Sirak 33
33
1No eni nogud samting bae hemi kasem man hu hemi tinghae long Lod. Nomata olsem, olketa nogud samting save kam, bat bae Lod hemi kam fo sevem yu. 2Man hu hemi no tinghevi long Lo, hemi krangge. An eniwan hu hemi tinghae long hem, hemi olsem wanfala bot wea olketa wev i torowe olobaot insaet long raf si. 3Yu#Eksodas 28:30; Sirak 45:10. mas garem gudfala tingting, an trastem Lo blong Lod, an bae hemi save helpem yu. 4Yu mas redim wanem yu wande talem, an pipol bae lisin long yu. Yu mas yusim wanem yu save, bifoa yu stat fo toktok. 5Tingting blong krangge man hemi go raon an raon nomoa olsem wanfala wil. 6Fren hu hemi save tokpraod, save toknogud long eniwan nomoa.
Evri pipol i no semsem
7?Nomata semsem san nomoa hemi kamap long moning evri de long yia, waswe nao samfala de i holi moa winim olketa narafala de? 8Olketa deferen, bikos Lod hemi putum olketa fo deferen olsem olketa de wea i holi an olketa bikde fo fist. 9God seleva nao hemi mekem samfala de fo holi an impoten, an olketa narafala de fo no olsem.
10God hemi mekem evri pipol long graon, olsem Adam. 11Bat long waes blong Lod, hemi mekem evriwan deferen an givim deferen waka fo evriwan. 12Samfala pipol, hemi blesim olketa an hemi mekem olketa fo kamap holi, an hemi kipim olketa fo stap kolsap long hem. Olketa narawan, Lod hemi mekem trabol fo kasem olketa, hemi daonem olketa an hemi aotem olketa long waka blong olketa. 13Olsem red graon insaet long han blong man hu hemi wakem pot, yumi tu i stap insaet long han blong God hu hemi mekem yumi, an hemi save duim nomoa wanem hemi laekem fo duim long yumi.
14Gud hemi deferen long nogud, an laef hemi deferen long dae. An sin hemi deferen long wei fo duim waka fo mekhae long Lod. 15Yu mas tingting gudfala abaotem diswan. Evrisamting wea Lod hu i hae tumas hemi mekem, hemi mekem fo garem tufala saet, wanfala hemi deferen long narawan.
16Mi Jisas san blong Sirak nao, mi laswan fo waka olsem lida. Hemi olsem wea mi kam bihaen nomoa fo pikim olketa grep wea olketa wakaman i lusim. 17Bat Lod hemi blesim mi fo waka blong mi an hemi olsem wea mi fulumap ples ya fo presim waen. 18Mi wande talem yufala dat mi no duim disfala waka fo mi seleva nomoa, bat mi duim diswan fo tisim evriwan. 19!Yufala evri bikfala lida, lisin kam long mi! Yufala herem kam wanem mi wande talem yufala.
Fo stanap seleva
20No letem eni deferen pipol fo lidim laef blong yu, nomata hemi san blong yu, o waef blong yu, o brata blong yu, o eni gudfala fren blong yu. No givim olketa samting wea yu onam go long eniwan, nogud yu sensim maen blong yu an yu askem baek moa long hem. 21Taem yu laef yet an bodi blong yu save muv yet, no letem eniwan fo lidim laef blong yu. 22Hemi moabeta fo yu nao yu lidim olketa pikinini blong yu, an i no olketa nao fo lidim yu. 23Yu mas kontrolem evrisamting wea yu duim, an no letem eniwan fo spoelem gudfala nem blong yu. 24Yu mas weit go-go kasem taem wea yu kolsap dae, bifoa yu divaedem olketa samting wea yu onam fo olketa pikinini blong yu.
Wanem fo duim fo olketa slev
25Yu mas givim kaikai an waka fo slev blong yu an yu mas advaesim hem, olsem wea yu givim kaikai an waka fo dongki blong yu an yu wipim hem. 26Sapos yu givim waka long slev blong yu, bae maen blong yu save res. An sapos yu no mekem hem bisi long waka, bae hemi ranawe long yu. 27Wip an waka nao save mekem animol falom wanem yu laekem. Sapos slev blong yu hemi no obeim yu, yu mas taengem hem an wipim hem tu. 28Yu mas gohed fo mekem hem duim waka, an no letem hem stap nating.
29Sapos hemi stap nating, bae hemi garem taem fo mekem trabol. 30Wanem hemi stap fo hem nao, hemi mas waka. An sapos hemi no obeim yu, yu mas taengem long sen. Yu mas no had tumas long eniwan, bat no ravem tu eniwan long enisamting. 31Sapos yu garem wanfala slev nomoa, yu mas duim long hem wanem yu laekem hem fo duim fo yu, bikos seleni wea yu wakahad fo hem nao yu baem long hem. An sapos yu garem nomoa wanfala slev, yu mas duim samting fo hem olsem hemi wanfala brata blong yu, bikos yu nidim hem tu olsem wea hemi nidim yu. 32Sapos yu duim samting nogud long hem, bae hemi lusim yu an ranawe. 33?Ya, wea nao bae yu save go fo faendem hem?
Currently Selected:
Sirak 33: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.