Nambawan Singsing 2
2
1Mi ya mi olsem nomoa wael flaoa
wea hemi grou long bikfala flat eria long Saron.
Ya, mi olsem nomoa naes flaoa,
wea hemi grou insaet long olketa vali.
Yang man hemi tok
2Daling blong mi,
taem yu stap midol long olketa narafala yang woman,
yu barava luk olsem wanfala naes flaoa
wea hemi grou midol long olketa nilagras.
Yang woman hemi tok
3Man blong mi,
taem yu stap midol long olketa narafala yang man,
yu barava olsem wanfala apol tri
wea hemi grou midol long olketa narafala tri long bus.
Mi laekem tumas fo sidaon long sado blong apol tri ya,
an frut blong hem hemi barava suit tumas.
4Yu tekem mi go long haos fo wanfala fist,
an yu kavarem mi long lav blong yu.
5-6Yu putum lef han blong yu andanit long hed blong mi,
an holem mi kolsap long yu long raet han blong yu.
Givim kam drae grep,
mekem mi kaikaim fo mi strong,
an givim kam apol,
mekem mi kaikaim fo mi hapi.
Mi barava dae nao fo lav blong yu.
7Olketa woman long Jerusalem.
Yufala mas mekem strongfala promis
long nem blong animol ya dia wea hemi save ran kuiktaem tumas,
an long nem blong animol ya gasele#2:7 “dia, gasele” Fo samfala pipol hu bin stap raonem Israel long bifoa, olketa dia an gasele i tambu animol, an pipol ya i biliv wea diskaen animol hemi garem spesol paoa. Long Hibru langguis, disfala wod dia hemi here olsem wanfala nem blong God, “El-Sadae” wea hemi minim “God hu hemi garem evri paoa (Jenesis 17:1), an disfala wod gasele hemi here olsem wanfala pat blong narafala nem blong God, “(Yawe hu) hemi garem evri paoa” wea hemi luknaes tumas:
Yufala mas no mekem mitufala seke
taem mitufala slip tugeta yet.#Nambawan Singsing 3:5; 8:4.
Mektu Singsing
Yang woman hemi tok
8!Lisin kam! Mi herem daling blong mi.
!Lukim! !Hemi kam nao!
Hemi gohed fo ran kam antap long olketa maonten,
an hemi gohed fo spid kam falom olketa hil.#Nambawan Singsing 2:17; 8:14.
9Daling blong mi ya hemi luknaes tumas olsem wanfala gasele,
an hemi save ran kuiktaem tumas olsem wanfala yangfala dia.
!Lukim! Hemi gohed fo stanap saet long wol aotsaet long haos,
an hemi gohed fo luktru kam long windo,
an long olketa hol long woling blong haos ya,
10an hemi tok olsem long mi,
“!Kam, daling blong mi!
Kam, yumitufala go.
11Taem blong tukol an ren hemi finis nao.
12Ya, taem fo pruning hemi finis nao.
Distaem hemi taem fo singsing,
an evriwea long lan blong yumi
yu save herem olketa kurukuru i singsing,
an lukim olketa wael flaoa i stat fo kavarem graon.
13Distaem tu frut blong olketa fig tri i stat fo raep,
an ea hemi smel naes tumas long smel blong flaoa blong olketa grep tri.
!Kam, daling blong mi!
Kam, yumitufala go.”
Yang man hemi tok
14Yu gohed fo haed nomoa
olsem wanfala kurukuru wea hemi fraet,
an hemi gohed fo haed insaet long olketa hol
long ston saet long maonten.
Mi laekem tumas fo herem voes blong yu,
bikos voes blong yu hemi here suit tumas
an fes blong yu tu hemi barava luknaes.
15Yumi go ronem an kasholem olketa smolfala wael dog ya,
nogud olketa spoelem plantesin grep wea hemi garem flaoa nao.
Yang woman hemi tok
16Daling, mi lavem yu tumas.
Ya, yu blong mi, an mi blong yu.
Yu olsem nomoa wanfala sipsip
wea hemi kaikai midol long olketa naes flaoa ya.#Nambawan Singsing 6:3.
17Daling blong mi,
taem kol win long moning hemi blou kam
an delaet hemi jes stat fo kamap,
yu mas go kuiktaem olsem animol ya gasele,
an spid go olsem yangfala dia long olketa maonten an olketa vali.#Nambawan Singsing 2:9; 8:14.
Currently Selected:
Nambawan Singsing 2: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.