GENESA 48
48
Ta loko vana va Yosefa va hlayiwa exikarhi ka vana va Yakobo.
1Endzhaku ka timhaka teto, va ku eka Yosefa: “Waswivo, tata wa wena wa vabya.” Kavaloko a teka vana va yena vambirhi, Manase na Efrayimi. 2Kutani va tivisa Yakobo, va ku: “N'wana wa wena, Yosefa, hi loyi, wa ta eka wena.” Kutani Israele a sisimuka, a tshamisa emasangwini. 3Yakobo a ku eka Yosefa: “Xikwembu xa matimba hinkwawo xi tshama xi tikomba eka mina eLuzi, etikweni ra Kanana, xi ndzi katekisa, 4xi ku eka mina: ‘Waswivo, ndzi ta ku andzisa ndzi ku tata, ndzi ku endla vunyingi bya matiko, ndzi ku nyika tiko leri, ni vatukulu va wena, endzhaku ka wena, yi ta va ndzhaka leyi nga heriki.’
5“Kutani sweswi, vana va wena lavambirhi, lava u va velekeke etikweni ra Egipta, ndzi nga si ta eka wena etikweni ra Egipta, va ta va va mina: Efrayimi na Manase va ta va va mina kukotisa Rhuveni na Simiyoni. 6Kambe vana va wena lava u nga va veleka endzhaku ka vona, va ta va va wena; va ta hlayiwa hi mavito ya vamakwavo. 7Kuteloko ndzi ri karhi ndzi huma ePadani, ndzi fela hi Rahele, etikweni ra Kanana, endleleni, mpfhuka wu nga ri wungani ku fika eEfrata; ndzi n'wi lahla kona, endleleni leyi yaka eEfrata.” (Wu nge Betlehema).
8Kakuloko Israele a vona vana vambirhi va Yosefa, a ku: “Valavo i va mani xana?”
9Yosefa a hlamula a ku eka tata wa yena: “I vana va mina, valavo Xikwembu xi ndzi nyikeke vona kwala.”
Yakobo a ku eka yena: “Wa nga va neha eka mina, ndzi va katekisa.” 10Kambe mahlo ya Israele a ma kunguhele hi ku dyuhala, a tsandzeka ku vona. Yosefa a va tshineta, yena a va ntswontswa, a va singarhela. 11Kutani Israele a ku eka Yosefa: “A ndzi nga ehleketanga leswaku ndzi ta vona mombo wa wena, kasi hilaha Xikwembu xi vuyeke xi ndzi langutisisa ni vana va wena.” 12Kutani Yosefa a va susa emarumbini ya tata wa yena, a khinsama ehansi.
13Yosefa a tlhela a va teka havambirhi, a veka Efrayimi evokweni ra yena ra xinene, a kongomana ni voko ra ximatsi ra Israele; Manase yena, a a ri evokweni ra ximatsi, a kongomana ni voko ra xinene ra Israele, a va tshinetela eka yena. 14Kambe Israele a tshambulutela voko ra xinene a ri veka enhlokweni ya Efrayimi (kasi a a ri wandzisana), kutani voko ra ximatsi a ri tlhandleka enhlokweni ya Manase, a hambanyisa mavoko ha vomu, kasi Manase a a ri lowa hosi. 15Kavaloko a katekisa Yosefa, a ku: “Xikwembu lexi vakokwana, Abrahama na Isaka, va fambeke emahlweni ka xona, Xikwembu lexi nga ndzi risa mpfhuka ndzi velekiwa ku fikela sweswi, 16ni ntsumi leyi nga ndzi lamula eku biheni hinkwako, a xi katekise varisanyana lavo; a va thyiwe vito ra mina, ni mavito ya vakokwana Abrahama na Isaka, va andza ngopfungopfu laha emisaveni.”
17Kambe, kuteloko Yosefa a vona leswaku tata wa yena a tlhandleke voko ra yena lera xinene enhlokweni ya Efrayimi, mhaka leyi, yi n'wi vavisa; kutani a tlakusa voko ra tata wa yena a ri susa enhlokweni ya Efrayimi, a tlhandlekisa enhlokweni ya Manase; 18Yosefa a ku eka tata wa yena: “U nga endlisi sweswo tatana, hikuva loyi hi lonkulu; tlhandleka voko ra wena ra xinene enhlokweni ya yena.”
19Kambe tata wa yena a ala, a ku: “Ndza swi tiva, n'wananga, ndza swi tiva; na yena u ta va tiko, na yena, u ta va nkulukumba, hambi swi ri sweswo, ndzisana u ta va lonkulu eka yena, ni vatukulu va yena va ta endla vunyingi bya matiko.”
20A va katekisa sweswo hi siku lero, a ku: “Vaisraele a va vule ku kateka ha wena, va ku: ‘Xikwembu a xi ku endle kukotisa Efrayimi ni kukotisa Manase.’ ” Hi mukhuva wolowo, a veka Efrayimi emahlweni ka Manase.
21Kutani Israele a ku eka Yosefa: “Waswivo, ndza fa; kambe Xikwembu xi ta va na n'wina, xi ta mi tlherisela etikweni ra vakokwa wa n'wina. 22Kutani mina ndzi ku nyika ku avela kun'wana ehandle ka vamakwenu, swi nga leswi ndzi swi kumeke eka Vaamori hi tlhari ra mina ni vurha bya mina.”
Currently Selected:
GENESA 48: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.