RISIMU RA TINSIMU 7
7
1Tlhela, tlhela, wena Muxulama,
Tlhela, tlhela leswaku hi ku languta.
Mi langutela yini Muxulama
Kukotisa mijato ya mitlawa mimbirhi?
2Milenge ya wena yi sasekile swonghasi etintanghwini ta wena, n'wana hosi!
Swirhendzevutana swa ndzhumbi wa wena swi fana ni masindza,
Lowu nga ntirho wa tintlhari.
3Nkava wa wena i ndzheko lowu sasekisiweke,
Lowu teleke hi vhinyo leyo nandziha;
Khwiri ra wena i nhulu ya koro
Leyi rhendzeriweke hi makhon'wa.
4Mavele ya wena ma fana ni timhala letitsongo,
Ma kotisa mahahla ya ntswele ya mbavala.
5Nhamu ya wena yi fana ni khokholo ra tino ra ndlopfu.
Mahlo ya wena ma fana ni mativa ya le Hexiboni,
Ekusuhi ni nyangwa ya Beta-Rabimi;
Nhompfu ya wena yi fana ni khokholo ra Lebanoni,
Leri langutaka tlhelo ra Damaska.
6Nhloko ya wena yi tlakukile ku fana na Karmele,
Misisi ya nhloko ya wena yi fana ni xivunguvungu;
Hosi yi phasiwile hi mihoro ya yona.
7U sasekile swonghasi, u rhandzeka ngopfu,
Oho murhandziwa wanga!
Exikarhi ka mitsakiso!
8Xiyimo xa wena xi fana ni xa ncindzu,
Ni mavele ya wena ma fana ni swichocho swa wona.
9A ndzi ku:
Ndzi ta khandziya murhi wa ncindzu,
Ndzi ta khoma marhavi ya wona!
Mavele ya wena a ma ve tani hi swidzumba swa vhinya,
Ni ku nun'hwela ka ku hefemula ka wena, tani hi ku nun'hwela ka maapula!
10Nomu wa wena a wu fane ni vhinyo leyo nandziha,
Leyi lulamelaka murhandziwa wa mina,
Leyi rhetemukaka emilon'wini ya lava khudzihelaka!
11Ndzi wa murhandziwa wa mina,
Kutani ku navela ka yena ka ndzi kongoma.
12Tana, murhandziwa wa mina a hi hume hi ya emasin'wini,
Hi ya tshama nivusiku emitini!
13Ni mixo hi ta ya etivhinyeni,
Hi ta vona vhinya loko yi hlukile, ni loko yi balekile swiluva,
Hi vona mirhi ya girenada loko yi baleke swiluva.
Hi kona ndzi nga ta ku nyika rirhandzu ra mina.
14Mirhi ya mandragora yi hangalasa ku nun'hwela ka wona.
Kambe etinyangweni ta hina hi ni mihandzu hinkwayo leyo nandziha,
Leyintshwa ni leya khale.
Ndzi ku hlayisele yona, murhandziwa wanga.
Currently Selected:
RISIMU RA TINSIMU 7: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.