Sakaria 10
10
E Toe Fa‘aolaina lona Nu‘u e le Atua
1Ole atu ia ‘outou i le ALI‘I, ‘ina ‘ia ‘ua i ona po o le timuga mulimuli; e faia e le ALI‘I uila ma foa‘iina atu timuga tetele ‘iā te i latou, o mutia o le fanua ‘iā te i latou uma.#Teu 11.14; Sala 135.7; Iere 14.22; Eseki 34.26 2Auā ‘ua tautala tupua i mea le aogā ma ē fai togafiti fa‘ataulāitu ‘ua latou va‘aia le pepelo ma latou tala mai miti pepelo ma latou fa‘amafanafana fua. O le mea lea ‘ua ō ‘ese ai i latou pei o mamoe sa tigāina ‘ina ‘ua leai se leoleo.
3Na tupu lo‘u ita i le ‘au leoleo mamoe; ‘ou te taui atu fo‘i i oti po‘a; auā ‘ua asiasi mai le ALI‘I o ‘au i lona lafu o le ‘āiga o Iuta; e faia fo‘i i latou e ia pei o lana solofanua matagofie i le tau‘a.#Eseki 34.5-6, 10, 17 4Mai ‘iā te ia le tulimanu, mai ‘iā te ia le fao, mai ‘iā te ia le ‘aufana o le tau‘a, mai ‘iā te ia fo‘i e ō atu ai faipule uma fa‘atasi.#10.4 tulimanu…faipule uma fa‘atasi: po o faipule ma ta‘ita‘i ‘au uma sa latou pulea Iuta o le a latou ō ‘ese ma tu‘ua Iuta. 5Latou te pei o toa, o lo‘o soli i le palapala i fafo i le tau‘a; latou te tau fo‘i, auā o ‘iā te i latou le ALI‘I; ‘ae fa‘amāina ē ti‘eti‘e i solofanua.
6‘Ou te fa‘amalosia le ‘āiga o Iuta ma le ‘āiga o Iosefa,#Isai 14.1; Iere 3.18
‘ou te fa‘aolaina lea;
‘ou te fa‘anofomauina fo‘i i latou;
Auā ‘ua ‘ou alofa mutimutivale i ai;
e ‘avea i latou, e peiseaī na ‘ou le lafoa‘iina i latou;
auā o a‘u o le ALI‘I lo latou Atua,
‘ou te talia i latou.
7E pei o le fitafita sa Efaraima,
e fiafia fo‘i o latou loto, e pei o ē inu uaina.
E va‘ai i ai a latou fānau ma latou fiafia,
e ‘oli‘oli lava o latou loto i le ALI‘I.
8‘Ou te mapumapu atu ‘iā te i latou,#Isai 5.26; Eseki 36.10-11; Hose 1.11
ma ‘ou fa‘apotopotoina i latou.
Auā ‘ua ‘ou fa‘atauina i latou e fa‘ato‘ateleina fo‘i i latou,
e pei ‘ona fa‘ato‘ateleina i latou anamua.
9Ma ‘ou totōina i latou i nu‘u;
‘ae manatua a‘u e i latou i mea mamao.
Latou te ola fo‘i fa‘atasi ma a latou fānau,
ma latou toe fo‘i mai.
10‘Ou te fa‘afoisia mai i latou nai le nu‘u o Aikupito,#Isai 49.20; Hose 11.11; Mika 7.14
ma ‘ou fa‘apotopotoina i latou mai Asuria.
‘Ou te ‘aumaia i latou i le nu‘u o Kiliata
ma Lepanona, e lē maua fo‘i se mea latou te nonofo ai.
11Na te ui ane i le sami ma le puapuagā,
na te taia fo‘i peau o le sami,
e fa‘apa‘umatūina mea loloto uma i le vaitafe.
E fa‘amaulaloina fo‘i lē fa‘amaualuga o Asuria,
o le to‘oto‘o fo‘i o Aikupito e mavae atu lea.
12‘Ou te fa‘amalosia i latou i le ALI‘I,#Mika 4.5
latou te sāvavali fo‘i i lona suafa.
‘ua fetalai mai ai le ALI‘I.
Currently Selected:
Sakaria 10: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
