Sirak 24
24
Fo preisim waes
1Waes hemi singsing fo preisim hem seleva long olketa pipol long Israel hu i pipol blong hem seleva. 2Hemi duim diswan taem olketa kam tugeta frant long Lod hu hemi hae tumas, an wetem evri enjel blong hem:
3“Mi nao disfala toktok
wea hemi kamaot long maos blong Lod
hu hemi hae tumas.
An mi kavaremap disfala wol
olsem smok.
4Mi#Eksodas 33:9-10. stap long heven antap
an sidaon long sea
olsem king antap long klaod.
5Mi seleva nomoa save
wakabaot raon long skae
an wakabaot tu insaet long dipsi andanit long wol.
6Mi nao mi rulim disfala wol,
an olketa wev long dipsi.
Mi rulim evri kantri
an evri pipol.
7Mi lukluk evriwea
fo faendem ples fo mi stap long hem,
eni pat long wol
fo mekem hom blong mi.
8Nao Lod hu hemi mekem evrisamting long skae an long disfala graon, hemi talem mi ples fo mi stap long hem. Hemi tok olsem, ‘Mekem hom blong yu long Israel, an olketa grani blong Jekob hu i bon kam bihaen nao bae i kamap pipol blong yu.’
9Bifoa taem hemi stat,
hemi mekem mi finis.
An bae mi stap evritaem olowe nao.
10Mi waka fo hem
long Tambu Haostent,
an hom blong mi nao
antap long maonten Saeon.
11Hemi putum mi insaet long nambawan taon
wea hemi lavem tumas,
an mekem mi rulim Jerusalem.
12Mi stap strong wetem olketa pipol
hu i garem biknem.
Mi putumdaon rut blong mi long olketa
wea Lod hemi siusim olketa fo hem seleva,
13Mi grouap tol olsem sida tri long Lebanon,
olsem bikfala tri antap long maonten Hemon,
14an pamtri long En-Gedi,
an olsem ros flaoa long Jeriko,
an nambawan oliv tri long levol ples,
an olketa tri wea i grou long saet riva.
15Ya, maos blong mi hemi smel naes tumas
olsem sinamon,
olsem suit smel blong olketa flaoa long bus,
an olsem olketa nambawan oel
wea i smel naes fogud,
wea olketa yusim insaet long Tambu Haostent.
16Mi spredemaot olketa brans blong mi
olsem ok tri,
an hemi barava luknaes fogud.
17-18Olsem rop blong grep tri,
mi putumaot olketa yang rop blong mi,
wea hemi redi fo garem plande nambawan frut.
19Evriwan wea yufala laekem mi,
yufala kam an kaikaim frut blong mi
mekem yufala fulap.
20Bae yufala tingim mi
wea mi suit winim hani.
21Kaikaim mi,
an bae yufala laekem samfala moa.
Dringim mi,
an bae yufala laekem samfala moa.
22Obeim mi,
an bae yufala no save sem.
Duim wanem mi talem,
an bae yufala stap sef awe long sin.”
Waes an Lo
23-24Waes nao hemi Lo. An hem nao Lo wea Mosis hemi tokstrong long yumi fo kipim. An hem nao agrimen blong God hu hemi hae tumas wea hemi givim fo yumi pipol blong Israel. 25Waes hemi kamaot long Lo blong God olsem Riva Pison an Riva Taegris long taem fo pikim frut. 26Lo hemi fulap long save olsem Riva Iufretis an Riva Jodan long taem blong havest. 27Waes hemi givim gudfala tingting long pipol, olsem braet blong Riva Nael an Riva Gihon long taem fo pikim grep.
28Fas man wea God hemi mekem, hemi nating savegud long waes. an las man long wol bae hemi no savegud tu. 29Olketa samting wea Waes hemi garem hemi bikfala moa winim dipsi, an olketa samting wea hemi save givim hemi dip moa winim dipsi.
30Mi save tingim mi seleva olsem wanfala dren wea wata hemi kam falom insaet long gaden. 31Mi tingim nomoa fo watarem gaden blong mi an olketa flaoa blong mi, bat dren ya hemi kamap olsem wanfala bik riva nao, an riva ya hemi kamap olsem dipsi. 32So, mi givim yufala save blong mi wea mi tinghevi tumas long hem. Mi duim olsem, mekem evri pipol save lukim laet blong hem, wea hemi braet olsem taem san hemi kamap. 33Mi sendem go evri tising blong mi olsem wanfala profet, mekem evri pipol hu i bon kam bihaen bae save garem gudfala laef long hem. 34Plis, yufala mas save dat mi no duim disfala hadwaka fo mi seleva nomoa. Mi duim diswan, mekem hem helpem eniwan hu hemi laekem fo kamap waes.
Currently Selected:
Sirak 24: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.