Hebrews 2
2
Ndi ꞌilhiz be tsꞌuhutinalh-i, whulazdootnih junih
1ꞋEt huwa Yakꞌusda ooghuni ndet whulh ꞌúzdantsꞌo-un, ꞌet soo tsꞌihꞌun unꞌa tsꞌuhotun ꞌinkꞌez nedzi yo netsꞌú hoꞌalh doo ka la ookwꞌúneꞌ tsꞌutꞌen-un whulazdootni. 2ꞋEt ꞌoh daꞌ ndai la khuni lizasne, ꞌenne Yakꞌusda ba yahalhduk, ꞌi khuni tsꞌiyawh ꞌilhiz wheni ꞌutni. ꞋInkꞌez mbene ndi khuni hidutátsꞌo hukwa lheꞌnízunne ꞌinkꞌez kꞌuyuyúsne, ꞌenne hoontsiꞌ kꞌunꞌa buba kꞌelha whuzdliꞌ. 3ꞋInkꞌez ndi whe uzdujis-un, ꞌet hooncha wheꞌ hoontꞌoh. ꞋEt tsꞌiyawh neba ꞌantsꞌi ꞌuhoontꞌoh de, ꞌet de ꞌenne bukꞌunꞌa neba kꞌelha whutaleh. Nemoodihti ndi yun kꞌut nuséya-un, ꞌet whutsꞌun ndi whézdujis-un howu yalhduk, ꞌinkꞌez ndunne mbene la whudántsꞌone, ꞌenne ndi khuni tsꞌiyawh whunehunilhtan ꞌet tsꞌihꞌun ꞌuhoontꞌoh. 4ꞋEt lhat-un hoolhtus-un huwa ꞌítꞌen-un tuneꞌhustꞌen, ꞌinkꞌez ntsꞌenꞌa la Ndoni hukwaꞌ ninzun kꞌunꞌa butlꞌa hónꞌai, whuz unꞌa mbene la nebulh yalhdukne, ꞌenne Yakꞌusda bubulh ꞌutꞌen whe whunéhunilhtan daja nehudániꞌ-un tsꞌihꞌun ꞌuhoontꞌoh.
Yakꞌusda ooYeꞌ lizasne ꞌatsulyaz buba nyo ꞌantꞌeꞌ
5ꞋEt njan howu yatsꞌulhduk ndi ꞌandit-i yun ꞌi ookwꞌuzdutáltsꞌilh huwa, neba whuz de hóoltsꞌulh, ꞌet Yakꞌusda ꞌaw lizas ꞌudedo ꞌuhootꞌeꞌ lhubudínel. 6ꞋEt hoontsꞌi ꞌudun cha ꞌukꞌehooguz-un whe ꞌet ndutni,
“Dunene di hinli wheꞌ hintꞌoh?
Yakꞌusda di ha bughu nuní ninzut?
Kꞌus dune yeꞌ di ha ooghu tanleh?
7Lizas anyo ꞌuntꞌoh silhtsi inleꞌ.
ꞋUntꞌoh-un silhtsi ꞌinkꞌez whe diztiꞌ-un,
ꞌet cha ootlꞌa hónꞌai.
Ndai nla be ꞌinla-i,
ꞌet tsꞌiyawh whe whando ꞌúntꞌoh-un ootlꞌa óoninꞌai.
8Tsꞌiyaitsuk ooke tꞌah nenínla yumoodihti ooleꞌ ha.”
ꞋInkꞌez ndi ooke tꞌah nenínla-i, ꞌaw hoonliyaz yit lheꞌínel. ꞋEt hoontsꞌi tꞌetsꞌoninzun ꞌawhuz tsꞌiyaitsuk ooke tꞌah nelhúskat.
9ꞋEt hoontsꞌi mbe la ꞌatsulyaz huba lizas anyo ꞌuntꞌoh yulhtsi-un, ꞌen uznilhꞌen. Jesus ꞌen ꞌuntꞌoh. Dzoh nusuzut whe dazsai ꞌet huwa soo ꞌuntꞌoh-un yulhtsi ꞌinkꞌez whe diztiꞌ-un, ꞌet cha yutlꞌa hónꞌai. ꞋEt whuz unꞌa Yakꞌusda ye unzoo-i, ꞌi be tsꞌiyanne buba dazsai.
