Salāmo 102
102
O le Manatu i le Alofa o le Atua ‘ua Fa‘amafanafanaina ai lē ‘ua Tigāina
O le tatalo a lē ‘ua puapuagātia pe a fa‘avaivai o ia ma ‘ua matuā tagi atu o ia i le ALI‘I
1Le ALI‘I e,#Eso 2.23; Sala 39.12
fa‘afofoga mai ia i la‘u tatalo,
ma ‘ia o‘o atu la‘u ‘alaga ‘iā te oe.
2‘Aua le ‘alo ou fofoga ‘iā te a‘u
i le aso e puapuagātia ai a‘u;
‘ia liliu mai ou fofoga ‘iā te a‘u;
‘ia ta‘alise ‘ona e tali mai ‘iā te a‘u i le aso ‘ou te vala‘au atu ai ‘iā te oe.
3Auā ‘ua mavae o‘u aso fa‘apei o le asu,#Paru 1.13; Iako 4.14
o o‘u ivi fo‘i ‘ua mū e pei o le motumotu.
4‘Ua sasaina ma ‘ua magumagu lo‘u loto pei o le vao iti;
o lea ‘ua galo ai ‘iā te a‘u ‘ona ‘ai i la‘u mea e ‘ai.
5O le leo o lo‘u mapuitigā#Iopu 19.20
‘ua pipi‘i ai o‘u ivi i lo‘u ‘a‘ano.
6‘Ua tusa a‘u ma le kati o le vao;
‘ua ‘avea a‘u pei o le kusa i mea ‘ua fa‘atafunaina.
7O lo‘o ‘ou mataala ma ‘ua ‘avea a‘u e pei o le manu itiiti
e nofo to‘atasi i luga o le fale.
8O le aso ‘atoa ‘ua gaogao mai ai o ē ita mai ‘iā te a‘u;#Galu 23.12
o ē ‘ua fa‘avalemalosi mai ‘iā te a‘u
‘ua tautō i latou e agaleaga ‘iā te a‘u.
9Auā o lo‘o ‘aina e a‘u o le lefulefu e pei o le mea e ‘ai,
‘ua ‘ou filogia fo‘i la‘u mea e inu ma le tagi,
10‘ona o lou to‘atama‘i ma lou to‘asā.
Auā na e si‘itia a‘u i luga,
na e lafotūina fo‘i a‘u i lalo.
11O o‘u aso ‘ua pei o le ata ‘ua lafoia;
o a‘u nei fo‘i ‘ua pei o le vao iti ‘ona magumagu.
12A o oe, le ALI‘I e,#Eso 3.15; Sala 135.13
e afio oe e fa‘avavau lava,
ma le fa‘amanatuga ‘iā te oe, e āu tupulaga lava lea.
13‘E te tula‘i mai oe, e mutimutivale lou alofa i Siona;
auā ‘ua o‘o mai ona po e alofaina ai o ia,
‘ua o‘o lava i ona aso na tu‘upoina.
14Auā o lo‘o fiafia au ‘au‘auna i ona ma‘a,#Nee 4.2
o lo‘o alolofa lava i lona efuefu.
15E matata‘u fo‘i nu‘u ‘ese i le suafa o le ALI‘I,
ma tupu uma o le lalolagi e matata‘u i lou mamalu.
16Auā e atiina a‘e Siona e le ALI‘I,#Sala 147.2; Isai 60.1
e iloa mai o ia i lona mamalu.
17E liuliu alo mai o ia i le tatalo a lē ‘ua mativa,
e lē ‘ino‘ino fo‘i o ia i la latou tatalo.
18E tusia lenei mea mo le tupulaga amulī;#Sala 22.31; Isai 43.21; Roma 15.4; 1 Kori 10.11
o le nu‘u fo‘i e faia, latou te vivi‘i atu i le ALI‘I.
19Auā ‘ua silasila mai o ia mai lugā i lona afio‘aga pa‘ia;
‘ua silasila le ALI‘I mai le lagi i le lalolagi.
20‘Ina ‘ia fa‘afofoga o ia i le ōi o lē ‘ua noanoatia;#Sala 79.11
‘ina ‘ia tālaina e ia o ē na tu‘u e oti.
21E ta‘uta‘u atu ai le suafa o le ALI‘I i Siona,
ma lona vi‘iga i Ierusalema;
22pe a fa‘apotopotoina fa‘atasi o nu‘u,#Sala 22.27; Isai 45.14
ma mālō e ‘au‘auna ai i le ALI‘I.
23Na ia fa‘avaivaia lo‘u malosi i le ala,
na ia fa‘aitiitiina fo‘i o‘u aso.
24Na ‘ou fai atu,
“Lo‘u Atua e,” “‘aua le ‘ave‘eseina a‘u i le tautuluaga o o‘u aso;
e au tupulaga lava o‘u tausaga.”
25O anamua na e fa‘avaeina ai le lalolagi;#Epe 1.10-12; Kene 1.1; Iopu 38.4-7
o le lagi fo‘i o le galuega lea a ou ‘a‘ao.
26E fa‘aumatia ia mea a o oe, ‘e te tumau pea;#Sala 102.12; Isai 34.4; 51.6; Mata 24.35; Fa‘aa 20.11
e pala ia mea uma e pei o le ‘ofu tele,
‘e te liua ia e pei o le ‘ofu, ‘ona liua lava lea.
27A o oe, e fa‘apea lava pea oe;#Isai 41.4; Mala 3.6; Iako 1.17
e le i‘u lava ou tausaga.
28E nofo mau atali‘i o au ‘au‘auna,
o la latou fānau fo‘i e fa‘atumauina ia i ou luma.
Currently Selected:
Salāmo 102: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
