Judit 2
2
Faet wetem olketa pipol long saet long si
1Taem Nebukadnesa hemi kasem mekeitin yia, long waka blong hem olsem king, long mektuenti-tu de long fas mans long datfala yia, Nebukadnesa an olketa advaesa blong hem olketa agri fo faet wetem olketa ples wea olketa les fo helpem hem. 2-3Nao, king hemi kolem tugeta evri bikman blong hem an olketa waes man, an talem olketa abaotem evri pipol long olketa ples wea olketa les fo falom wanem hemi laekem. King an evri waes man blong hem olketa agri evriwan. So, hemi talemaot long olketa evri plan blong hem fo faet wetem olketa.
4Taem Nebukadnesa hemi finis miting wetem olketa bikman blong hem, hemi kolem kam Holofenes. Man ya nao, hemi bikman long ami blong hem an sekon long king. An hemi tok olsem long hem,
5?Mi nao Nebukadnesa, mi nao king ovarem evriwan long wol, mi askem yu fo siusim 120,000 man fo wakabaot, an 12,000 fo go long hos, an evriwan olketa save gud fo faet. 6Bihaen, yufala mas go long olketa kantri long west bikos olketa les fo herem mi taem mi askem olketa fo helpem mi. 7Yu mas talem olketa mas redi fo givim graon an wata fo mi, olsem saen olketa redi fo sarenda long paoa blong mi. Tru tumas, bae olketa filim strong blong kros blong mi, an bae mi kilim evriwan. Olketa ami blong mi bae olketa go evriwea long lan blong olketa, an bae olketa tekem evrisamting blong olketa. 8Bae mi filimap ded bodi blong olketa long levol graon, an long olketa smolfala riva an bikfala riva, mekem evri riva bae olketa fulap an wata bae hemi go evriwea. 9Sapos samfala olketa i no dae, bae mi tekem olketa olsem slev go long en long wol.
10An yu, Holofenes, mi odarem yu fo go fastaem an yu tekem evri lan blong olketa. Sapos olketa sarenda go long yu, yu mas holem olketa, an taem mi go kasem yu, bae mi panisim olketa. 11Sapos samfala olketa les fo sarenda go long han blong yu, yu mas no sore long olketa. Yu mas kilim olketa dae an yu mas tekem evrisamting blong olketa. 12Mi suea strongfala finis, an mi biliv bae mi mekem tru wanem mi suea fo duim. 13Yu mas tingim mi nao mi king blong yu, an yu mas duim kuiktaem wanem mi talem yu.?
Holofenes hemi go faet
14Taem king hemi finis fo toktok, Holofenes hemi stanap, an hemi go an hemi kolem evri bikman blong ami long Asiria. 15Hemi duim olsem wanem king hemi talem hem fo duim. So hemi siusim 120,000 man olketa wakabaot an olketa save gud fo faet, an hemi siusim tu 12,000 man olketa go long hos an olketa save gud fo sut long bou an aro. 16Hemi redim olketa fo go long faet. 17Hemi tekem wetem hem tu plande kamel an dongki fo karim kago, an olketa buluka an sipsip an nanigot fo kaikai. 18Evri soldia olketa tekem plande kaikai, an plande gol an silva, wea king hemi tekem long haos fo putum seleni long hem.
19So Holofenes an ami blong hem, olketa go fo faet nao. Olketa hu i go long hos, an olketa hu i wakabaot, an olketa hu i go long kaat wea hos i pulum, olketa evriwan go fo faet long olketa kantri long west. An King Nebukadnesa hemi ka-kam bihaen. 20Wanfala#Jajis 7:12; Joel 2:2-11. bik grup tu olketa go wetem olketa. Olketa plande tumas olsem anis wea olketa flae long ea, o olsem graon long sanbis.
21Trifala de bihaen olketa lusim Nineve, olketa go kasem levol graon raonem Bektilet kolsap long olketa maonten long Silisia long not, an olketa putumap olketa haostent blong olketa. 22Stat long dea, Holofenes wetem evri ami blong hem, olketa i wakabaot, an olketa i go long hos, an olketa i go long kaat wea hos i pulum, an olketa go nao long olketa maonten. 23Long dea, olketa barava spoelem nao olketa lan long Libia an Lidia, bihaen olketa tekem evrisamting blong olketa long Rasis an Ismael, wea olketa stap long en long drae lan long saot blong Kelus.
24So, Holofenes an ami blong hem olketa go akros long narasaet long Yufretis Riva, an olketa wakabaot long insaet lan long Mesopotemia. Olketa falom Abron Riva an spoelem evri taon wea olketa raonem wolston long olketa, an olketa go kasem long saet long Mediterenian Si. 25Olketa holem tu lan long Silisia, an kilim evri pipol olketa trae fo stopem olketa fo go kasem baondri saot long lan long Jafet kolsap long Arebia. 26Olketa raonem olketa long Midian an bonem olketa haostent blong olketa an kilim evri sipsip blong olketa.
27Den Holofenes an ami blong hem olketa godaon long levol graon long Damaskas long taem blong wit hemi redi fo havest. Olketa bonem evri gaden blong olketa, an olketa kilim olketa buluka an sipsip blong olketa, an olketa tekem an spoelem evrisamting blong olketa, an kilim evri yang man. 28Evri pipol olketa stap long saet long Mediterenian Si olketa evriwan fraet an seksek fogud. Olketa pipol long Taea, Saedon, Sua, Okina, Jamnia, Asdod an Askelon, evriwan olketa fraetem Holofenes.
Currently Selected:
Judit 2: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.