Tihlabelelo 62
62
NguNkulunkulu kuphela losiphephelo setfu
Sihlabelelo saDavide lesetfulwe kumhlabelisi kutsi sihlatjelwe ngendlela yaJeduthuni.
1Umphefumulo wami utithulele
kuNkulunkulu kuphela,
insindziso yami ivela kuye.
2 Nguye yedvwa lolidvwala lami,
nensindziso yami, nenqaba yami,
ngingeke ngishukunyiswe.
3Kuyawuze kube ngunini nidvumela lendvodza
nine nonkhe kuze niyibulale?
Injengelubondza lolutjekele kuwa,
nanjengelutsango loludzilikako.
4Bafuna licebo lekumketula
esikhundleni sakhe lesiphakeme,
batsandza emanga.
Ngemilomo yabo bayabusisa,
kodvwa etinhlitiyweni tabo bayacalekisa. Cabanga.
5Mphefumulo wami,
thula kuNkulunkulu,
ngobe litsemba lami livela kuye.
6 Nguye yedvwa lolidvwala lami,
nensindziso yami, nenqaba yami,
ngingeke ngitanyatanyiswe.
7Insindziso yami neludvumo lwami
kusetandleni taNkulunkulu.
Nkulunkulu usiphephelo sami
nelidvwala lami lelicinile.
8Nine sive, yetsembelani kuye
ngato tonkhe tikhatsi,
tfululelani kuye tinhlitiyo tenu,
Nkulunkulu usiphephelo setfu. Cabanga.
9 Bantfukatana bafanana nemoya nje,
tikhulu nato tilite lelite.
Nome bafakwa esikalini kanyekanye,
balula kunemoya.
10 Ungalibeki litsemba lakho ebudloveni,
ningatilulati ngematsemba lalite nekugcekeza,
nome ngabe ingcebo iyandza,
ningatibeki tinhlitiyo tenu kuyo.
11Nkulunkulu ukhulume kanye,
ngeva kwaba kubili:
kutsi emandla ngakho, Nkulunkulu,
12 nekutsi umusa wakho, Simakadze.
Ngobe wena umuntfu umnika umvuzo
njengekwemisebenti yakhe.
Currently Selected:
Tihlabelelo 62: SWT
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.
