Efesas 5
5
Pipol blong laet
1Yufala nao olketa pikinini blong God wea hemi lavem yufala tumas. Olsem, yufala mas trae fo falom wei blong hem tu. 2Lav#Eksodas 29:18; Sams 40:6. nao hemi mas bikfala long laef blong yufala, olsem Kraes hemi lavem yumi an hemi bin letem hem seleva fo dae fo helpem yumi. Hemi olsem wanfala sakrifaes wea hemi smel naes tumas wea God hemi save hapi tumas long hem.
3Yufala i holi pipol blong God, an hemi no fitim fo yufala mekem eniwan save tingse dat yufala save durong wetem eniwan, o duim enikaen ravis samting olsem moa, o fo kavetem olketa samting blong nara pipol. 4An hemi no fitim tu fo yufala talem enikaen ravis toktok o krangge toktok o eni tokfani wea hemi doti fo herem. Bat wanem yufala mas duim nao, yufala mas talem tengkiu long God. 5Yufala seleva save finis, diskaen pipol wea olketa durong wetem eniwan an duim enikaen ravis samting olsem moa, olketa no garem eni ples insaet long laef wea Kraes an God nao i King ovarem. An hemi olsem tu fo olketa hu i kavetem olketa samting blong nara pipol, bikos hemi olsem olketa wosipim olketa laea god nomoa ya. 6Yufala mas no letem eniwan fo laea long yufala abaotem olketa samting ya long olketa toktok wea hemi no tru. God bae hemi barava kros long olketa pipol wea olketa no save obeim hem, bat olketa falom olketa ravis wei olsem ya. 7So yufala mas no joen wetem diskaen pipol.
8Bifoa, yufala tu bin stap long tudak, bat distaem yufala blong Masta finis, an yufala stap long laet nao. So yufala mas gohed long wei blong pipol blong laet, 9bikos wei blong laet nao hemi save mekem olketa samting wea hemi gud an hemi stret an hemi tru fo kamap. 10An yufala mas trae fo luksave an duim olketa samting wea Masta hemi hapi long hem. 11Yufala mas no duim olketa samting blong tudak, wea hemi olketa ravis samting nomoa. Bat yufala mas somaot nomoa long olketa pipol wea diskaen wei hemi nogud. 12Olketa ravis samting wea olketa save duimhaed ya, nomata fo tokabaotem, yumi barava filsem tumas long hem. 13Bat taem laet hemi saenaot long olketa samting blong tudak ya, bae olketa pipol barava luksave long olketa ya nao. 14Bikos enisamting wea olketa pipol barava luksave long hem, hemi kamap olsem laet nao.#5:14 “Bikos enisamting …” Nara wei fo talem moa,“Bikos laet nao hemi mekem olketa pipol barava luksave long evrisamting.” Dastawe nao olketa save sei,
“!Yufala hu i save slip, yufala wekap nao!
Yufala laefbaek moa from dae,
mekem laet blong Kraes hemi saenaot long yufala.”#5:14 “Wekap nao …” Disfala toktok ya hemi no stap long Buktambu, bat maet hemi wanfala singsing blong olketa Kristin long datfala taem.
15So yufala mas lukaot long hao yufala stap. Yufala mas no stap olsem olketa pipol hu olketa no save yet long wanem hemi stret an gud. Bat yufala mas stap olsem pipol hu i garem waes tingting. 16Distaem#Kolosi 4:5. ya, wei blong nogud ya hemi garem paoa, so yufala mas yusim gud evri lelebet taem fo duim olketa gudfala samting. 17So yufala mas no krangge, bat yufala mas trae fo luksave long wanem Masta hemi laekem yufala fo duim.
18Yufala mas no drang long waen wea hemi save spoelem laef blong yufala, bat yufala mas fulap long Holi Spirit. 19An#Kolosi 3:16-17. taem yufala Kristin hipap tugeta, yufala mas gohed fo singim olketa Sam, an olketa singsing blong lotu, an olketa nara singsing wea Holi Spirit hemi givim kam. Yufala mas singsing an preisim Masta long haat blong yufala. 20Oltaem, yufala mas talem tengkiu long God Dadi ya fo evrisamting, long nem blong Jisas Kraes Masta blong yumi.
Toktok abaotem Kristin famili
21Bikos yufala tinghae long Kraes, evriwan long yufala mas putum yufala seleva andanit long paoa blong evri narawan blong yufala.
22Yufala#Kolosi 3:18; 1 Pita 3:1. woman hu i marit, yufala mas putum yufala seleva andanit long paoa blong olketa hasban blong yufala, olsem yufala save duim long Masta, 23bikos#1 Korin 11:3. man nao hemi hed blong waef blong hem olsem Kraes hemi hed blong sios. An sios nao hemi bodi blong Kraes, wea Kraes hemi bin sevem hem finis. 24An long wei wea sios hemi putum hem seleva andanit long paoa blong Kraes, olketa woman tu mas wiling fo duim olsem long olketa hasban blong olketa.
25Yufala#Kolosi 3:19; 1 Pita 3:7. man hu i marit, yufala mas lavem olketa waef blong yufala barava olsem Kraes hemi lavem sios. Dastawe hemi letem hem seleva fo dae fo sios, 26mekem sios hemi kamap holi. Hemi bin mekem sios fo kamap klin long taem hemi wasim long wata an hemi talemaot toktok blong hem.#5:26 “long taem hemi wasim long wata an hemi talemaot toktok blong hem” Maet Pol hemi minim baptaes blong olketa pipol blong sios wea olketa save talemaot olketa toktok blong Kraes. O maet hemi minim wanfala marit blong olketa Jiu, wea sios hemi olsem woman hu hemi mas wasim bodi gudfala fastaem, an Kraes hemi olsem man hu hemi talemaot disfala toktok fo makem marit blong tufala. 27Bikos taem Kraes hemi tekem sios fo kam long hem seleva, hemi laekem sios fo barava luknaes tumas wea hemi no garem enisamting rong long hem bat hemi stret fogud. 28Yufala man mas lavem olketa waef blong yufala barava olsem yufala lavem bodi blong yufala seleva. Taem man hemi lavem waef blong hem, hemi lavem hem seleva nao. 29No eniwan hemi laek fo spoelem bodi blong hem seleva. Nomoa. Yumi save kaikai gudfala an lukaftarem bodi blong yumi olsem Kraes hemi lukaftarem sios. 30Bikos yumi long sios nao yumi olketa pat long bodi blong hem. 31Buktambu#Jenesis 2:24. hemi sei,
“Bikos hemi olsem, man hemi mas lusim mami an dadi blong hem,
an hemi mas joen wetem waef blong hem,
an tufala bae i kamap wanfala nomoa.”
32Disfala toktok ya wea hemi bin staphaed, hemi garem bikfala tingting long hem an mi luksave dat hemi tokabaotem Kraes an sios blong hem. 33Bat disfala toktok hemi abaotem yufala tu ya. So evri man mas lavem waef blong hem olsem hemi lavem hem seleva, an evri waef mas tinghae long hasban blong hem.
Currently Selected:
Efesas 5: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.