Ingoma Yetingoma 8
8
1Kube mane bewungumnaketfu lowamunya bele linye nami kumake!
Lapho-ke kube bengingakukhandza ungaphandle,
bengitawuvele ngikucabuze,
bekuyawubate ngisho namunye labeyakungedzelela.
2 Bengitakuhola ngikumikise endlini ketfu,
lapho bewutangifundzisa khona.
Bengiyakukunika liwayini
lelivangiwe kutsi ulinatse,
emanti lamnandzi emahananandza ami.
3 Umkhono wakhe wangesancele
ungumcamelo wenhloko yami,
nemkhono wakhe wangesekudla uyangigona.
Umyeni:
4 Ngiyaniyala, madvodzakati aseJerusalema, ngitsi:
Ningaluvusi lutsandvo,
futsi ningalunyakatisi,
luze lutivukele lona.
Ingoma yesitfupha
Bangani:
5Ngubani lona lochamuka ehlane
eyeme kulamtsandzako?
Umyeni:
Ngakuvusa ngaphansi kwesihlahla semahhabhula;
ngulapho-ke lapho unyoko akwemitsela khona,
ngulapho-ke lona labephetfwe ngumhelo,
akubelekela khona.
6Ngibeke njengeluphawu etikwenhlitiyo yakho,
yebo, njengeluphawu emkhonweni wakho;
ngobe lutsandvo lunemandla njengekufa,
sikhwele salo asitfobiseki, sinjengelithuna.
Lushisa njengemlilo lovutsako,
yebo, njengelilangabi lelinemandla.
7Emanti lamanyenti ngeke alucime lutsandvo,
nemifula ingeke ilukhukhule.
Nome ngabe umuntfu abenganikela ngawo
wonkhe umcebo wasekhaya lakhe
kuze atewutsenga lutsandvo,
loko bekuyawuba yinhlekisa yodvwa nje.
Bangani:
8Sinadzadzewetfu lomncane,
usengakaphumi ngisho nemabele.
Siyakwenta njani ngalodzadzewetfu,
nangabe kukhona lofuna kumenta umkakhe?
9Nangabe yena alubondza,
etikwakhe sitakwakha imibhoshongo yesiliva;
nangabe yena asivalo,
sitamvalela ngemicabo yemisedari.
Makoti:
10Ngilubondza, emabele ami anjengemibhoshongo.
Ngako-ke emehlweni akhe
sengibe ngumuntfu loletsa kweneliseka.
11Solomoni abenensimi yemivini eBhali Hamoni;
wase ucashisa lesivini sakhe kubacashi.
Kwakufanele kube ngulowo nalowo
aletse loko lokusitselo saso,
kube tinhlavu tesiliva letiyinkhulungwane.
12Kodvwa lesi sivini sami,
ngimi lengingephana ngaso;
awu, Solomoni, letinhlavu takho letiyinkhulungwane,
kantsi tinhlavu letingema-200
talabo labanakekela titselo taso.
Umyeni:
13 Wena lohlala etingadzeni
uhlale nebangani labakusingatsile,
ngivise liphimbo lakho!
Makoti:
14 Phumela ebaleni,
wena longitsandzako,
bani njengemgankla,
nome-ke njengelizinyane lenyamatane,
etintsabeni letigcwele emakha.
Currently Selected:
Ingoma Yetingoma 8: SWT
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.