VAEFESA 6
6
Ku hanya ka vatswari ni vana.
1Vana, yingisani vatswari va n'wina eHosini, hikuva swi lulamile sweswo. 2“U va ni xichavo eka tata wa wena,” ni mana wa wena (hi wona nawu lowo rhanga lowu nga ni ku tshembisa), 3 “leswaku u va ni ku kateka, u va u hanya ngopfu emisaveni leyi.” 4Na n'wina vatatana, mi nga tshuki mi dyisa vana va n'wina mbitsi, kambe va kuriseni eku layeni ni le ku dyondziseni ka Hosi.
Ku hanya ka malandza ni vini.
5N'wina malandza, yingisani vini va n'wina enyameni hi xichavo, ni ku rhurhumela, timbilu ta n'wina ti basile, kukotisa loko mi yingisa Kriste, 6mi nga va tirheli ntsena loko va mi langutile, leswo ngi mi rhandza ku tsakisa vanhu, kambe mi va tanihi malandza ya Kriste, mi endla ku rhandza ka Xikwembu hi mbilu, 7mi va tirhela hi rirhandzu, kukotisa Hosi, va nga ri vanhu, 8hi ku tiva leswaku un'wana ni un'wana, hambi a ri la fuyiweke, hambi a ri la nga fuyiwangiki, u ta nyikiwa hi Hosi hi mpimo wa leswo saseka leswi a swi endleke.
9Na n'wina vini, endlisani sweswo eka vona, mi tshika ku va phika, mi ri karhi mi tiva leswaku Hosi ya vona ni ya n'wina yi kona ematilweni, ni leswaku ku ya hi nghohe ku hava eka yona.
Mahavelo ya Moya.
10Loko swi ri tano, tiyani eHosini ni le matimbeni ya yona lama nga tsandziwiki ha nchumu. 11Hakarhani matlhari hinkwawo ya Xikwembu, leswaku mi ta tiva ku hlula miringo ya Diyavulosi. 12Hikuva eku lweni ka hina, a hi lwi na nyama na ngati, kambe hi lwa ni vafumi, ni leswa matimba, ni tihosi hinkwato ta munyama, ni mimoya leyo biha ya swivandla swa le henhla. 13Hikwalaho-ke hlomani matlhari hinkwawo ya Xikwembu, mi ta tiva ku tiya hi siku ra khombo, ni ku yima mi hlurile hinkwaswo. 14Tiyani hikwalaho, mi ri karhi mi titsimbile swifungha hi vamba ra ntiyiso, mi ambele exifuveni xisirhelelo xa leswo lulama; 15emilengeni ya n'wina mi havaxela ku hiseka loku nyikiwaka hi Evhangeli ya ku rhula; 16ehenhla ka leswo hinkwaswo, mi tamela xitlhangu xa vupfumeri, lexi mi nga ta tiva ku timela ha xona miseve hinkwayo leyi pfurhaka ya nyavuntswaka. 17Rhwalani xihuku xa ku hlayiseka, mi va mi tamela fumu ra Moya, ri nga Rito ra Xikwembu; 18mi khongela hi Moya hi mikarhi hi mikhongelo hinkwayo ni ku chivirikela kona, mi hanyanya kona hi ku tiyisela hinkwako, mi ri karhi mi khongelela vakwetsimi hinkwavo. 19Na mina, mi ndzi khongelela, leswaku ndzi nyikiwa ku vulavula erivaleni, ndzi ta tiva ku hlavutela vanhu ndzi nga chavi nchumu xihundla xa Evhangeli, 20leyi ndzi nga ntsumi ya yona, hambi ndzi bohiwile hi timpecana, leswaku ndzi vulavula hi matimba timhaka ta yona, hilaha ndzi fanelaka ku ti vula hakona.
Marito ya ku hetelela.
21Kambe, leswaku na n'wina mi tiva ku hanya ka mina, ni leswi ndzi swi endlaka, Tixiko, makwerhu la rhandziwaka, ni nandza la tshembekeke wa Hosi, u ta mi tivisa hinkwaswo. 22Hikwalaho ndzi n'wi rhumeke ka n'wina, a ta mi tivisa ta ku hanya ka hina, a ta chavelela ni timbilu ta n'wina.
23Ku rhula ni rirhandzu, swin'we ni ku pfumela, a swi ve ni vamakwerhu, swi huma eka Xikwembu Tatana, ni ka Hosi Yesu Kriste.
24Tintswalo a ti ve ni hinkwavo lava rhandzaka Hosi ya hina, Yesu Kriste, hi rirhandzu leri nga onhakiki.
Currently Selected:
VAEFESA 6: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.