TIPISALEMA 99
99
Ku fuma ka Xikwembu lexo kwetsima.
1Yehovha wa fuma, matiko ma rhurhumela;
U tshamile exikarhi ka tikerubu; misava ya tsekatseka.
2Yehovha u lonkulu eSiyoni,
U tlakukile ehenhla ka matiko hinkwawo.
3A va dzunise vito ra wena lerikulu leri chavisaka,
Hikuva ri hlawulekile!
4A va dzunise matimba ya Hosi leyi rhandzaka ku lulama!
Hi wena la tiyisaka ku lulama,
La humeseleke Yakobo ku avanyisa ni ku lulama.
5Dzunisani Yehovha, Xikwembu xa hina,
Mi khinsama emahlweni ka vunavelo bya milenge ya yena,
Hikuva u hlawulekile!
6Muxe na Aroni exikarhi ka vaprista va yena;
Na Samiele, un'wana wa lava khongelaka vito ra yena,
Va khongele Yehovha, kutani a va yingisa.
7A vulavula na vona epapeni;
Va hlayisa ku lerisa ka yena,
Ni milawu leyi a nga va nyika yona.
8Oho Yehovha,
Xikwembu xa hina u va yingisile,
U vile eka vona Xikwembu lexi va rivalelaka,
Kambe u rihisile ku dyoha ka vona.
9Dzunisani Yehovha, Xikwembu xa hina,
Mi n'wi khinsamela entshaveni leyo kwetsima ya yena;
Hikuva u hlawulekile,
Yehovha, Xikwembu xa hina!
Currently Selected:
TIPISALEMA 99: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
