Waestok 3
3
1God hemi gadem laef blong olketa gud pipol an bae olketa no safa. 2Long#Waestok 4:17. tingting blong olketa hu i no garem gudfala save, hemi luk olsem wea olketa gud pipol i dae, an dae blong olketa hemi wanfala ravis samting. 3Hemi tru wea olketa lusim yumi, bat hemi no wanfala nogud samting. Hemi tru samting nao, olketa gud pipol i stap long piis. 4Ya, hemi luk olsem wea olketa safa long panis, bat laef blong olketa bae hemi no save finis. 5-6Safa#Rom 8:18; 2 Korin 4:17. blong olketa hemi smol nomoa winim bikfala blesing wea God bae hemi givim olketa. God hemi testem olketa olsem taem olketa testem gol long faea, an hemi lukim dat olketa fitim fo stap wetem hem. God hemi hapi long olketa, olsem taem hemi hapi long olketa sakrifaes wea olketa bonem antap long olta fo hem.
7Taem God hemi kam fo givim gudfala samting long olketa pipol hu i stret, bae olketa saenaot an spoelem olketa nogud pipol olsem faea wea hemi bonem drae gras. 8Bae olketa rulim pipol long evri kantri, an Lod bae hemi king blong olketa olowe nao. 9Olketa hu i trastem God bae i save long tru wei blong hem. Olketa hu i biliv strong long hem bae i stap wetem hem long lav blong hem, bikos hemi kaen tumas an hemi save sore long olketa hu hemi siusim finis.
Panis blong olketa nogud pipol
10Hemi fitim fo olketa nogud pipol fo Lod hemi panisim olketa falom olketa ravis tingting blong olketa, bikos olketa agensim Lod an les long wanem hemi stret. 11Man hu hemi les long waes an gudfala tising, bae hemi garem ravis laef nomoa. Hemi nating garem eni gud samting long laef blong hem. Evri waka blong hem hemi yusles nomoa an bae hemi nating garem eni gud samting. 12Waef blong hem bae hemi nating duim eni gud samting, an olketa pikinini blong hem bae i nating duim enisamting stret. 13Olketa hu bae i bon kam long laen blong olketa bae i garem panis.
Gudfala tingting hemi impoten
Long De blong Jaj, God bae hemi givim gudfala samting long woman hu hemi no garem pikinini, sapos hemi no durong wetem eni man. An bae hemi hapi fogud. 14Long datfala de tu, sapos man wea olketa aotem tufala bol blong hem, hemi falom Lo an no agensim Lod, God bae hemi givim gudfala samting long hem an mekem hem hapi. Bikos hemi tinghevi long God, bae God hemi putum hem long wanfala spesol ples insaet long Tambuhaos blong hem long heven, nomata hemi no garem pikinini. 15Pipol wea wei blong olketa hemi gud olketa olsem tri wea hemi garem olketa nambawan frut. Waes hemi olsem rut wea hemi laef an oltaem save garem olketa niu brans.
16Bat olketa pikinini wea woman hemi garem long deferen man o long marit wea hemi no stret, bae olketa dae kuiktaem nomoa. 17An nomata olketa save laef longtaem, bae olketa yusles nomoa. An taem olketa olo, no eniwan bae hemi tinghae long olketa. 18An sapos olketa dae taem olketa yang yet, olketa mas no tingim bae God hemi sore long olketa long De blong Jaj. 19Olketa pikinini hu i bon long marit wea hemi no stret bae olketa i safa fogud.
Currently Selected:
Waestok 3: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.