Numera 15
15
O Taulaga ma Tulafono ‘Ese‘ese
1‘Ua fetalai mai fo‘i le ALI‘I ‘iā Mose, ‘ua fa‘apea mai: 2‘Ia e fai atu i le fānauga a Isaraelu, ‘ia fa‘apea atu ‘iā te i latou: Pe a ‘outou o‘o atu i le nu‘u tou te mau ai, ‘ou te foa‘iina atu ai ‘iā te ‘outou, 3ma ‘outou fia fai se taulaga e fai i le afi i le ALI‘I, o le taulaga mū, po o se taulaga e fa‘ataunu‘u ai se mea ‘ua tautō ai, po o se taulaga ‘ua ‘outou loto ‘ina fai, po o se taulaga ‘iā ‘outou tausamiga, e fai ma mea manogi lelei i le ALI‘I, mai le lafu povi po o le lafu mamoe;#Eso 29.18; Levi 1.2, 3, 9; 22.21; 23.4 4‘ona avatu ai lea e lē ‘ua fai lana taulaga i le ALI‘I o le taulaga i mea e ‘ai o le omera e tasi o falaoa lelei ‘ua palua ma lona vaega e fa o le sinu o le suāu‘u. 5O lona vaega e fa fo‘i o le sinu o le uaina e fai ma taulaga i mea e inu, ‘e te saunia e fa‘atasi ma le taulaga mū, po o le isi taulaga e fa‘atatau i le tama‘i mamoe e tasi. 6A o le taulaga i mea e ‘ai mo le mamoe po‘a, ‘e te faia lea i omera e lua o falaoa lelei ‘ua palua ma lona vaega e tolu o le sinu o le suāu‘u. 7O le uaina fo‘i e fai ma taulaga i mea e inu, o lona vaega e tolu o le sinu ‘e te avatu ai, e fai ma mea manogi lelei i le ALI‘I. 8‘Ae ‘āfai o le povi po‘a ‘e te fai a‘i le taulaga mū, po o se isi taulaga e fa‘ataunu‘u ai le mea na tautō ai, po o le taulaga fa‘afetai i le ALI‘I,#Levi 7.11 9‘ona ‘aumai ai lea e ia fa‘atasi ma le povi po‘a o le taulaga i mea e ‘ai o omera e tolu o falaoa lelei ‘ua palua ma le vaeluagalemū o le sinu o le suāu‘u. 10‘E te ‘aumai ai fo‘i o le vaeluagalemū o le sinu o le uaina e fai ma taulaga i mea e inu; o le taulaga e fai i le afi lea, o le mea manogi lelei i le ALI‘I.#Nume 28.14
11E fa‘apea lava ‘ona faia i le povi e tasi, po o le mamoe po‘a e tasi, po o le tama‘i mamoe, po o le tama‘i ‘oti. 12E tusa lava ma le faitau o taulaga tou te faia, e fa‘apea lava ‘ona ‘outou faia i lea ma lea, ‘ia fa‘atatau ma lo latou faitau. 13E fa‘apea ‘ona faia ia mea e tagata o le nu‘u, pe a faia taulaga e fai i le afi, o le mea manogi lelei i le ALI‘I. 14‘Āfai fo‘i e āumau ‘iā te ‘outou se tagata ‘ese, po o se tasi e ‘iā te ‘outou ‘iā ‘outou augatupulaga, e fia fai e ia se taulaga e fai i le afi, o le mea manogi lelei i le ALI‘I; e pei ‘ona faia e ‘outou e fa‘apea lava ‘ona faia e ia. 15E tasi le tulafono ‘iā te ‘outou o le fa‘apotopotoga ‘atoa ma le tagata ‘ese ‘ua āumau ‘iā te ‘outou, o le tulafono e fa‘avavau ‘iā ‘outou augatupulaga; e pei o ‘outou e fa‘apea lava le tagata ‘ese i luma o le ALI‘I.#Eso 12.49; Levi 24.22; Nume 15.29-30 16E tasi lava le tulafono, e tasi lava le tu ‘iā te ‘outou ‘atoa ma le tagata ‘ese o lo‘o āumau ‘iā te ‘outou.#Levi 24.22
17‘Ua fetalai mai fo‘i le ALI‘I ‘iā Mose, ‘ua fa‘apea mai: 18‘Ia e fai atu i le fānauga a Isaraelu, ‘ia fa‘apea atu ‘iā te i latou: Pe a ‘outou o‘o i le nu‘u ‘ou te fa‘ao‘o i ai ‘outou, 19pe a ‘outou ‘a‘ai i mea e ‘ai o le nu‘u, ‘ona ‘outou ‘aumai ai lea o le taulaga si‘i i le ALI‘I. 20‘Ia ‘outou ‘aumai se pōtoi e tasi a‘i la ‘outou lua‘i paluga falaoa e fai ma taulaga si‘i, e pei o le taulaga si‘i a‘i le mea e soli a‘i saito, e fa‘apea ‘ona ‘outou ‘aumaia.#Levi 2.14; Teu 26.2, 10; Nee 10.37; Eseki 44.30 21Tou te ‘ave lava i le ALI‘I le taulaga si‘i a‘i la ‘outou lua‘i paluga falaoa ‘iā ‘outou augatupulaga.
