wea bae mi panisim olketa from evri sin blong olketa, bae mi spoelem finis tu olketa olta long Betel. Olketa fofala hon tu long evri olta bae i brek an foldaon long graon.#3:14 Long 1 Kings 1:50 an 2:28, yu save lukim dat olketa pipol bin bilivim wea taem wanfala man hemi ranawe from narafala man, hemi save holestrong long wanfala hon long olta. From diswan nao, hemi save sef an narafala man ya no save kilim hem go-go wanfala jaj bae hemi kam fo jajem hem. Ya, bae mi spoelem evri ples fo haed long hem. 15Bae mi spoelem finis olketa bikfala haos blong olketa an olketa smolfala haos tu. An bae mi spoelem finis evri nambawan haos wea olketa dekoretem gud long evri gudfala samting.?
Hem nao mesij blong Yawe.
Currently Selected:
Emos 3: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.