Mark 3

Nahulyis dzin ꞌet Jesus dune oola únduda-un soo naꞌyinla

1ꞋEt Jesus Lizwif bulugliz tsꞌe naóosja. ꞋIlhoghun dune oola ꞌaw ye nulhéꞌustꞌen-un, ꞌet usda. 2ꞋEt Phariseene tube Jesus highunli nahulyis dzin tilah nyoon dune ka únli-un nayoolhyih, hukwa hikꞌé hoꞌalh-un, ꞌet hukwa highunli. 3Jesus dune oola ka únli-un ꞌulhni, “Dunadindaih ꞌinkꞌez nus ínyalh!”

4ꞋEt Jesus uboodulhkut, “Neghá whuntꞌai eh nahulyis dzin, ꞌulaꞌ tsꞌutinelh kꞌus ꞌutsꞌuduntálhda, uztilhyih kꞌus gak uztilhtselh?” ꞋAw dája lhodinel.

5Jesus tube hunílchꞌe whe butunuyúꞌen budzi dadiltsꞌun la ꞌet huwun unli. ꞋEt dune ka únli-un yulhni, “Lhtsꞌedílnih!” Nyoon dune lhtsꞌedilhni ibulh ꞌilhoghi oola kꞌunꞌa soo náꞌuja. 6ꞋEt ꞌahoh Phariseene lugliz tenáhundil ꞌinkꞌez Herod didowhne bulh highu yalhduk ntsꞌenꞌa Jesus hituzilhghelh ꞌet wheni lhahóduleh.

ꞋIlhozdílne bunghun taba húdilhtsꞌi

7ꞋEt doo cha za Jesus yugha hodulꞌehne ꞌinkꞌez Galilee bun tsꞌe náhoosdil. Galilee keyoh whutꞌenne whuz huyoonizdíl ꞌinkꞌez lhelhtsꞌiz de keyoh tsꞌe haíndilne tubulh. Judea tsꞌe haíndilne cha, 8Jerusalem whutꞌenne cha, Idumea tsꞌe haíndilne cha, Jordan koh whanyan whutꞌenne cha, ꞌinkꞌez Tyre ꞌinkꞌez Sidon whutꞌenne cha, tsꞌiyawh Jesus highe ꞌilhozdil lhat teneꞌútꞌen huyulh ꞌúdantsꞌo ꞌet huwa. 9ꞋIlhozdílne huldlai ꞌinkꞌez Jesus huyulh lhedudadulh ꞌet whuchꞌa yugha hodulꞌehne, “Tsꞌi sba lhadáhleh,” ubúlhni. 10Lhane ndudáne soo naꞌbinla ꞌinkꞌez ꞌuyoonne cha hitꞌa óonalh hukwaꞌ hutꞌen, 11ꞌinkꞌez ntsiꞌ-i nudúdeh-i buyudíndane, Jesus hitulhꞌih te, hibut nachánuldulh, ꞌinkꞌez ha húzulh whe ꞌuhutni, “Nyun Yakꞌusda ooYeꞌ inli whe ꞌintꞌoh.” 12ꞋEt Jesus khuniti be ntsiꞌ-i nudúdeh-i ubúlhni, “Khun mbe ꞌustꞌoh doohniꞌ junih!”

Whunizyáne ꞌon ꞌat nane, Jesus ꞌutahábanla

13Shus kꞌut ndo whenya whe mbene la bukaꞌ ninzun bukaꞌ daniꞌ ꞌinkꞌez hitsꞌo whúsaindil. 14Whunizyáne ꞌon ꞌat nane, ꞌutahábanla. “Sulh óohtꞌeꞌ ha ꞌutahanóhisdla,” ubúlhni, “Dune bulh yátilhduk ha nohtisꞌalh, 15ꞌinkꞌez ntsiꞌ-i nudúdeh-i dune yáhananoohyoot ꞌinkꞌez dune soo naꞌboolhꞌen-un, nohtlꞌa hóosꞌai.” 16Simon, ꞌen Jesus “Peter” naidútni. 17James ꞌinkꞌez bulhutsin John Zebedee ooyeꞌke ꞌenne Jesus Boanerges nabudátni, ndi oozíꞌ-i “Ditni Yeꞌke” ni whe ꞌutni; 18Andrew, Philip, Bartholomew, Matthew, Thomas, James Alphaeus ooyeꞌ, Thaddaeus, Simon huwu daóoditꞌowh-un, 19ꞌinkꞌez Judas cha ꞌen Jesus be náꞌoodutakulh-un. ꞋInkꞌez yoh tsꞌe whehandil.

