EZRA 10
10
Ta ku hlongola vavasati va matiko.
1Ezra a ku a ha khongela, a tivula, a ri karhi a rila, a khinsamile emahlweni ka yindlu ya Xikwembu, ku hlengeletana eka yena nhlengeleto leyikulu ngopfu, ya Vaisraele, vavanuna, ni vavasati, ni vana; kambe tiko ri rila hi ku vaviseka lokukulu. 2Kutani Xekaniya, n'wana Yehiele, wa vana va Elamu, a vulavula, a ku eka Ezra: “Hi dyohele Xikwembu xa hina hi ku teka vasati vambe va matiko lawa; hambiswiritano ku tshemba ka ha ri kona eka Vaisraele, emhakeni yoleyo. 3Sweswi, a hi endleni ntwanano na Xikwembu xa hina ku tlherisa vasati valavo hinkwavo, ni vana lava velekiweke hi vona, hi laha hosi yanga yi vulaka hakona, ni lava rhurhumerisiwaka hi milawu ya Xikwembu xa hina; kutani a ku endliwe hi milawu. 4Yima, hikuva mhaka leyi yi na wena, hi ta ku yimela, tiyisa mbilu, u tirha.”
5Kavaloko Ezra a yima a hlambanyisa tihosana ta vaprista, ni ta Valevhi, ni ta Vaisraele, hinkwavo leswaku va endla hi marito walawo kutani va hlambanya. 6Ezra a suka emahlweni ka yindlu ya Xikwembu a nghena ekamareni ya Yohanani, n'wana Eliyaxibi, kuteloko a nghenile kona, a nga dyi vuswa, a nga nwi mati, hikuva a a vavisekile hi ku tiarisa ka lava nga tlhela eku bohiweni.
7Kutani va tivisa hinkwavo lava tlheleke eku bohiweni etikweni ra Yuda na Yerusalema, va ku: 8“Hlengeletanani eYerusalema, kutani mani na mani la nga tiki hi masiku manharhu hi ku vula ka tihosana ni vakulukumba, swilo hinkwaswo swa yena swi ta dyiwa, yena a humesiwa enhlengeletanweni ya lava tlheleke eku bohiweni.” 9Kutani vanhu hinkwavo va Yuda, ni va Yerusalema, ni va Benjamini, va hlengeletana eYerusalema hi masiku manharhu; yi nga n'hweti ya ntlhanu na mune, hi siku ra makume mambirhi ra n'hweti. Tiko hinkwaro ri ta tshamisa erivaleni, emahlweni ka yindlu ya Xikwembu, va ri karhi va rhurhumela hikwalaho ka mhaka leyi nga kona, ni hikwalaho ka timpfula. 10Kutani muprista Ezra a yima a ku eka vona: “Mi dyohile hi ku teka vasati vambe, mi engeterile hakona, milandzu ya Israele. 11Sweswi, dzunisani Yehovha Xikwembu xa vatata wa n'wina, mi endla hi ku rhandza ka yena mi tihlawula eka vamatiko ya misava, ni le ka vavasati vambe.” 12Kutani nhlengeletano hinkwayo yi hlamula hi marito lama tlakukeke, va ku: “E, hi fanele ku endla swoleswo hilaha u vulaka hakona. 13Kambe tiko ri kurile, kutani hi nkarhi wa timpfula letikulu, a ku na laha hi nga yimaka kona ehandle, kambe a hi ntirho wa siku rin'we, kumbe wa masiku mambirhi, hikuva hi tele ngopfu, lava hi dyoheke emhakeni yoleyo. 14A ku yime tihosana ta hina ematshan'weni ya nhlengeletano hinkwayo, kutani hinkwavo lava tekeke vasati vambe emitini ya vona, va ta ta hi nkarhi lowu nga ta vekiwa, va ri ni vakulukumba va muti wun'wana ni wun'wana, ni vaavanyisi va vona, mahlundzu ya vukari bya Xikwembu xa hina ma ko ma suka ehenhla ka hina hikwalaho ka mhaka leyi.”
