Tihlabelelo 9
9
Akabongwe Nkulunkulu Sokulunga
Sihlabelelo saDavide lesetfulwe kumhlabelisi kutsi sihlatjelwe ngendlela letsi: “Kufa kwendvodzana.”
1 Simakadze, ngiyawukubonga
ngenhlitiyo yami yonkhe,
ngilandze ngayo yonkhe
imisebenti yakho lemangalisako.
2Ngiyawujabula ngitfokote kuwe
ngidvumise libito lakho,
wena Losetikwako Konkhe.
3Nakuchamuka wena,
titsa tami tiyancandzeka;
nawutibuka, tiyawa, tiphele.
4Ngobe wena ulimele
lilungelo lami nendzaba yami;
uhleti esihlalweni sakho sekwehlulela
wakhipha sigwebo lesilungile.
5Emahedeni uwatsetsisile,
lababi wababhubhisa,
wesula libito labo phakadze naphakadze.
6Sitsa sibhujiswe phakadze naphakadze,
emadolobha aso uwabhidlitile,
angeke asaphushwa nakuphushwa.
7Kodvwa Simakadze uhleti
esihlalweni sakhe sebukhosi baphakadze;
lesihlalo sakhe sebukhosi
usimisele kwehlulela.
8 Yena uyawukwehlulela umhlaba ngekulunga,
nguye futsi loyakwehlulela tive,
yebo, uyawutehlulela ngebucotfo, angakhetsi.
9 Simakadze usiphephelo
sebantfu labacindzetelwe.
Uyinqaba ngetikhatsi tekweswela.
10Labati libito lakho
bayawukwetsembela kuwe,
ngobe wena, Simakadze,
awubafulatseli labakufunako.
11 Dvumisani Simakadze lohlala eSiyoni!
Tjelani tive ngetento takhe!
12 Yena ungumenaneli kulabacitsa ingati,
uyabakhumbula labahluphekile,
akakukhohlwa kukhala
kwalabasenhluphekweni.
13 Ngihawukele, Simakadze!
Bona kuhlupheka kwami
lengikubangelwe titsa tami.
Nguwe longephula emasangweni ekufa,
14kuze ngilandze ngalo lonkhe ludvumo lwakho
emasangweni elidolobha laseSiyoni
ngijabulele kungikhulula kwakho.
15 Emahedeni asahholokoshele
emgodzini labewumbile;
asabanjwe elugibeni lolwetsiywe ngawo.
16 Simakadze sewutibonakalisile,
wakhipha sigwebo sakhe,
lababi babanjwa
ngumsebenti wetandla tabo. Cabanga.
17Lababi baya ekufeni,
yebo, bonkhe labafulatsela Nkulunkulu.
18 Kodvwa labandzindzako
bangeke bakhohlakale phakadze naphakadze;
litsemba lalabahluphekako
lingeke linyamalale siphelane.
19Vuka, Simakadze!
Ungavumi kutsi umuntfu akwedzelele,
betive abehlulelwe embikwakho!
20 Bente bakwesabe, Simakadze,
kuze bati kutsi babantfu nje. Cabanga.
Currently Selected:
Tihlabelelo 9: SWT
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.
