Hebrews 1
1
ꞋAndit ꞌudekꞌez dzin whe Yakꞌusda duYeꞌ ꞌen be nebulh yaílhduk
1Lhat-un ꞌinkꞌez lhelhtsꞌun unꞌa, niz haóodanzut, Yakꞌusda be nus hooꞌenne, ꞌenne bube netsodaꞌne bubulh yaílhduk. 2ꞋEt njan ꞌandit ꞌudekꞌez dzin whe Yakꞌusda duYeꞌ ꞌen be nebulh yaílhduk. ꞋEn ooBá yutꞌi-i, ꞌi tsꞌiyawh oochꞌeꞌ yutileh, ꞌet whuz unꞌa ooBá yutlꞌa hónꞌai. OoYeꞌ ꞌen be ꞌuja tsꞌiyaitsuk ꞌuhóonla. 3ꞋEn za ꞌuntꞌoh ooBá ye diztiꞌ-i, ꞌi whunénulhtun. ꞋInkꞌez ooBá dantꞌoh la, ꞌet ooYeꞌ ꞌen soo tsꞌihꞌun yundultꞌoh. ꞋUhóonla-un, ooghuni ulhtus-i be yalhduk-un, ꞌi be ndulcho hoontun. ꞋEn za ꞌuja, nelubeshi ꞌi tsꞌiyawh neba yunaꞌalhde. ꞋEt hukwꞌelhꞌaz ꞌet yakꞌuz tsꞌe Yoodoghun ncha-un, ꞌet nailhni tsꞌe yughu nátlꞌa didaꞌ. 4ꞋEt lizasne buba nus ncha-un ꞌuntꞌoh. Ndi booziꞌ oogha ídiltsꞌut-i, ꞌi lizas bubooziꞌ ba nus diztiꞌ whé ꞌuntꞌoh. ꞋEt ꞌuhoolcho whe buba ndo ꞌuntꞌoh.
Yakꞌusda ooYeꞌ ꞌen lizasne buba ndo ꞌuntꞌoh
5Njan ndúhoontꞌoh, Yakꞌusda ꞌilhoghun lizas ꞌaw ndulhúbudinel,
“Nyun sYeꞌ ꞌintꞌoh.
ꞋInka ꞌandit dzin sYeꞌ sinliꞌ,
whuz unꞌa nyoozúszi.”
ꞋInkꞌez njan cha Yakꞌusda ꞌutni,
“ꞋEn ba ꞌuBá tisdleh
ꞌinkꞌez si sba sYeꞌ tileh.”
6ꞋInkꞌez ꞌudechoo whuzdlí-un, Yakꞌusda doo cha ndi yun kꞌut neítalhtelh whe ꞌet ndutni,
“Yakꞌusda oolizas,
ꞌenne tsꞌiyawh hitsꞌu teniꞌ noolhdzin.”
7ꞋEt dulizas bughu yalhduk whe njan ndutni,
“Oolizas nilhtsi kꞌunꞌa ꞌubinla.
ꞋEnne yuba ꞌutꞌenne ꞌuhintꞌoh
ꞌinkꞌez kwun nudúnat-i kꞌunꞌa nabulhtsi.”
8ꞋEt hoontsꞌi duYeꞌ yughu yalhduk whe ndutni,
“O Yakꞌusda whulerwe inli-un,
ꞌet ꞌi ꞌilhiz wheni ꞌuntꞌoh.
ꞋInkꞌez tsꞌihꞌun unꞌa kꞌuneꞌ whutalꞌen.
9Tsꞌihꞌun ꞌuhoontꞌoh-un za hukwꞌensiꞌ,
ꞌukꞌú nulheꞌustꞌen-i, ꞌi ootsꞌu dintni.
ꞋEt huwa O Yakꞌusda,
nYakꞌusda ndi khe ꞌilho didowh-i,
ꞌi dune be ba tsꞌodilhtiꞌ-i ꞌuntꞌoh,
ꞌi gha budzi hoontꞌiꞌ,
ꞌi ntsꞌún nditnine buba nus lhai be nyúlhtlo.”
10ꞋInkꞌez ꞌudun cha ooghuni ꞌukꞌeguz whe ꞌet ndutni,
“Moodihti nyun ꞌudechoo wheꞌ whuditꞌen ꞌet whutsꞌun, ndi yun cha ꞌinla.
Nla be yat cha ꞌuhóonla.
11ꞋI tsꞌiyawh gak whutáleh,
ꞌet hoontsꞌi nyun ꞌilhiz wheni ꞌintꞌoh.
Ndai la ꞌinla-i, ꞌi ꞌantsꞌi naih ꞌujut ꞌulhih te whuz unꞌa ꞌuwhutanelh.
12ꞋInkꞌez nahuyitsꞌuz-i, ꞌi kꞌunꞌa lhenántanlelh,
ꞌinkꞌez ꞌuyoo natidleh.
ꞋEt hoontsꞌi nyun whuz unꞌa za ꞌet ndintꞌoh.
Nye yus kꞌut ꞌaw whulátanálhuhóoꞌoh.”
13ꞋEt hoontsꞌi Yakꞌusda oolizas ꞌaw ꞌilhoghun hoontsꞌi ꞌet ndúlh budinel,
“Nchꞌaz ditníne tsꞌiyawh nke bukꞌut natalhyis-un mba butisdlelh.
ꞋOh de ꞌet whutsꞌun ꞌet duhóoja de,
nailhnih tsꞌe sughu tandalh.”
14ꞋEt ndunne lizasne, ꞌenne nudúdeh ꞌinkꞌez be ꞌustlenne ꞌuhintꞌoh. Yakꞌusda whébalhꞌaꞌ ꞌet de mbene la ndi bé uzdujis-i netsꞌu tíkulh, ꞌet huba neba neꞌutꞌenne ꞌuhintꞌoh.
Currently Selected:
Hebrews 1: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.