2 Tesalonaeka 2
2
Man fo Brekem Lo
1Olketa#1 Tesalonaeka 4:15-17. Kristin fren, hemi gud fo tingim wei wea Jisas Kraes Masta blong yumi bae hemi kambaek moa an bae hemi mekem yumi stap tugeta wetem hem. 2So mi talem strong long yufala, plis no kuiktaem fo lusim tingting blong yufala o wari tumas taem yufala herem olketa olobaot toktok wea hemi sei, “De blong Masta hemi kam finis nao.” Nogud olketa pipol laea olsem an sei Holi Spirit nao hemi talem diswan o olketa sei mifala nao talem o raetem long eni leta blong mifala. 3Yufala no letem eniwan fo laea olsem long yufala, bikos Lasde ya bae hemi no save kam nating. Fastaem, staka pipol nao bae faet agensim God, an disfala man wea olketa kolem “Man fo Brekem Lo”,#2:3 “Man fo brekem Lo” Samfala olfala kopi blong Mektu Tesalonaeka olketa sei, “Man blong sin”. Hemi disfala man wea Jon hemi kolem Enemi blong Kraes long Fas Jon 2:18-23. bae hemi kam fastaem tu. An hem nao man wea God bae hemi barava spoelem hem. 4Bae#Daniel 11:36; Esikiel 28:2. disfala man hemi agensim evrisamting wea pipol olketa gohed fo wosipim, wetem enikaen god blong olketa. An bae hemi mekem hem seleva fo bikfala winim moa evrisamting ya, an bae hemi go sidaon insaet long Tambuhaos blong God an talem dat hem seleva nao hemi God.
5?So waswe, yufala fogetem finis nao olketa samting wea mi talem long yufala taem mi stap yet wetem yufala? 6Disfala Man fo Brekem Lo bae hemi som hem seleva long barava taem blong hem. An yufala save finis long disfala paoa wea hemi stopem hem#2:6 “disfala paoa wea hemi stopem hem” Yumi no save hu nao o wanem nao Pol hemi tingim. Maet hemi minim bikfala King long Rom o maet hemi minim wea Gudnius hemi no kasem evriwan long wol yet (lukim Matiu 24:14) o maet hemi minim wanfala enjel wea hemi blokem olketa samting fo hapen (lukim Revelesin 7:1-3). fo no kamaot klia yet. 7Paoa blong disfala Man fo Brekem Lo nao, hemi gohed waka distaem. Bat hemi staphaed yet go-go kasem taem wea God bae hemi tekemaot disfala man hu hemi gohed fo stopem Man fo Brekem Lo. 8Long#Aesaea 11:4. taem ya nomoa, Man fo Brekem Lo bae hemi kamaot klia nao. Hem nao man wea Jisas Masta blong yumi, bae hemi kilim dae wetem win blong maos blong hem nomoa. Ya, taem Jisas hemi kambaek moa, bikfala paoa blong hem bae hemi saen kam fo barava spoelem man ya. 9Bat#Matiu 24:24. fastaem, bae Man fo Brekem Lo hemi kam wetem paoa blong Seitan, an bae hemi mekem enikaen laea mirakol an olketa bikfala samting moa wea pipol i sapraes long hem. 10Bae hemi yusim tu enikaen ravis trik nomoa fo laea long olketa pipol wea bae olketa gohed fo lus. Bae olketa lus, bikos olketa no wiling fo lavem an fo falom tru toktok abaotem Masta wea hemi save sevem olketa. 11Dastawe nao God bae hemi mekem olketa fo no tingting stret, mekem olketa biliv nomoa long olketa laea toktok. 12Bikos olketa no biliv long tru toktok, an olketa hapi fo duim olketa ravis samting, God bae hemi jajem olketa ya.
Olketa Kristin mas stanap strong
13Olketa Kristin fren, Masta blong yumi hemi lavem yufala tumas. Ya, hemi fitim fo mifala talem tengkiu long God fo yufala, bikos God hemi siusim yufala, mekem yufala nao olketa faswan fo hemi sevem.#2:13 “Bikos God hemi siusim …” Samfala olfala kopi long Mektu Tesalonaeka olketa sei,“Bikos taem God hemi no mekem wol yet, hemi siusim yufala finis fo hemi sevem yufala.” Hemi sevem yufala bikos Holi Spirit hemi mekem yufala holi an bikos yufala biliv long disfala tru toktok. 14God hemi kolem yufala kam long Gudnius wea mifala talemaot finis. Hemi duim bikos hemi laekem nambawan laef blong Jisas Kraes Masta blong yumi, fo saenaot long laef blong yufala. 15Olketa Kristin fren, yufala mas stanap strong an holetaet long olketa tru toktok wea mifala bin tisim long yufala. Hem nao olketa tising mifala bin talemaot long toktok o mifala bin raetem long leta.
16Masta blong yumi Jisas Kraes wetem God Dadi blong yumi, hemi lavem yumi tumas ya. An hemi helpem yumi tumas tu long kaenfala lav blong hem, wea oltaem hemi mekem yumi trastem hem an oltaem tu hemi strongim tingting blong yumi. 17Mifala prea wea hemi mas mekem tingting blong yufala fo strong moa, an mekem yufala gohed olowe fo duim evri gudfala waka an fo talem evri gudfala toktok.
Currently Selected:
2 Tesalonaeka 2: SIDC
Highlight
Copy
Compare
Share
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
