LUKA 2
2
Ta ku velekiwa ka Yesu.
1Emikarhini yoleyo, ku humelela nawu wa hosi Khezari Awugusto, leswaku matiko hinkwawo ma tsariwa. 2Ku tsala loko rhanga loku, ku endliwile enkarhini lowu Kwirino a fumaka Siriya. 3Kutani vanhu hinkwavo va ya tsariwa, un'wana ni un'wana emutini wa yena. 4Yosefa na yena a suka eGaleliya emutini wa Nazareta, ku ya eYudiya emutini wa Davhida, lowu vuriwaka Betlehema, hikuva a a ri munhu wa yindlu ya Davhida ni wa rixaka ra yena; 5a ya tsariwa na Mariya loyi a n'wi languteleke, loyi ngi a ri ni khwiri. 6Kakuloko va ha ri kona, masiku ya ku tika ka yena ma hela. 7Kutani a veleka n'wana wa yena wa mativula, wa wandzisanyana; a n'wi phutsela hi nguvu, a n'wi lata exidyelweni, hikuva a va nga ri na byetlelo endlwini ya vaendzi.
8A ku ri ni varisi etikweni rero, va etlele enhoveni, va risa mitlhambi ya vona nivusiku. 9Kutani, hi nomu lowu, ntsumi ya Hosi yi humelela eka vona, ku vonakala ka Hosi ku va rhendzela, kutani va chava hi ku chava lokukulu. 10Ntsumi yi ku eka vona: “Mi nga chavi, vonani, ndzi mi byela ku tsaka lokukulu, loku nga ta va eka tiko hinkwaro; 11hileswaku namuntlha mi velekeriwile Mulondzovoti emutini wa Davhida; i Kriste Hosi. 12Xikombiso xa n'wina hi lexi: Mi ta kuma wandzisanyana la phutseriweke, loyi a latiweke exidyelweni.”
13Kutani hi nomu lowu, vunyingi bya mavandla ya le henhla byi va ni ntsumi, byi vonga Xikwembu, byi ku: 14“Ku kwetsima a ku ve eka Xikwembu ematilweni ya le henhla, ku tsaka a ku ve emisaveni eka vanhu lava khensiwaka.”
15Kuteloko tintsumi ti va siyile, ti tlhelela etilweni, varisi va byelana va ku: “A hi yeni eBetlehema, hi ya vona leswi humeleleke kona, leswi Hosi yi nga hi tivisa swona.” 16Kutani va hatlisa va ya, va ya kuma Mariya na Yosefa ni wandzisanyana la latiweke exidyelweni. 17Kuteloko va n'wi vonile, va vula hinkwako timhaka ta xihlangi leti va nga byeriwa tona. 18Kutani hinkwavo lava ti twaka, va hlamala hi timhaka leti vuriwaka hi varisi. 19Kambe Mariya a hlayisa timhaka leti hinkwato, a ti hlayisa embilwini ya yena. 20Kutani varisi va tlhela, va ri karhi va dzunisa Xikwembu. Va xi twarisa hikwalaho ka hinkwaswo leswi va swi voneke, ni leswi va swi tweke hilaha va nga byeriwa hakona.
Ta Yesu loko a yisiwa etempeleni.
21Masiku ya ntlhanu na manharhu ya ku yimbisa n'wana loko ma herile, va n'wi thya vito ra Yesu, hilaha ntsumi yi nga n'wi thya hakona, mana wa yena a nga si kuma khwiri. 22Kuteloko ku hundzile masiku lawa Mariya a nga hlamba ha wona hi nawu wa Muxe, va yisa n'wana eYerusalema, ku ya n'wi kombisa eka Hosi, 23hilaha ku nga tsariwa enawini wa Hosi leswaku: “N'wana un'wana ni un'wana wa wanuna, wa mativula, u ta hlawuleriwa Hosi”; 24va ya humesa mhamba leyi lerisiweke hi nawu wa Hosi: “ma nga matuva mambirhi, kumbe mavondlo mambirhi ya matuva.”
Ku dzunisa ka Simiyoni na Ana.