Yakꞌusda ooYeꞌ ꞌen gha lhane Yakꞌusda ba ꞌudunéꞌ dudulyane huzdliꞌ
10ꞋEt Yakꞌusda ꞌen gha tsꞌiyaitsuk ꞌuhoontꞌoh, ꞌinkꞌez tsꞌiyantsuk ootsꞌu ha honkat. Lhane duduzke Jesus whe diztiꞌ-un, ꞌet butlꞌa óotiꞌalh hukwaꞌ ninzun. Jesus ꞌen whezdutijih-un neba tso nuya-un ꞌuntꞌoh. ꞋEt huwa Yakꞌusda ꞌen ooba tsꞌihꞌun ꞌuhoontꞌoh whe Jesus whe dzoh nusuzut-un, ꞌet ꞌi gha tsꞌihꞌun ꞌulya-un suliꞌ yulhtsi. 11ꞋEt mbe Yakꞌusda ooba ꞌudunéꞌ dudulti-un, ꞌinkꞌez mbene la Yakꞌusda ba ꞌudunéꞌ dudulyane cha wheni tsꞌiyawh lhgha zaꞌ ꞌutsꞌintꞌoh. ꞋEt Jesus ꞌaw hukwaya lhiloh whe sulhutsinke neúlhni. 12ꞋEt duBá uyúlhni whe njan ndutni,
“Nyooziꞌ ꞌuwhulhni-un,
ꞌi ghun sulhutsinke budutásnelh.
Yakꞌusda ooba ꞌilhunaoodulhne butoh,
mba whudutástiꞌ whe mba tisjun.”
13ꞋInkꞌez doo cha ndutni,
“Si, ootꞌa níuntistan.”
ꞋInkꞌez doo cha za ndiz unꞌa cha ndutni,
“Njan si ꞌustꞌoh.
Ndunne tsꞌoodunne Yakꞌusda sghá buninlane,
ꞌenne cha tsꞌiyawh sulh ꞌúhintꞌoh.”
14ꞋEt wheni yinka dune tsinli neyustꞌe ꞌi ꞌuskaiꞌ bulh ꞌúlya. ꞋEt huwa Jesus Christ ooyustꞌe wheni nekꞌunꞌa ꞌuntꞌoh. ꞋEt whe tulalhgus kꞌut neba dazsai-un, ꞌi be ndun yé datitsah-i ye ulhtus-i utꞌí-un, ꞌen yuchꞌaꞌ nilhde, ꞌen netsudule ꞌuntꞌoh. 15ꞋInkꞌez ndi yun kꞌut khunane, ꞌenne dzin totsuk dahútitsah whe húnuljut, ꞌet huwa netsudule dude ꞌulhnane ꞌubulhtsi, ꞌenne tsꞌiyawh Jesus Christ tulalhgus kꞌut dazsai-un, ꞌet whe whuchꞌa nabuzdla. 16ꞋInkꞌez ꞌaw Jesus Christ lizasne la titꞌelh huwa iloh whusainya, ꞌet hoontsꞌi Abraham tsꞌu haíndene, ꞌenne bula titꞌelh, ꞌet huwa whusainya. 17ꞋEt huwa dudulhutsinke kꞌunꞌa tsꞌiyantsuk whuz unꞌa dune kꞌunꞌa ꞌoolneh hubaꞌ hoontꞌoh. ꞋEnne buba lubret ꞌukꞌenus diztiꞌ-un tileh, ꞌet whe Yakꞌusda ooba bugha teꞌninzun ꞌinkꞌez ꞌaw bula dootnih ꞌaitꞌoh. ꞋEt whuz unꞌa Yakꞌusda ooba neꞌutꞌen. ꞋEt buba dazsai-un huwa lubeshi ꞌulhꞌenne Yakꞌusda buba ꞌun whutoolhdilh, ꞌet de soo cho buka naítatꞌelh. 18ꞋEt neMoodihti Jesus Christ lhat-un whe óolhdzai, ꞌet whe dzoh nusuzut. ꞋEt huwa ndunne óolhdzaine, ntsꞌenꞌa bula titꞌelh-un tꞌewhuninzun.
Currently Selected:
Hebrews 2: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.