Revelesin 3
3
Leta fo sios long Sadis
1Disfala man hemi tok olsem moa, “An yu mas raet go long enjel blong sios long Sadis,#3:1 “Sadis” Wanfala smol taon wetem plande bisnis wea olketa save wakem kaleko an olketa save mekem kaleko hemi garem enikaen kala long hem. an yu sei olsem, ‘Hem nao toktok blong mi wea mi garem seven gudfala spirit blong God, wetem sevenfala sta. Mi save abaotem yufala finis, an mi save dat yufala dae, nomata olketa sei yufala laef. 2So yufala mas wekap an mekem lelebet laef wea hemi stap yet long yufala fo kamap strong moa, bikos hemi kolsap dae finis. Bikos mi faendemaot dat olketa waka blong yufala hemi no stret yet long ae blong God blong mi. 3Nao#Matiu 24:43-44; Luk 12:39-40; Revelesin 16:15. yufala mas tingim moa olketa gudfala toktok wea olketa talemaot long yufala an yufala herem finis. Yufala mas obeim gud olketa toktok ya, an yufala mas lusim olketa ravis wei blong yufala nao. Bat sapos yufala no wekap, bae mi kam kasem yufala. An bae yufala no save long wataem nao bae mi kam, bikos bae mi kam olsem wei wea man fo stil hemi save kam.
4‘Bat samfala pipol long yufala long Sadis olketa lukaftarem kaleko blong olketa, mekem olketa no doti. Olketa nao bae werem waet kaleko an bae olketa wakabaot wetem mi, bikos olketa nao fitim diswan from gudfala waka blong olketa. 5Olketa#Eksodas 32:32-33; Sams 69:28; Matiu 10:32; Luk 12:8; Revelesin 20:12. pipol hu i winim faet olsem, olketa nao bae werem waet kaleko ya. An bae mi no tekemaot nem blong olketa from disfala buk blong laef.#3:5 “buk blong laef” Diswan hemi garem nem blong evriwan wea bae olketa kasem tru laef wea hemi no save finis. An long ae blong Dadi blong mi an ae blong olketa enjel blong hem, bae mi talemaot dat olketa nao barava blong mi.
6‘Eniwan hu hemi garem ia, hemi mas heremgud olketa toktok wea Holi Spirit hemi talem long olketa sios.’ ”
Leta fo sios long Filadelfia
7Disfala#Aesaea 22:22; Job 12:14. man hemi tok olsem moa, “Yu mas raet go long enjel blong sios long Filadelfia,#3:7 “Filadelfia” Wanfala smol taon nomoa, bikos plande etkuek nao save kasem disfala ples. an yu sei olsem, ‘Hem nao toktok blong mi wea mi holi an mi kipim promis olowe, an mi garem ki olsem ki blong King Deved.#3:7 “ki blong Deved” Lukim Aesaea 22:22. Ki hemi wanfala piksa fo bikfala paoa wea King Deved hemi garem bifoa. Kraes nao hemi garem paoa ovarem laef blong evriwan long wol. Taem mi openem doa, no eni man save satem moa, an taem mi satem, no eni man tu save openem moa. 8Mi save abaotem yufala finis, dat nomata paoa blong yufala hemi smol nomoa, yufala bin gohed fo falom tising blong mi an no filsem fo sei yufala i pipol blong mi. So mi openem wanfala doa#3:8 “openem finis wanfala doa” Jisas hemi givim olketa wanfala gud waka fo talemaot Gudnius long olketa pipol long ples ya. fo yufala, wea no eniwan save satem. 9Yufala#Aesaea 49:23; 60:14; 43:4. save. Seksin wea olketa mekhae long Seitan, olketa talem dat olketa nao Jiu, bat hemi no tru. Olketa barava laea nomoa. Bae mi mekem olketa fo kam an baodaon long frant long yufala, an bae olketa luksave dat mi barava lavem yufala tumas. 10Nao bikos yufala falom tising blong mi fo gohed fo stanap strong olowe, bae mi lukaftarem yufala, mekem yufala stap sef long taem trabol hemi kam long disfala wol fo testem olketa pipol. 11No longtaem nomoa, bae mi kambaek moa long yufala. So yufala mas holemstrong olketa gudfala wei wea yufala garem finis, nogud eniwan hemi stopem yufala from winim nambawan praes ya. 12Man#Revelesin 21:2; Aesaea 62:2; 65:15. hu hemi winim faet, bae mi mekem hem kamap olsem wanfala pos insaet long Tambuhaos#3:12 “olsem wanfala pos insaet long Tambuhaos” Hemi minim bae hemi kamap olsem lida long sios. Lukim Galesia 2:9. blong God blong mi, an bae hemi stap olsem olowe nomoa. Bae mi raetem olketa nem fo stap long hem, olsem niu nem blong mi an nem blong God blong mi an nem blong bikfala taon blong hem. Bikfala taon ya nao hemi niu Jerusalem wea bae God blong mi hemi sendem kamdaon long heven.
