Sirak 51
51
Singsing fo talem tengkiu
1Mi tengkiu long yu,
O Lod an King,
an mi preisim yu,
God an Sevia blong mi.
2Mi tengkiu long yu
bikos yu helpem mi
an lukaftarem mi.
Yu sevem mi long dae,
an long olketa laea toktok
an long olketa nogud stori
wea i save kilim mi dae.
3Yu nao yu helpem mi,
taem no eniwan save helpem mi.
An long bikfala lav blong yu,
yu sevem mi long plande trabol
wea mi save finis,
long wei wea olketa enemi
i heitem mi tumas,
an olketa hu i wandem
fo kilim mi dae.
4Yu nao yu sevem mi,
taem olketa enemi
i smokem mi long faea
mekem mi dae long faea
wea mi no laetem.
5Yu lukaftarem mi long dae,
an long olketa ravis laea
wea olketa ripotem go long king.
6Mi kolsap dae long wanfala taem,
7wea olketa enemi i raonem mi long evri saet.
Mi lukaotem eniwan fo helpem mi,
bat no eniwan nao hemi stap.
8Bat nao, O Lod, mi tingim
hao yu save lavem olketa pipol,
an wanem yu duim bifoa.
Mi tingim tu
wea yu sevem olketa
hu i dipen long yu,
an yu sevem olketa
long enemi blong olketa.
9Nao long disfala wol,
mi prea go long yu
fo sevem mi long dae.
10Mi prea olsem,
“O Lod, yu nao dadi blong mi,
yu no lusim mi
long olketa trabol blong mi,
taem no eniwan hemi stap fo helpem mi
long olketa praod enemi.
11Bae mi preisim yu olowe
an singim holi singsing
fo talem tengkiu long yu.”
12Yu ansarem prea blong mi,
an sevem mi long olketa
hu i wande spoelem mi.
So, mi tengkiu long yu
an preisim yu.
!O Lod, mi preisim yu!
Lukaotem Waes
13Taem mi yang man yet, an mi no goaot yet fo go long eni ples, mi gohed nomoa fo prea strong long Lod fo hemi givim mi Waes. 14Mi go insaet long Tambuhaos an ask fo hem, an long hol laef blong mi bae mi gohed fo lukaotem hem. 15Waes hemi gohed fo mekem mi hapi stat taem mi pikinini yet go-go kasem taem mi olo. Ya, stat taem mi yang yet, mi falom kam wei blong hem ka-kam kasem tude. 16Mi stat fo tekem Waes, taem mi stat fo lisin long hem, an Lod hemi mekem mi fo save long evrisamting. 17Oltaem mi gohed fo lanem olketa samting an mi preisim Lod hu hemi givim mi bikfala waes. 18Mi barava tingting strong fo stap falom waes tingting, an wakahad fo duim olketa gud an stretfala samting. 19Mi faet had fo Waes, an mi traehad fo duim evrisamting stret. An taem mi prea, mi talemaot wea mi sore fo mi no garem bikfala Waes. 20Bat mi tingting strong tumas fo tekem hem, an mi faendem hem taem mi stap farawe long sin. Mi grouap kam long Waes stat taem mi faendem hem, an bae mi mas stap wetem hem olowe nao. 21Bikos mi laekem tumas fo faendem hem, mi nao garem bikfala samting wea hemi gud tumas. 22Lod hemi givim mi spesol gif fo toktok, an mi yusim fo preisim hem.
23!Yufala evriwan hu i nidim advaes an wandem fo lane insaet long skul blong mi, yufala mas kam! 24?Waswe nao yufala sei yufala no save, an no duim enisamting abaotem? 25Hem ya nao wanem mi talem, !Yufala bae no peim Waes long eni seleni! 26Yufala mas tinghevi long hem an mas wiling fo lane. Disfala gudfala samting hemi stap kolsap olowe nomoa. 27!Yufala mas lukim seleva! Mi nating stadi had yet, bat mi barava faendem nao wanem mi laekem an mi hapi tumas. 28Nomata yufala hadwaka tumas fo garem Waes, bat bae hemi barava helpem yufala tumas. 29Yufala mas hapi an tengkiu long Lod fo lav blong hem, an no filsem fo preisim hem. 30Yufala mas duim waka blong yufala long barava taem, an Lod bae hemi givim olketa gudfala samting long yufala long taem wea hemi tingim hemi fitim fo givim.
Currently Selected:
Sirak 51: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.