25EYerusalema, a ku ri ni munhu la vuriwaka Simiyoni. Munhu loyi a a lulamile, a chava Xikwembu, a langutele ku chaveleriwa ka Israele. Moya lowo Kwetsima a wu ri eka yena. 26A a kombisiwile khale hi Moya lowo Kwetsima leswaku a nga ka a nga fi a nga si vona Kriste wa Hosi; 27kutani a yisiwa etempeleni hi moya lowo kwetsima. Kuteloko Yesu n'wana a tisiwa hi vakulu va yena, ku ta endla ha yena hi ku lerisa ka nawu, 28Simiyoni a n'wi amukela emavokweni ya yena, a vonga Xikwembu, a ku: 29“Sweswi, Hosi, u tshika nandza wa wena a famba hi ku tsaka, hilaha u nga vula hakona, 30hikuva mahlo ya mina ma vonile ku hlayiseka ka wena, 31loku u ku lunghiseke emahlweni ka matiko hinkwawo, 32leswaku ku ve ku vonakala loku nga ta voninga matiko, ni ku kwetsima ka Israele, tiko ra wena.”
33Kutani Yosefa ni mana wa n'wana va hlamala hi timhaka leti a vuriwaka ha tona. 34Kutani Simiyoni a va katekisa, a ku eka Mariya, mana wa n'wana: “Vona, n'wana loyi, u vekeriwile ku khunguvanyeka ni ku pfuka ka lavo tala eIsraeleni, ni ku va xikombiso lexi nga ta landzuriwa; 35miehleketo ya timbilu leto tala yi ta humelela erivaleni.”
36Kambe a ku ri na Ana, muprofeta wa wansati, n'wana Fanuwele, wa rixaka ra Asere, a a dyuhele ngopfu. Loko a tekiwile a ri wanhwana, u tshame ni nuna wa yena ntlhanu wa malembe na malembe mambirhi ntsena, 37a yi ri noni ya malembe ya ntlhanu wa makume na makume manharhu na mune. A a nga suki etempeleni, kambe a tirhela Xikwembu hi ku titsona swakudya, ni ku khongela vusiku ni nhlekanhi. 38Na yena a humelela enkarhini wolowo, a khensa Hosi, a vula timhaka ta Yesu eka hinkwavo lava languteleke ku kutsuriwa ka Israele, emutini wa Yerusalema.
39Kuteloko va hetile hinkwaswo leswi lerisiweke hi nawu wa Hosi, va tlhelela eGaleliya, va ya eNazareta, emutini wa vona. 40Loko a ri n'wana, a kula, a tiya matimba emoyeni, a tala vutlhari; ni tintswalo ta Xikwembu ti tshama eka yena.
Ta Yesu loko a sala etempeleni.
41Vakulu va yena a va ya eYerusalema, hi malembe hinkwawo enkhubyeni wa Paseka. 42Kutani loko a kurile, a ri ni malembe ya khume na mambirhi, va tlhandlukela eYerusalema, hi mukhuva wa nkhuvo. 43Masiku ya nkhuvo, kuteloko ma herile, va tlhelela ekarikwavo; Yesu n'wana a sala eYerusalema, vatswari va yena va nga swi tivi. 44Kambe va anakanya leswaku u le xikarhi ka lava fambaka na vona; va famba siku rin'we, kutani va n'wi lava exikarhi ka maxaka ya vona, ni le xikarhi ka lava tivanaka na vona. 45Kambe, loko va nga n'wi voni, va tlhelela eYerusalema, va ri karhi va n'wi lava. 46Endzhaku ka masiku manharhu, va n'wi kuma etempeleni, a tshamisile exikarhi ka vafundhisi, a va yingisela, ni ku va vutisa swivutiso; 47kutani hinkwavo lava n'wi yingiseke va hlamala hi ku tlhariha ka yena, ni ku hlamula ka yena. 48Kakuloko va n'wi vona, va hlamala ngopfu. Mana wa yena a ku eka yena: “N'wananga, u hi endlele yini leswo tano waswivo, a hi ku lava, tata wa wena na mina, hi ri ekhombyeni ngopfu?” 49Yena a ku eka vona: “A mi ndzi lavela yini? Xana a mi nga swi tivi leswaku ndzi fanele ku va entirhweni wa Tatana xana?” 50Kambe a va twisisanga mhaka leyi a yi vulaka. 51Kutani a ngirimela na vona, a ya eNazareta, a tshama a va yingisa. Kutani mana wa yena a hlayisa timhaka leti hinkwato embilwini ya yena. 52Loko a ri Yesu, a kula eku tlhariheni, ni le ku leheni, ni le tintswalweni, emahlweni ka Xikwembu ni vanhu.
Currently Selected:
LUKA 2: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.