13‘Eniwan hu hemi garem ia, hemi mas heremgud olketa toktok wea Holi Spirit hemi talem long olketa sios.’ ”
Leta fo sios long Leodisia
14Disfala#Provebs 8:22. man hemi tok olsem moa, “An yu mas raet go long enjel blong sios blong Leodisia,#3:14 “Leodisia” Wanfala bikfala taon long saet blong bisnis. Olketa garem plande bikfala bank an olketa save wakem enikaen kaleko an enikaen mat an olketa garem tu bikfala skul long saet blong meresin. an yu sei olsem, ‘Hem nao toktok blong mi wea mi nao man fo somaot dat olketa promis blong God hemi tru. An mi nao man fo talemaot stret olketa toktok blong hem, an mi tok tru nomoa. An evrisamting wea God hemi mekem, hemi stat kam long mi nao.#3:14 “hemi stat kam long mi nao” Nara wei fo talem moa “mi nao bos ovarem”. 15Mi save abaotem yufala finis, dat yufala no hot an yufala no kol tu. Sapos yufala barava hot o yufala barava kol, hem nao hemi gud long mi. 16Bat bikos yufala hafhaf long evrisamting an lelebet hot nomoa, bae mi toraotem yufala from maos blong mi. 17Yufala sei yufala barava ris fogud an yufala garem finis evrisamting yufala laekem. Bat yufala nating save nomoa, dat yufala pua tumas, an neket, an ae blong yufala tu hemi blaen. Hemi fitim fo olketa pipol fo sore long yufala, bikos evrisamting nao yufala sot long hem. 18Bat mi talem yufala stret, yufala mas peim barava gudfala gol long mi, mekem yufala kamap ris. An yufala mas peim waet kaleko long mi fo yufala werem, mekem yufala no save filsem moa long neket bodi blong yufala. An yufala mas peim tu samfala meresin long mi fo putum long ae blong yufala, mekem yufala save lukluk gud moa. 19Olketa#Provebs 3:12; Hibrus 12:6. pipol wea mi lavem olketa tumas, mi save tokstrong long olketa, an mi save panisim olketa tu. So yufala mas tinghevi long mi an lusim olketa ravis wei blong yufala. 20Yufala save, mi stanap aotsaet long doa, an mi gohed fo noknok. Nao sapos wanfala man hemi herem toktok blong mi an hemi openem doa fo mi, bae mi kam insaet long haos blong hem, an bae mitufala kaikai tugeta. 21Man wea hemi winim faet, bae mi mekem hem fo sidaon fo rul wetem mi, bikos mi winim faet finis an mi gohed fo rul wetem Dadi blong mi.
22‘Eniwan hu hemi garem ia, hemi mas heremgud olketa toktok wea Holi Spirit hemi talem long olketa sios.’ ”
Currently Selected:
Revelesin 3: SIDC
Highlight
Copy
Compare
Share
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
