Tihlabelelo 54
54
Umthandazo wekucela kuvikelwa etitseni
Sihlabelelo lesiyimaskili yaDavide; setfulwe kumhlabelisi kutsi sihlatjelwe ngehabhu. Wasihlabela mhlazana emaZifu aye kuSawula afike atsi: “Utsi uyati nje kutsi Davide ubhace la emkhatsini wetfu?”
1 Nkulunkulu,
ngisindzise ngelibito lakho,
ngemandla akho
ngente ngingabi nacala.
2Nkulunkulu, beka indlebe yakho
emthandazweni wami,
wemukele loko lengikushoko.
3 Bafokati bangivukele, bayangihlasela,
tidlova letinelunya tifuna kungibulala,
atinendzaba naNkulunkulu. Cabanga.
4Ngempela,
Nkulunkulu ungumsiti wami,
Simakadze ungumvikeli wemphilo yami.
5Uyawungenanela
etitseni tami letenta lokubi,
ticitse ngekwetsembeka kwakho.
6Ngiyawunikela kuwe, Simakadze,
umnikelo wesihle,
ngidvumise libito lakho
ngobe lona lihle.
7 Ngobe wena ungikhululile
kuyo yonkhe inhlupheko yami;
titsa tami ngitibuke ngeliso lekuncoba.
Currently Selected:
Tihlabelelo 54: SWT
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.
