Sirako 7
7
O le ‘Alo ‘ese i le Agasala
1‘Aua ‘e te fai le leaga, ‘ona lē o‘otia fo‘i lea o oe i ni leaga. #Kene 4.7
2‘Ia e ‘alo ‘ese i le amio leaga, ‘ona fa‘amamao lea ‘iā te oe o mea leaga.
3Lo‘u atali‘i e,
‘aua ‘e te lūlū fua leaga i suataga o le amioletonu,
‘ina ne‘i e seleseleina o lona sautuafitu. #Iopu 4.8; Fa‘ata 22.8; Kala 6.7-8
4‘Aua ‘e te tagi atu i le Atua i sau pule‘aga,
pe tagi atu i le tupu i sou nofoāli‘i. #Sira 13.12-13; Fa‘ata 25.6-7
5‘Aua ‘e te fa‘afiaamiotonu i luma o le Atua,
auā o ia e silasila i le loto, ‘aua fo‘i ‘e te fa‘afiapoto i luma o le tupu.
6‘Aua ‘e te tauivi atu i le tofiga o le fa‘amasino,
‘ina ne‘i lē lava lou malosi i le vavao le amio leaga,
‘ina ne‘i e pala‘ai i luma o le tagata mamalu,
e ‘avea ai lea mea ma ma‘a e tautevateva ai lou amiotonu. #Levi 19; 15
7‘Aua ‘e te fa‘atigā i le ‘a‘ai ‘atoa,
‘aua fo‘i ‘e te fa‘afialelei i le motu o tagata.
8‘Aua fo‘i ‘e te fa‘amau fa‘alua lau amio leaga,
auā e o‘o lava i sau agasala e tasi, ‘e te lē sao ai i le sala.
9‘Aua ‘e te loto vaivai i mea ‘ua e fa‘atoga atu, #Iako 1.6
10‘aua fo‘i ‘e te tu‘ulafoa‘iina le tatalo ma le faiga o mea alofa.
11‘Aua ‘e te fa‘apea ifo,
“E silasila mai le Atua i le tele o a‘u mea alofa
a ‘ou momoli atu a‘u mea alofa i le Atua Silisili‘ese, e talileleia lava e ia.” #Fa‘ata 21.27; Amo 5.21
12‘Aua ‘e te tauemu i le tagata ‘ua momomo lona loto,
auā e silasila mai lava le Atua;
o ia lē na te fa‘amaulaloina,
o ia fo‘i lē na te fa‘amamaluina. #1 Samu 2.7; Luka 1.52
13‘Aua ‘e te fatufua ni talapepelo e leaga a‘i o ou uso,
e fa‘apea fo‘i ma au uō.
14‘Ia oe lava ma le tala pepelo, auā o le talapelo,
o le masani leaga lava lea.
15‘Aua ‘e te so‘ona tautalatala i le fa‘apotopotoga o ē toeaina,
‘aua fo‘i ‘e te fa‘aluaina se ‘upu a lau tatalo. #Mata 6.7
16‘Aua ‘e te ‘ino‘ino i galuega faigatā,
‘ae maise o le fa‘ato‘a o le ‘ele‘ele na poloa‘iina e le Silisili‘ese.
17‘Aua le faitauina oe fa‘atasi ma le vao tagata solitulafono.
18‘Ia e manatua le to‘asā, auā e lē fa‘atuai mai.
19‘Ia e matuā fa‘amaulalo lou loto,
auā o le afi ma le ilo e fa‘asalaina a‘i le tino o le tagata amio leaga. #Isai 66.24; Iuti 16.20-21; Mare 9.48
O le vā Fealoaloa‘i ma isi Tagata
20‘Aua le tu‘ulafoa‘i i lau uō ‘ona ‘ua fa‘atuai le toe fa‘aola mai o se tupe,
‘aua fo‘i ‘e te tauemu i sou uso pele ‘ona o sina auro.
21‘Aua ‘e te fa‘ate‘a le avā mafaufau ma le amio lelei ‘ua fai mou tofi i le mata‘u i le Ali‘i,
auā e sili i le auro le tāua o lona lālelei.
