Filipi 2

‘Ia Loto Gatasi ma ‘ia Loto Maulalo

1O lenei, ‘āfai e ai sē fai mafanafana ‘iā Keriso, ‘āfai e ai sē fa‘amatalaloto i le alofa, ‘āfai e ai sē mafuta fa‘atasi ma le Agaga, ‘āfai e ai sē alofa mutimutivale ma se loto alofa, 2‘inā fa‘a‘ato‘atoa mai ia e ‘outou lo‘u ‘oli‘oli, i le gatasitasi o o ‘outou manatu ma le alofa e tasi i le loto gatasi, ma le mānatunatu i le mea e tasi. 3‘Aua ne‘i faia se mea e tasi ma le finau vale, ma le mitamita fua; a ‘ia ta‘itasi ‘outou ma manatu ma le loto maulalo, ‘ua sili nisi ‘iā te ia.#Kala 5.26; Roma 12.10 4‘Aua ne‘i ta‘itasi ma va‘ava‘ai i ana lava mea, a ‘ia ta‘itasi ma va‘ava‘ai i mea a isi.#1 Kori 10.24, 33 5‘Ia ‘iā te ‘outou fo‘i lea lava manatu sa ‘iā Keriso Iesu.

6O lē sa uiga fa‘atasi ma le Atua,#Ioane 1.1-2; 17.5; Kene 1.27; 3.5

e le‘i manatu o ia o se mea e u‘u mau lona tulaga tutusa lava ma le Atua.

7A ‘ua sasa‘a atu o ia e ia lava,

o fai mōna le uiga o le pologa,

i lona fānau mai fa‘apei o se tagata.#Isai 53.3; 2 Kori 8.9; Epe 2.14, 17

8A o iloa o ia i ona foliga e pei o se tagata, ‘ua fa‘amaulalo o ia e ia lava,

‘ua na ‘ana‘ana ‘ua o‘o ‘ina maliu,#Epe 12.2; 5.8; Ioane 10.17

o le maliu lava lea i le satauro.

9O le mea lava lea ‘ua matuā fa‘aeaina ai o ia e le Atua,#Galu 2.33; Efe 1.21; Epe 1.3-4

ma foa‘iina atu ai ‘iā te ia o le suafa e silisili i suafa uma lava.

10‘Ina ‘ia to‘otuli o tulivae uma lava i le suafa o Iesu,#Isai 45.23; Ioane 5.23; Fa‘aa 5.13

o ē o i le lagi ma ē o i le lalolagi,

ma ē o i lalo o le lalolagi,

11ma ‘ia ta‘uta‘u atu e laulaufaiva uma lava o Iesu Keriso o le Ali‘i lava ia,

‘ia i‘u ai i le vi‘iga o le Atua le Tamā.

‘Ia Susulu atu lo ‘Outou Malamalama i le Lalolagi

12O lenei, ‘au pele e, fa‘apei ‘ona ‘outou ‘ana‘ana mai e lē aunoa, ‘ia ‘outou galueaina pea lo ‘outou fa‘aolataga i le mata‘u ma le gatete, e lē gata ‘ina o tatou nonofo ma ‘outou ‘ae atili ai pe a ‘ou lē i ai.#1 Pete 1.17; Sala 2.11 13Auā o le Atua, o lo‘o galue i totonu ‘iā te ‘outou ‘ina ‘ia ‘outou loto i mea e finagalo malie ai o ia ma ‘ia ‘outou galulue ai.#Ioane 15.5; 2 Kori 3.5; 1 Tesa 2.13

