MIKIYA 2
2
Ta swidyoho swa vakulukumba.
1Va ni khombo lava anakanyaka ku homboloka, lava tsundzukaka swo biha emasangwini ya vona! Va swi endla eku humeni ka dyambu, hikuva swi le mavokweni ya vona. 2Va rhandza ku titekela masimu ni tindlu; kutani va pfukela wanuna ni yindlu ya yena, ni munhu la nga ni ndzhaka ya yena. 3Hikwalaho Yehovha u ri: Vonani, ndzi anakanyela rixaka leri makhombo lawa va nga hlulekaka ku humesa tinhamu eka wona, ni ku famba va yimise tinhloko; hikuva nkarhi lowu wu bihile. 4Enkarhini wolowo, ku ta va ni risimu ra xisandzu ehenhla ka n'wina, ku yimbeleriwa ni risimu ra nhlomulo leri nge: Swi herile! Hi lovile kunene; 5Yehovha u nyika van'wana ndzhaka ya tiko ra hina! Hi yini xana, loko a ndzi tekela yona! U avanyisele valala masimu ya hina! Hikwalaho u ta pfumala la nga ta hoxa ngoti ya ku pima nsimu enhlengeletanweni ya Yehovha.
6Vaprofeta va mavunwa va ri: “Mi nga profeti mi vulavula!” Xana va nga tshika ku vula timhaka teto-ke? “Leswo biha swi nga ka swi nga cukumetiwi.” 7Wena, yindlu ya Yakobo, xana mbilu ya Yehovha yi hatla ku kariha-ke? Xana hi wona mukhuva wa yena-ke? Marito ya mina a ma humesi vunene eka lava fambaka hi ku lulama xana? 8Kasi khale, tiko ra mina ri ndzi endlile nala wa rona. Mi tekela vanhu nguvu leyi va yi funengelaka ehenhla ka yin'wana, loko va famba hi ku rhula, va fana ni lava vuyaka enyimpini. 9Vavasati va tiko ra mina, mi va hlongola etindlwini leti rhandzekaka ta vona; mi tekela vana va vona xibombo xa mina, hilaha ku nga heriki.
10Pfukani, fambani! Hikuva laha, mi nga ka mi nga wisi kona, hikwalaho ka thyaka le ri humesaka ku onhaka, ku onhaka loku chavisaka. 11Loko munhu a ri kona la fambelaka swahava, u xisa, a ku: “Ndzi ta ku bvumbhela vhinyo ni byalwa!” Muprofeta loyi a nga va yena la lulamelaka tiko leri.
12Ndzi ta ku hlengeleta ni lava seleke Vaisraele; ndzi va veka kun'we kukotisa tinyimpfu etshangeni, ni ntlhambi lowu nga emadyelweni wu va mpfumawulo wa vanhu lavo tala. 13Muboxi wa ndlela u ta rhanga emahlweni; va ta boxa, va nghena hi nyangwa, va tlhela va huma hi yona; hosi ya vona yi ta rhanga emahlweni, yena Yehovha a va rhangela.
Currently Selected:
MIKIYA 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.