Netsudule Jesus Christ ooyudinda hutni

20ꞋEt doo cha za ꞌilhozdilne huldlai kꞌet Jesus ꞌinkꞌez yugha hodulꞌehne bulh ꞌuhutiꞌulh, ꞌet hoontsꞌi ꞌaw ꞌuhooneh ꞌaítꞌoh. 21ꞋEt hoontsꞌi duduneꞌne huyulh ꞌúdantsꞌo whe, “Beni hoolel” hutni ꞌinkꞌez hika natisdil dudeni yit nintaꞌootꞌen whuchꞌa.

22Moses be ꞌudustlꞌus ꞌukꞌu nunáguzne, Jerusalem tsꞌu haíndilne, ꞌuhutni, “Beelzebul ooyudínda ꞌen yugha óoninꞌai huwa ꞌutꞌen ntsiꞌ-i nududeh-i bughu whenábunuyukw.”

23ꞋInka Jesus, “ꞋAnih,” hubúlhni, ꞌinkꞌez bubulh náwhulnuk higha hodoolꞌeh ha, “Ntsꞌenꞌa netsudule dichꞌoh nadudúntíjulh? 24Keyoh whutꞌenne lhchꞌaz nehúdindil ꞌinkꞌez lhehúndil de, ꞌet keyoh gak whutaleh, 25kꞌus ꞌilhoghun yoh whutꞌenne lhchꞌaz nehúdindil de, ꞌet yoh whutꞌenne tsꞌiyawh yahitádulh. 26ꞋEt ntsiꞌ-i nududeh-i lhchꞌaz nehúdindil de, ꞌaw saꞌ ꞌuhootꞌeꞌ ꞌaítꞌoh lhchꞌá náhúsdil ꞌinkꞌez la gak hooleꞌ.”

Mbene la Ndoni chꞌaz ditni be yalhdukne, ꞌaw buba whunaoodootnoh ꞌaitꞌoh

27“Dune ulhtus-un ooyoh daháꞌ danyuz ꞌinkꞌez teꞌóolelh nehooloh, ꞌudechoo dune ulhtus-un yulhghel de, ꞌet de za yughu téꞌtilelh. 28Soo tsꞌihꞌun nohdúsni, tsꞌiyanne dune bulubeshi cha ꞌinkꞌez Yakꞌusda chꞌaz yálhduk-un cha tsꞌiyawh buba nꞌún whutildulh. 29ꞋEt hoontsꞌi mbe la Ndoni chꞌaz yálhduk-un, ꞌen ꞌaw oolubeshi buba nꞌun yutoolhdilh ꞌaitꞌoh, ꞌilhiz wheni ooba nahutideh.”

30Jesus ubudaniꞌ-un, ꞌet huwa Moses be ꞌudustlꞌus ꞌukꞌu nunáguzne ꞌuhútni, “Ntsiꞌ-i nudúdeh-i ooyudínda!”

Jesus ooloo ꞌinkꞌez bulhutsinke ꞌanih huyúlhni

31ꞋEt Jesus ooloo ꞌinkꞌez bulhutsinke te whusahándil yoh yoo ꞌaz tsꞌe nódilhya ꞌinkꞌez hika huyih. 32Dune ꞌilhozdílne Jesus hinat dilhtsꞌi ꞌinkꞌez ꞌet ꞌuhuyúlhni, “Nilhꞌen nloo ꞌinkꞌez nyulhutsinke nꞌaz ꞌuhutꞌen nkaꞌ hoodulhkut.”

33ꞋEt Jesus ubúlhni, “Mbe la sloo kꞌus mbene la sulhutsinke?”

34Tsꞌiyawh dilhtsꞌíne butunúyuzꞌen ꞌinkꞌez ꞌutni, “Ndunne, ꞌenne sloo ꞌinkꞌez sulhutsinke cha ꞌuhintꞌoh. 35Mbene la Yakꞌusda kꞌúneꞌ ꞌutꞌen unli-un, ꞌen sulhutsin, sulhtus, ꞌinkꞌez sloo cha ꞌuhintꞌoh.”

Currently Selected:

Mark 3: crx

Highlight

Copy

Compare