22‘Aua ‘e te fa‘asaunoa i le pologa ‘ua galue ma le fa‘amaoni,
po o lau ‘au‘auna ‘ua fa‘aaogā mo oe lona malosi. #Sira 33.25-33; Teu 24.14-15
23A i ai sou pologa atamai, ‘ia e alofa ‘iā te ia e pei ‘ona e alofa ‘iā te oe,
‘aua le tāofiofi lona fa‘asa‘olotoina, ‘aua fo‘i ‘e te tu‘ulafoa‘i i lona mativa. #Eso 21.2; Teu 15.12-15
24A i ai sau lafumanu, ‘ia e to‘aga i ai;
a aogā fo‘i o nai manu ‘iā te oe, ‘ia e tāofi pea i lou ‘āiga.
25A i ai ni ou atali‘i, ‘ia e a‘oa‘o atu ‘iā te i latou,
ma ‘ia gau la latou amio e āfua mai ‘ina laiti. #Sira 30.1-13; Fa‘ata 13.24
26E i ai ni ou afafine? ‘Ia e tausi lelei i o latou tino,
‘aua fo‘i ‘e te fai anaga i o latou luma.
27A e maua se fa‘aipoipoga mo lou afafine,
‘ua e faia sau galuega aogā tele; ‘ia e tu‘u lou afafine i se tane fa‘autauta. #1 Kori 7.36-38
28‘Āfai ‘ua e maua sau avā e tusa ma lou loto,
‘aua ‘e te fa‘ate‘aina; ‘aua fo‘i ‘e te fa‘alagolago i se fafine ‘ua lē feagai ma oe.
29‘Ia e āva i lou tamā ma lou loto ‘atoa,
‘aua ne‘i galo fo‘i ‘iā te oe le mapuitigā o lou tinā. #Eso 20.12; Topi 4.4
30‘Ia e manatua o i lā‘ua lava ia na ala ai ‘ona fānau mai o oe,
ma ‘ia e toe taui atu ‘iā te i lā‘ua e tusa ma mea na la faia ‘iā te oe.
31‘Ia e mata‘u i le Ali‘i ma lou loto ‘atoa ma ‘ia e fa‘aaloalo i ana ositaulaga pa‘ia.
32‘Ia e alofa ma lou malosi ‘atoa i lē na ia faia oe,
‘aua fo‘i ‘e te tu‘ulafoa‘i i ana ‘au‘auna.
33‘Ia e āva i le Atua ma lou loto ‘atoa,
‘ia e fa‘aaloalo i ositaulaga ma ‘aua le tāofia e oe o a latou tufa‘aga.
34‘Ia e tu‘u atu ‘iā te i latou, e tusa ma le tulafono,
le tufa‘aga o mea fa‘apolopolo ma taulaga mo le agasala
ma nai mea alofa e fa‘ato‘ese ai mo lou fa‘atamala.
35‘Ia e momoli atu i le Ali‘i le mea alofa o ‘alaga,
ma le taulaga togiola ma mea fa‘apolopolo mo tagata pa‘ia.
36‘Ia e tu‘u atu fo‘i lou lima i le tagata mativa,
‘ina ‘ia ‘ato‘atoa ai ‘ona lelei lau fa‘ato‘esega ma lou fa‘amanuiaga. #Sira 3.33; 4.10
37‘Ia e mataalofa i mea ‘e te foa‘i atu i ē uma o lo‘o ola,
‘aua fo‘i ‘e te fa‘afiti i sau mea alofa i lē ‘ua oti.
38‘Ia e to‘aga e fa‘amafanafana i ē fētāgisi ma ‘ia e savali i tafatafa o lē ‘ua fa‘anoanoa. #Sira 37.16; Mata 25.35; Roma 12.15
39‘Aua ne‘i e fa‘atalalē i le asiasi i ē mama‘i,
auā o amioga ia e fa‘amausalīina ai oe i le alofa.
40‘Ia e manatua o lou i‘uga i au galuega uma lava,
‘ona e lē agasala ai lea e o‘o i le fa‘avavau.
Currently Selected:
Sirako 7: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.