Sirako 28
28
O le Taui ma Sui
1‘Ai sē fia taui ma sui, e taui ma sui ‘iā te ia e le Ali‘i,
na te tāofimauina ana agasala.
2‘Ia e fa‘amāgalo atu i le uso ‘ua na fa‘aleagaina oe,
‘ona fa‘amāgaloina ai lea au agasala pe a e tagi atu i ai. #Mata 6.12; 5.23-24; 6.14-15
3E tāofimau e le tagata lona ita i le uso,
‘ae tagi atu i le Atua i le fa‘amāgaloga.
4E lē alofa lava ia i le tagata la te tutusa,
a ‘ua tagi atu ‘ia fa‘amāgaloina mai ana ia agasala,
5o ia o le tagata ‘augavale, a ‘ua tāofi mau i lona loto tigā,
‘ona tagi atu ai lea ‘ia fa‘amāgaloina mai e le Atua;
o ai sē a fautua mo ana agasala?
6‘Ia e manatua lou i‘uga, ‘ae sōia le toe tigā o lou loto i ou uso. #Sira 7.40; 38.21
7‘Ua tutū mai le i‘uvale ma le oti i lē soli poloa‘iga.
8‘Ia e manatua le mata‘u i le Atua,
‘aua lava ‘e te ita fa‘asulusulu i lē lua te tuā‘oi. #Eso 23.4-5; Levi 19.17-18
9‘Ia e manatua le feagaiga a le Silisili‘ese ma e fa‘amāgalo i le sesē o lē lua te tuā‘oi.
O le Finauvale
10‘Ia e ‘alo ‘ese i le finauvale, ‘e te fa‘amāui ai au agasala.
11Auā o le tagata itagofie na te fa‘a‘a‘asa le finauga,
a o le tagata agasala na te fa‘atupu le vā i ē sa fa‘auō,
na te fa‘atupu le loto leaga i le vā o ē sa fīfīlemū.
12E fa‘atatauina le mū o le afi i le tele o la‘au ‘ua i le pupuvao,
e fua fo‘i i le mamalu o le tagata le mū o lona ita,
na te fa‘aoso tele fo‘i lona ita fa‘atatau ma lona mau‘oloa. #Fa‘ata 26.20-21
13O le finauga fa‘atotope e mū ai le afi, o le misa ‘ua fa‘ate‘ia ai e maligi ai le toto,
a o le laulaufaiva pepelo e tupu ai le oti.
14A ē feula i le aloiafi, e mū e pei o se afi tele; a e feanu i ai e pe ai lava;
‘ae ‘ua mai le gutu mea uma e lua.
O Agasala o le Laulaufaiva
15O le faitatala fa‘agutugutulua, ‘ia malaia ia,
auā na te fa‘aatuatuaina o ni isi e to‘atele sa fīfīlemū i latou. #Iako 3.1-12
16O le laulaufaiva tu‘ua‘ipepelo ‘ua na fa‘aleagaina ni isi e to‘atele,
‘ua na tuliloaina i latou a‘i lea nu‘u i lea nu‘u.
17‘Ua na lepetia ‘olo faipāvali o tagata mau‘oloa,
ma ‘ua fa‘asosofa maota o ē mamalu.
18‘Ua faia‘ina ‘iā te ia o ‘au a nu‘u e tele,
‘ua na fa‘ata‘ape‘ape o mālō tetele.
19O le laulaufaiva tu‘ua‘ipepelo ‘ua na tuli‘eseina fafine loto tetele,
‘ua na faoa le fua o a latou galuega.
20A sē e fa‘alogo i ai, e lē maua lava sona filemū,
e lē totoe fo‘i ‘iā te ia se uō e mapu ai o ia.
21O le tā o le sasa e tupu ai fa‘alavalava,
a o le tā o le laulaufaiva e gagau ai o ivi. #Fa‘ata 25.15
22E to‘atele ni isi ‘ua pa‘u‘ū i le pelu,
‘ae sili mamao ‘ona to‘atele o ē na fasiotia i latou i le laulaufaiva.
23‘Amu‘ia le tagata ‘ua puipuia o ia a‘i le laulaufaiva leaga,
‘ua lē tu‘uina o ia i lona ita fa‘avalea,
‘ua lē ‘ave e ia lana amo, ‘ua lē noatia o ia i ana maea. #Sala 31.20
24Auā o lana amo, o le amo u‘amea lea, a o ana maea o maea ‘apamemea.
25O le oti e tupu mai ai, o le oti aupito leaga,
e feoloolo ai lava seoli.
26E lē tumau lona mālō; e pule lava ia i ala o tagata amio leaga,
‘ae lē susunuina tagata amiotonu i lona afi.
27E pa‘u‘ū i ai o i latou o ē tu‘ulafoa‘i i le Atua,
e mū lava ‘iā te i latou, e lē matineia ai;
na te tuliloa ‘iā i latou e pei o se leona, na te saeia i latou e pei o le nameri.
28‘Ia e si‘osi‘o ou taliga i la‘au tuitui, ‘ina ne‘i e fa‘alogo i le laulaufaiva leaga,
‘ia e tu‘u i lou gutu se puipui ma se fa‘amau fa‘alava.
29‘Ia e tanu lau auro ma lau ario, ‘ia e faia se fua tautau e fua ai au ‘upu
ma se fa‘agutu e tatau ma ou laugutu. #Sira 22.33
30‘Ia oe ne‘i e pa‘ū ‘ona o le laulaufaiva, ‘ona e pa‘ū ai lea i luma o ou fili ‘ua lamalama ‘iā te oe,
‘ona lē toe aogā lea se fofō ‘iā te oe, ‘e te oti ai lava. #Fa‘ata 13.3
Currently Selected:
Sirako 28: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.