Sirako 20
20
O le Fa‘amasinoga Tonu ma le Tautala Poto
1E lelei le a‘oa‘iga, ‘ae leaga le ita fa‘asulusulu;
‘aua fo‘i le vaosia le fa‘amatalaga a lē ta‘uta‘u lana agasala.
2E pei o le eunuka na te fia toso se taupou, #Sira 30.21
3e fa‘apea le tagata na te faia fa‘amalosi se fa‘amasinoga e lē tonu.
4Se mea ‘ua lelei le fa‘aali le loto salamō pe a a‘oa‘oina oe,
auā o le ala lea ‘e te ‘alo ‘ese ai i le agasala o le loto.
5‘Ua i ai le tasi e fa‘alologo, a ‘ua aliali mai ai lona poto,
‘ae ‘ua ‘inosia le tasi ‘ona o le so‘ona tautala. #Fa‘ata 17.28
6‘Ua i ai le tasi e fa‘alologo ‘ona ‘ua lē maua ni ana ‘upu,
‘ae i ai le tasi e fa‘alologo ‘ona ‘ua masino ‘iā te ia le itū aso tatau.
7E fa‘alologo le tagata poto se‘ia o‘o i le itū aso tatau,
a o le tagata mamapo ma le lē mafaufau na te lē iloa ni itū aso.
8O lē tautala i ni ‘upu e tele e fa‘aleaga lava ia ‘iā te ia lava,
a o lē so‘ona fiapule ma le fa‘alētatau e ‘inosia lava ia.
O le Suia Fa‘afuase‘i o le Manuia i le Malaia
9O le tagata amioletonu e manuia lava ia i mea leaga,
a o se mea lelei ‘ua na maua, o le a fano ai lava ia.
10‘Ua i ai le mea alofa ‘ua faifua,
e i ai ma le mea alofa e fa‘alua ‘ona tauia mai.
11O le tasi ‘ua māui lona ta‘uleleia pe a fa‘amamaluina,
a o le tasi ‘ua fa‘amasiasi o ia, ‘ae fa‘aea ai o lona ulu. #Luka 1.52
12O le tasi ‘ua fa‘atau mai ni ana mea e tele i se tau ‘ua itiiti fua,
‘ae ‘ua sili fa‘afitu i le tau e tusa ai.
13O lē poto i ana ‘upu e alofagia o ia,
‘ae maumau lava o ‘upu alofa a le vale.
14E lē aogā ‘iā te oe le mea alofa a le vale,
auā e sautuafitu ona mata.
15E itiiti lana mea e foa‘i mai, ‘ae tele lana ‘ote mai ai,
a matala mai lona gutu, e pei e oso mai ai le afi.
16O le asō e nonō mai ai se mea e ia,
a e a taeao, e tagi mai i le fa‘afo‘i atu; e ‘inosia le tagata e fa‘apenā.
17O le vale e fa‘apea ane: “‘Ua leai ni ana uō, e le o‘otia se loto i ana mea alofa.”
18O ē ‘a‘ai i ana mea e ‘ai ‘ua pepelo o latou laulaufaiva.
Pe fa‘afia ‘ea e ulagia lava ia e le to‘atele!
19Auā e lē masino i lona mafaufau o mea e tatau ‘ona ia tāofia,
e fa‘apea fo‘i ma mea e tatau ‘ona ia avatua.
O le Tagata Tautala So‘o e Tupu ai le Mā
20O lē ‘ua pa‘ū ‘ona o lona laulaufaiva pepelo, e sili ‘iā te ia pe ‘ana pa‘ū faō i le ‘ele‘ele;
e fa‘apea ‘ona fa‘afuase‘i mai ‘ona fano o ē amio leaga!
21O le tagata fa‘asoesā ‘ua pei o se tala fatufua,
‘ua ta‘u so‘o lava e laugutu o ē ‘ua lē a‘oa‘oina.
22E lē talileleia le fa‘ata‘oto a‘i laugutu o le vale,
auā na te lē ta‘u maia i le itū aso tatau. #Fa‘ata 26.7, 9
23O le tasi ‘ua lē agasala lava ia, ‘ona o lona mativa;
‘ua nofonofo fua o ia, ‘ae tu‘inanau i le agasala.
24O le tasi e fano ‘ona ‘ua mā lava ia; e fano lava ia i tagata lē mafaufau,
e fano ‘ona ‘ua fa‘ailogaina tagata e ia.
25O le tasi ‘ua folafola atu se mea i lana uō,
‘ona ‘ua mā lava ia, ‘ona ‘avea fua ai lea o lenā uō e fai mōna fili.
O le Pepelo
26O le talapepelo, o le ila matagā lea i le tagata;
e maua so‘o lava i laugutu o tagata ‘ua lē a‘oa‘oina. #Fa‘ata 13.5
27‘Ua feoloolo le tagata gaoi, ‘ae leaga le tagata ‘ua saga talapelo;
a o lo lā‘ua tofi, o le fanoga lea.
28O le fua lava lea o le talapepelo, o le fa‘aleaga lava i tagata,
e tumau pea ‘iā te i latou lo latou māsiasi.
O le Tautala ma le Poto
29O lē poto i ana ‘upu e ta‘uleleia ai lava ia,
a o le tagata mafaufau e fiafia i ai o ē mamalu.
30‘Ai se tasi e fa‘ato‘a lona fanua, e maua mai ai e ia fa‘aputuga saito e tele;
o lē tauivi i le amiotonu, e fa‘amamaluina ai o ia,
a o lē fa‘afiafia i tagata mamalu e ‘alo ‘ese o ia i galuega leaga. #Fa‘ata 14.35
31O mea alofa ma mea foa‘ifua e fa‘atauaso a‘i mata o le fa‘amasino;
e pei fo‘i o se momono i le gutu, e tāofia ai o a‘oa‘iga. #Fa‘ata 17.8; 18.16; 21.14
32O le poto e nanā, o le ‘oloa ‘ua lilo, se a se aogā o mea ia e lua? #Sira 41.17-18; Mata 5.14-16
33E feoloolo le tagata na te natia lona valea,
‘ae leaga lē na te natia lona poto.
Currently Selected:
Sirako 20: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.