14‘Ia faia mea uma lava ma le lē muimui, ma le lē fefinaua‘i;#1 Pete 4.9 15‘ina ‘ia ‘avea ‘outou ma ē ‘ua lē mata‘uleagaina, ma ē ‘ua sa‘o le amio, o le fānau a le Atua, e lē ponā i totonu o le tupulaga amio fa‘api‘opi‘o ma le fīnau vale; ‘ua ‘outou susulu atu ai fa‘apei o mea e fa‘amalamalama a‘i le lalolagi.#Mata 5.14; 10.16; Fili 1.10; Efe 5.8; Teu 32.5; Galu 2.40 16O lo‘o tāofia e ‘outou le ‘upu o le ola, e fai ma mea ‘ou te mitamita ai i le aso o Keriso, ‘ina ‘ua ‘ou lē momo‘e fa‘alēaogā, pe galue fa‘alēaogā.#1 Tesa 2.19; Kala 2.2; Isai 49.4; 65.23

17‘Āfai fo‘i e fa‘amaligiina lo‘u toto i luga o le taulaga o le ofoina atu lea o lo ‘outou fa‘atuatua, ‘ou te ‘oli‘oli ai, tatou te ‘oli‘oli fa‘atasi fo‘i ma ‘outou uma lava. 18O le mea lava lea ‘ia ‘outou ‘oli‘oli ai, tatou te ‘oli‘oli fo‘i fa‘atasi ma a‘u.

O Timoteo ma Epaferoti

19‘Ae ‘ou te fa‘amoemoe i le Ali‘i o Iesu ‘ou te vave ‘auina atu Timoteo ‘iā te ‘outou, ‘ina ‘ia fiafia a‘u nei fo‘i, pe a a‘u iloa se tala ‘iā te ‘outou. 20Auā e lē o ‘iā te a‘u se tasi ma te loto fa‘atasi, na te tausia fa‘amaoni mea e manuia ai ‘outou. 21Auā e sā‘ili e i latou uma a latou lava mea, e lē o mea a Keriso Iesu.#2 Timo 4.10, 16; Kala 4.17 22A ‘ua ‘outou iloa lona fa‘amaoni, na ia ‘au‘auna fa‘atasi ma a‘u i le tala lelei, e pei o se atali‘i i lona tamā. 23O ia fo‘i, ‘ou te fa‘amoemoe, ‘ou te ‘auina atu loa, pe a ‘ou iloa pe fa‘apefea a‘u. 24‘Ae peita‘i ‘ou te fa‘atuatua lava i le Ali‘i, ‘ou te vave alu atu fo‘i a‘u.

25A ‘ua ‘ou manatu e tatau ‘ina ‘auina atu ‘iā te ‘outou o Epaferoti, o lo‘u uso lea ma lē nā mā galulue fa‘atasi, ma lē nā mā matata‘u fa‘atasi, o la ‘outou ‘ave fe‘au, ma lē ‘au‘auna mai i lo‘u mativa. 26Auā sa naunau atu ia ‘iā te ‘outou uma lava, na atuatuvale fo‘i o ia, auā na ‘outou fa‘alogologo ‘ua ma‘i o ia. 27Auā fo‘i sa ma‘i lava o ia, na fai a oti; a ‘ua alofa le Atua ‘iā te ia, ‘ae lē gata ‘iā te ia, a o a‘u fo‘i, ‘ina ne‘i fa‘aopoopoina mai ‘iā te a‘u o lea fa‘anoanoa ma lea fa‘anoanoa. 28O lea na atili ai ‘ona ‘ou fa‘ata‘alise ‘ona ‘auina atu o ia, ‘ina ‘ia ‘oli‘oli ‘outou pe a ‘outou toe feiloa‘i ma ia, ‘ia fa‘afeoloolo ai fo‘i lo‘u fa‘anoanoa. 29O lea ‘ia ‘outou talia ai o ia i le Ali‘i ma le ‘oli‘oli uma lava, ma ‘ia fa‘apelepeleina e ‘outou ē ‘ua fa‘apea.#1 Kori 16.16; 1 Timo 5.17 30Auā na fai a oti o ia ‘ona o le galuega a Keriso, e le‘i fa‘apelepeleina fo‘i e ia lona ola, a se‘ia fa‘a‘ato‘atoaina e ia mea sa totoe i lo ‘outou ‘au‘auna mai ‘iā te a‘u.

Currently Selected:

Filipi 2: RSCB

Highlight

Copy