15Kambe Yonatani, n'wana Asahele na Yahaziya, n'wana Tikivha, va ala, va yimeriwa hi Mexulama na Xabetayi, Valevhi. 16Loko va ri lava tlheleke eku bohiweni, vona va endlisa sweswo, va veka muprista Ezra, ni vavanuna van'wana, lava va nga tihosana ta tindlu ta vatata wa vona, va hlawuriwa hi tindlu ta vatata wa vona, hinkwavo va vuriwa hi mavito ya vona, va ta swin'we, hi siku ro sungula ra n'hweti ya vukhume, ku ta lavisisa mhaka yoleyo. 17Hi siku ro sungula ra n'hweti yo rhanga, va hetisa timhaka ta vavanuna lava tekeke vasati vambe.
18Ku kumiwa vana van'wana va vaprista lava tekeke vavasati valavo; eka vana va Yexuwa, n'wana Yosadaka, ni ka vana va vamakwavo, Maaseya, Eliezere, Yaribi, Gedaliya; 19vona va tlakusa mavoko, va tiboha, leswaku va ta tlherisa vasati va vona, hikuva a va ri ni nandzu; va tlhavela milandzu ya vona magandzelo ya khuna lerintshwa. 20Eka vana va Imere, Hanani, na Zebadiya; 21eka vana va Harimi, Maaseya, Eliya, Xemaya, Yehiele, Uziya; 22eka vana va Paxahuru, Eli-Howenayi, Maaseya, Iximaele, Netanele, Yozabadi, Eliyasa.
23Eka vana va Levhi: Yozabadi, Ximeyi, Kelaya (a nga Kelita), Petahiya, Yuda, Eliezere.
24Exikarhi; ka vayimbeleri: Eliyaxibi; eka valanguteri va tinyangwa: Xalumi, na Teleme, na Uri.
25Loko va ri va Israele, eka vana va Paroxi: Ramiya, Yiziya, Malikiya, Miyamini, Eliyazara, Malikiya, Benaya. 26Eka vana va Elamu: Mataniya, Zakariya, Yehiele, Abidi, Yeremoto, Eliya. 27Eka vana va Zatu: Eli-Howenayi, Eliyaxibi, Mataniya, Yeremoto, Zabada, Aziza. 28Eka vana va Bebayi: Yohanani, Hananiya, Zabayi, Atalayi. 29Eka vana va Bani: Mexulama, Maluka, Adaya, Yaxubu, Xeyala, Yeremoto. 30Eka vana va Pahata-Mowabu: Adina, Kelala, Benaya, Maaseya, Mataniya, Besalele, Binuyi, Manase. 31Eka vana va Harimi: Eliezere, Yixiya, Malikiya, Xemaya, Ximeyoni, 32Benjamini, Maluka, Xemariya. 33Eka vana va Haxumu: Matenayi, Matata, Zabada, Elifelete, Yeremayi, Manase, Ximeyi. 34Eka vana va Bani; Maadayi, Amirama, Uwele, 35Benaya, Bedeya, Keluhi, 36Vhaniya, Meremoto, Eliyaxibi, 37Mataniya, Matenayi, Yaasu, 38Bani, Binuyi, Ximeyi, 39Xelemiya, Natani, Adaya, 40Makina-Debayi, Xaxayi, Xarayi, 41Asarele, Xelemiya, Xemariya, 42Xalumi, Amariya, Yosefa. 43Eka vana va Nebo: Yeyiele, Matitiya, Zabada, Zebina, Yadayi, Yuwele, Benaya. 44Valavo hinkwavo, a va tekile vasati vambe, van'wana eka vona a va velekeriwe vana hi vasati valavo.
Currently Selected:
EZRA 10: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.