Waestok 1
1
Fo faendem lida hu hemi gud an tru
1Yufala#Waestok 6:1-11. olketa lida blong disfala wol, yufala mas tinghevi long raet wei fo stap stret long ae blong Lod. Yufala mas tinghevi long Lod, an yufala mas hambol an traehad fo faendem hem. 2Olketa hu i no save testem God bae olketa faendem hem, an bae hemi som hem seleva long olketa hu i trastem hem. 3Olketa ravis tingting hemi divaedem pipol long God, an sapos yumi krangge fo testem hem, bae paoa blong hem hemi meksem long yumi. 4Waes no save stap long eniwan hu hemi save laea o hemi man blong sin. 5Evriwan hu i holi, olketa no save laea long pipol. Waes no save stap taem pipol duim samting falom ravis tingting blong olketa. Ya, bae hemi nating hapi taem pipol i falom wei wea hemi no stret.
God hemi save wanem yumi talem
6Waes hemi save fren gud long olketa pipol, bat hemi no save fogivim eniwan hu hemi tok agensim God, bikos God hemi save long wanem yumi filim an wanem yumi tingim, an hemi herem evri toktok blong yumi. 7Bikos spirit blong God hemi fulap long wol, an hemi holem tugeta evrisamting, hemi save long evri toktok wea pipol i talem. 8No eniwan hu hemi toknogud bae hemi haed, no longtaem bae hemi garem panis. 9Evri ravis tingting blong olketa nogud pipol bae kamaot klia, evri toktok blong olketa bae kasem Lod, an bae hemi panisim olketa fo evri ravis samting olketa duim. 10Bikos God hemi herem evri toktok, yufala no save haedem eni komplen long hem. 11So, yufala mas no goraon fo komplen an fo tok kros, bikos hemi nating duim eni gud samting fo yufala. God bae hemi panisim yufala fo evri haed samting wea yufala talem, an evri laea toktok bae spoelem spirit blong yufala.
God no mekem dae
12Yufala mas no laekem dae fo kam long yufala long olketa ravis samting wea yufala duim. 13God#Esikiel 18:32; 33:11; 2 Pita 3:9. no mekem dae, an hemi no hapi nomoa taem olketa laef samting i dae. 14Hemi wakem evrisamting mekem olketa save gohed fo laef, an evrisamting wea hemi wakem hemi stret an gud. Dae no garem paoa ovam disfala wol, 15bikos stretfala wei blong God hemi no save dae.
16Olketa#Provebs 8:36; Aesaea 28:15; Sirak 14:12. nogud pipol i laekem dae fo kam long olketa long olketa nogud samting wea olketa talem an duim. Olketa laekem tumas fo dae olsem taem olketa weitem eniwan hu olketa i lavem tumas. Olketa kaban finis wetem dae, an hem nao wanem hemi barava fitim olketa.
Currently Selected:
Waestok 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.