Tihlabelelo 56
56
Umthandazo wemuntfu lowetsembele kuNkulunkulu
Sihlabelelo saDavide lesiyimiktamu leligugu kuye; setfulwe kumhlabelisi kutsi sihlatjelwe ngendlela letsi: “Lituba lisesihlahleni lesikhashane.” Wasihlabela aseGathi ngesikhatsi emaFilisti ambambile.
1 Ngihawukele, Nkulunkulu,
ngobe bantfu bayangigcobagcoba;
onkhe emalanga
labamelene nami bayangihlasela.
2 Titsa tami tingigcobagcoba onkhe emalanga,
ngobe labanyenti balwa nami ngekutigabatisa.
3Mhlazana ngifikelwa kwesaba
ngiyawubeka litsemba lami kuwe.
4 Ngiyawudvumisa livi laNkulunkulu
ngekusitwa nguNkulunkulu,
ngetsembele kuNkulunkulu
angesabi lutfo.
Pho, umuntfu angangentani nje?
5Bahlanekela inkhulumo yami
onkhe emalanga,
bakha onkhe emacebo lamabi ngami.
6Bayabutsana bangilalele emasitseleni,
tinyatselo tami baticaphele
njengobe bashophene nekuphila kwami.
7 Bayawuphunyula yini ebubini babo?
Dzilita tive ngelulaka lwakho, Nkulunkulu.
8 Wena ukucaphele kubaleka kwami,
yetsa tinyembeti tami egabheni lakho,
atikabhalwa yini encwadzini yakho?
9Ngako titsa tami tiyawuncandzeka
ngalelo langa lengiyawukhala ngalo kuwe,
ngati kahle kamhlophe
kutsi Nkulunkulu ungakimi.
10Ngidvumisa livi laNkulunkulu,
ngidvumise livi laSimakadze.
11 Ngetsembele kuNkulunkulu, angesabi lutfo.
Pho, umuntfu angangentani nje?
12 Hhawu, Nkulunkulu,
ngibopheleke kuwe ngetetsembiso tami.
Ngiyawunikela kuwe iminikelo yekubonga.
13 Ngobe ungephulile ekufeni,
wavikela tinyawo tami kutsi tingawi,
kuze ngihambe embikwaNkulunkulu,
ngisekukhanyeni kwekuphila.
Currently Selected:
Tihlabelelo 56: SWT
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.
