ESAYA 1
1
Ta ku tshinyiwa ka tiko ni ka vakulukumba.
1Vuprofeta bya Esaya, n'wana Amotsi, ehenhla ka Yuda na Yerusalema, emikarhini ya Uziya, na Yotamu na Akazi, na Hezekiya, tihosi ta Yuda.
2Matilo, yingisani, na wena misava, rhiya ndleve! Hikuva Yehovha wa vulavula: Ndzi wundlile vana, ndzi va kurisile, kambe va tiarisile eka mina.
3Homu yi tiva mufuwi wa yona, ni mbhongolo yi tiva xidyelo xa n'wini wa yona; Israele a nga tivi nchumu, tiko ra mina a ri twisisi nchumu.
4Yo! Khombo ra tiko ra vadyohi ra rixaka leri teleke ku homboloka ra vanhu lavo biha, ra vana lavo hunguka. Va fularhele Yehovha, va sandzile Mukwetsimi wa Israele va tlhelele endzhaku. 5Mi ta biwa ku yisa kwihi, loko mi andzisa ku tiarisa ka n'wina xana? Nhloko hinkwayo ya vabya, ni mbilu hinkwayo yi twa ku vaviseka. 6Ku suka emikondzweni, ku yisa enhlokweni, a ku na laha ku lulameke, i timbanga ntsena, ni mafelangati, ni swilondza leswi nyukaka, leswi nga siki tshunguriwaka ni ku boheleriwa, hambi ku ri ku olovisiwa hi mafurha.
7Tiko ra n'wina i mananga, miti ya n'wina yi hisiwile hi ndzilo, vamatiko va dya misava ya n'wina emahlweni ka n'wina. Va phanga, va heta tanihi valala. 8Kutani wanhwana wa Siyoni u sele kukotisa dladla ensin'wini ya vhinya, kukota ntsonga ensin'wini ya marhakarhaka, kukota tshala ra varindzi. 9Loko ngi Yehovha a nga hi hlayiselanga masalela, ingi hi endliwile tanihi Sodoma, hi fana na Gomora!
10Yingisani rito ra Yehovha, tihosi ta Sodoma; rhiyani tindleve, mi twa nawu wa Xikwembu xa hina, tiko ra Gomora! 11“Ndzi ni mhaka yihi ni vunyingi bya magandzelo ya n'wina?” ku vula Yehovha. Ndzi korwile hi swiphongo leswi hisiwaka, ni mafurha ya marhole; a ndzi tsakeri ngati ya tinkunzi, ni ya timbuti ni ya tinyimpfu. 12Siku mi ta ka humelela emahlweni ka mina, mi lerise hi mani ku kandziya eswivaveni swa mina? 13Tshikani ku ndzi nehela mihlengo ya vunwa ndzi venga murhi lowu nun'hwelaka ni swimusi, ni Tisavata, ni tinhlengeletano; swa ndzi tsandza ku vona ku dlaya ku pfangene ni nkhuvo. 14Moya wa mina wu venga swimusi swa n'wina ni mikhuvo ya n'wina; swa ndzi tikela, ndzi karhele ku swi rhwala. 15Loko mi tshambuluta mavoko ya n'wina, ndzi mi sirhelela mahlo ya mina; loko mi andzisa mikhongelo ya n'wina, a ndzi yingisi; mavoko ya n'wina ma tele ngati. 16Hlambani, mi tibasisa; susani emahlweni ka mina mitirho leyo biha ya n'wina; tshikani ku endla swo biha. 17Dyondzani ku endla leswinene, lavani leswi lulameke, lamulelani la xanisiwaka; sirhelelani xisiwana, lwelani noni.
18“Tanani, hi tenga timhaka!” ku vula Yehovha. “Loko swidyoho swa n'wina swi tshwukile, swi kotisa xivunguvungu, xana swi nga basa tanihi gamboko? Loko swi tshwukile tanihi crimson, xana swi nga fana ni voya bya tinyimpfu? 19Kungakuloko mi yingisa hi ku tsaka, mi ta dya leswo nandziha swa tiko; 20kambe loko mi ala, kumbe loko mi tiarisa, mi ta dyiwa hi tlhari, hikuva nomu wa Yehovha wu vulavurile.”
21Yo! Muti lowu tshembekeke, wu hundzukile wa mbiri A wu tele swo lulama, ku lulama a ku akile kona, kasi sweswi, i vadlayi. 22Mali ya wena yi hundzukile mavivi, vhinyo ya wena yi cheriwile mati. 23Tihosi ta wena ta tiarisa, ti kucetelana ni vayivi, hinkwato ti rhandza ngopfu ku nyikiwa, ti tsutsumela ku hakeriwa; a ti avanyiseli xisiwana, timhaka ta noni a ti fiki eka tona.
24Hikwalaho Hosi, Yehovha wa tinyimpi, nhenha ya Israele, u ri: “Ya! Ndzi ta titsakisa hi lava ndzi vengaka, ndzi ta tirihisela eka valala va mina. 25Ndzi ta veka voko ra mina ehenhla ka wena, ndzi nyukisa mavivi ya wena tanihi leswi endliwaka hi munyu wa potaxi; ndzi susa swipimbi hinkwaswo swa ntsopfu. 26Ndzi ta ku tlherisela vaavanyisi lava fanaka ni va khale, ni vatsundzuxi lava fanaka ni lavo rhanga. Endzhaku ka swona, u ta thyiwa muti lowu lulameke, muti lowu tshembekaka.” 27Siyoni u ta kutsuriwa hi leswo tenga, kutani lava nga ta hundzuka exikarhi ka wona, va ta kutsuriwa hi ku lulama. 28Kambe vatiarisi ni swidyohi swi ta phyandlasiwa swin'we, kutani lava tshikaka Yehovha va ta lova. 29Hikuva mi ta va ni tingana hikwalaho ka mirhi ya terebinte leyi mi yi naveleke, mi va mi tshutshala hikwalaho ka mitanga leyi mi yi tsakeleke. 30Hikuva mi ta fana ni murhi wa terebinte loko matluka ya wona ma vunile, ni tanihi ntanga loko wu pfumale mati. 31Kutani nhenha yi ta va tanihi ritiyi, ni ntirho wa yona wu va nhlahle; va ta tshwa swin'we, ku nga vi na munhu la timelaka.
Currently Selected:
ESAYA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.