ESAYA 2
2
Ta ku twala ka yindlu ya Yehovha.
1Marito lawa Esaya, n'wana Amotsi, a ma nyikiweke ehenhla ka Yuda na Yerusalema.
2Emikarhini ya makumu, ku ta humelela leswaku ntshava ya yindlu ya Israele yi ta vekiwa enhlohlorhini ya tintshava, yi tlakusiwa ehenhla ka switsunga, kutani matiko hinkwawo ma ta talela kona. 3Matiko layo tala ma ta ta kona, ma ku: “Tanani, hi ta tlhandlukela entshaveni ya Yehovha, endlwini ya Xikwembu xa Yakobo; xi ta hi dyondzisa tindlela ta xona kutani hi ta famba emitileni ya xona.” Hikuva nawu wu ta huma eSiyoni, ni rito ra Yehovha ri ta huma eYerusalema. 4Kutani Xikwembu xi ta lamula matiko, xi ta avanyisa matiko layo tala ngopfu. Hi mabanga ya vona va ta fula swikomu, hi matlhari ya vona va ta fula masikeri; tiko ri nga ka ri nga ha lwi ni rin'wana, kutani a ku nga ha dyondzisiwi ku lwa.
Ta ku avanyisiwa ka Israele.
5Yindlu ya Yakobo, tanani hi famba eku vonakaleni ka Yehovha! 6Hikuva wena Yehovha u tshikile tiko ra wena, yindlu ya Yakobo, hikuva va tele hi swa le vuxeni, va ni vungoma tanihi Vafilista, kutani va endla xinakulobye ni vana va vamatiko. 7Tiko ra yena ri tele silivhere ni nsuku, xuma xa rona a xi heri; ri tele tihanci, ni tigolonyi ta rona a ti heri. 8Ri tele swikwembu swo hemba, va khinsamela ntirho wa mavoko ya vona, ni leswi tintiho ta vona ti swi vatleke. 9Kwalaho lowa ku fa u ta tsongahatiwa, lavakulu va ta tsan'wisiwa, kutani u nga ka u nga va rivari.
10Nghena endzeni ka tintshava, u tumbela entshurini emahlweni ka Xikwembu lexi chavisaka, ni vukulukumba lebyi vangamaka bya xona! 11Mahlo lama honokeke ya lowa ku fa ma ta tsan'wisiwa, ku tikukumuxa ka tinhenha ku ta tsongahatiwa, kutani Yehovha a ri swakwe u ta tlakusiwa siku rero.
12Hikuva ku ni siku ra Yehovha wa tinyimpi, ra ku tsongahata hinkwaswo leswi tlakukeke, ni hinkwaswo leswi tikukumuxaka; 13ni mirhi hinkwayo ya kedari ya Lebanoni leyi leheke, leyi tlakukeke ni mikuhlu hinkwayo ya Baxani; 14ra ku tsongahata tintshava hinkwato leti leheke, ni switsunga hinkwaswo leswi tlakukeke, 15ni makhokholo hinkwawo lama tiyeke, 16ni rirhangu leri tiyeke, ni tingalava hinkwato ta Tarxixi, ni hinkwaswo leswi tsakisaka mahlo. 17Ku kukumuka ka lowa ku fa ku ta tsongahatiwa, ku tlakuka ka tinhenha ku ta tsan'wisiwa, kutani Yehovha a ri swakwe u ta tlakusiwa esikwini rero.
18Swifaniso hinkwaswo swa swikwembu swi ta pfumaleka. 19Kutani vanhu va ta balekela emabakweni ya tintshava ni le miceleni ya misava, hi ku chava Yehovha ni vukulukumba bya yena lebyi vangamaka, loko a ta yima ku ta chavisa misava. 20Esikwini rero, vanhu va ta cukumeta swikwembu swa nsuku ni swa silivhere leswi va tiendleleke swona ku swi gandzela eka makondlo ni vamangadyani, 21loko va balekela emabakweni ya tintshava ni le tinfeni ta maribye, emahlweni ka Xikwembu lexi chavisaka ni vukulukumba bya xona lebyi vangamaka loko xi ta yima ku ta chavisa misava. 22Hikwalaho-ke, tshikani ku tshemba munhu la nga ni ku hefemula ntsena etinhompfini ta yena, hikuva munhu u pfuna yini xana?
Currently Selected:
ESAYA 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.