Waestok 6
6
Waka blong olketa lida
1So, yufala olketa king an olketa bikman long wol, yufala herem kam wanem mi talem, an lanem. 2Yufala lukaftarem plande provins an ples, an yufala praod tumas bikos yufala rulim plande pipol. 3Bat#Rom 13:1. Lod hu hemi hae tumas nao hemi givim disfala paoa long yufala. Bae hemi lukluk gud long wanem yufala duim, an olketa samting wea yufala plan fo duim. 4Yufala rul long nem blong God an kingdom blong hem. An sapos yufala no rul long stretfala wei, an no falom lo, an laef blong yufala no falom wanem God hemi laekem, 5kuiktaem nomoa bae God panisim yufala an bae yufala barava safa nogud. Ya, bae God hemi jaj an panisim olketa hu i garem paoa. 6God bae hemi sore long olketa pipol nating an fogivim sin blong olketa. Bat bae hemi jajem an panisim nogud olketa hu i garem paoa. 7Lod hu rulim evri pipol an evri samting, hemi no fraetem eniwan, nomata olketa garem paoa o biknem. Hem seleva nao hemi mekem evriwan, olketa hu i garem biknem an olketa hu i no garem biknem. Hemi givim olketa samting fo evri pipol semsem nomoa. 8Bat bae hemi jajem an barava panisim nogud wei blong olketa lida. 9Mi raetem olketa toktok ya fo yufala olketa king, mekem yufala duim olketa stret samting an no mekem olketa mistek. 10Olketa samting ya i holi, an sapos yufala falom long holi wei, bae laef blong yufala tu hemi holi. Sapos yufala lanem disfala samting, bae yufala save sevem yufala seleva long De blong Jaj. 11So, yufala mas mekem tising blong mi hemi olsem gudfala samting fo yufala an samting wea yufala hapi long hem, an bae mi tisim yufala gud moa.
Gudfala samting long Waes
12Waes hemi saen braet an hemi nating save tudak. Olketa hu i lavem hem an lukaotem hem bae hemi isi nomoa fo olketa faendem hem. 13Hemi som hem seleva kuiktaem tumas long eniwan hu hemi laekem hem. 14Yu wekap eli long moning fo lukaotem hem an bae yu no garem hadtaem fo faendem hem. Bae yu faendem hem long mamana doa long haos blong yu. 15Fo garem barava gudfala save, yu mas putum strong tingting blong yu long Waes. An sapos yu lukaotem hem, bae yu faendem piis kuiktaem insaet long maen blong yu, 16bikos disfala Waes bae hemi lukaotem olketa hu i fitim hem an bae hemi faendem yu long ples wea yu stap long hem. Waes hemi kaen tumas an bae hemi stap wetem yu long evri tingting blong yu.
17Waes hemi stat taem yu barava wande lanem olketa gudfala samting. Sapos yu laekem Waes, yu mas lavem hem. 18Fo lavem Waes, yu mas falom olketa lo blong hem. An taem yu falom olketa lo blong hem, bae yu save laef olowe. 19An laef olowe ya nao bae hemi tekem yu kolsap long God. 20Disfala wei wea yu laekem Waes hemi save redim yu fo rulim wanfala kingdom. 21So, yufala hu i rulim olketa kantri, sapos yufala tinghevi long waka blong yufala an paoa blong yufala, yufala mas mekhae long Waes, mekem yufala save rul olowe nao.
Solomon hemi wande searem Waes blong hem
22Bae mi talem yufala wanem nao disfala Waes, an hao nao hemi stat kam. Bae mi no haedem enisamting long yufala. Bae mi talemaot evri stori abaotem hem stat kam long taem wea evrisamting hemi stat, mekem evriwan save long hem. An bae mi no haedem enisamting long disfala tru samting. 23Mi no garem joles mekem mi haedem save blong mi. Mi bae no holem baek enisamting. Waes an joles i nating save waka tugeta. 24Sapos plande waes pipol i stap, disfala wol bae hemi wanfala sef ples wea evriwan save stap gud long hem. Sapos wanfala king wea hemi garem gudfala tingting olsem, bae pipol blong hem i stap sef andanit long paoa blong hem. 25So, yufala mas lanem gud wanem nao bae mi tisim yufala long hem, an laef blong yufala bae hemi kamap gud moa.
King hemi semsem wetem evri pipol nomoa
Currently Selected:
Waestok 6: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.