22‘Āfai fo‘i e sesē ‘outou i le agasala, ma ‘outou le faia ia poloa‘iga uma ‘ua fetalai mai ai le ALI‘I ‘iā Mose, 23o mea uma ‘ua poloa‘i mai ai le ALI‘I ‘iā te ‘outou ‘iā Mose, e fua mai i le aso na poloa‘i mai ai le ALI‘I e o‘o lava ‘iā ‘outou tupulaga amulī; 24‘āfai fo‘i e faia se mea ma le sesē, ma le lē iloa e le fa‘apotopotoga, ‘ona saunia ai lea e le fa‘apotopotoga uma lava o se povi po‘a ta‘anoa e tasi e fai ma taulaga mū, o le mea manogi lelei i le ALI‘I, ‘atoa ma lana taulaga i mea e ‘ai, ma lana taulaga i mea e inu e tusa ma le tu, o le ‘oti po‘a fo‘i e tasi e fai ma taulaga mo le agasala.#Levi 4.13, 23; Nume 28.15 25‘Ona fai ai lea e le ositaulaga o le togiola mo le fa‘apotopotoga uma lava o le fānauga a Isaraelu, ‘ona fa‘amāgaloina ai lea o i latou; auā o le sesē, ‘ua latou ‘aumai fo‘i la latou taulaga, o le taulaga e fai i le afi i le ALI‘I, o la latou taulaga fo‘i mo le agasala i luma o le ALI‘I ‘ona o lo latou sesē; 26‘ona fa‘amāgaloina ai lea o le fa‘apotopotoga uma o le fānauga a Isaraelu, ‘atoa fo‘i ma le tagata ‘ese ‘ua āumau ‘iā te i latou; auā ‘ua sesē le nu‘u uma.
27‘Āfai fo‘i e sesē i le agasala se tagata e to‘atasi, ‘ona ‘aumai ai lea e ia se ‘oti fafine e tasi lona tausaga, e fai ma taulaga mo le agasala.#Levi 4.27-31 28‘Ona fai ai lea e le ositaulaga le togiola mo le tagata o lē na sesē i le agasala, pe a sesē i luma o le ALI‘I, e togiolaina ai o ia, ‘ona fa‘amāgaloina ai lea o ia. 29E tasi lava le tulafono ‘iā te ‘outou i lē ‘ua agasala i le sesē, o le tagata moni o le fānauga a Isaraelu, ‘atoa ma le tagata ‘ese ‘ua āumau ‘iā te i latou.
30A o le tagata na te faia se mea ma le fa‘amaualuga, po o se tagata moni o le nu‘u, po o se tagata ‘ese, ‘ua fāifaia lava e ia o le ALI‘I, ‘ia vavae‘eseina lea tagata i lona nu‘u. 31Auā ‘ua ‘inosia e ia le ‘upu a le ALI‘I, ‘ua solia fo‘i e ia lana poloa‘iga; e matuā vavae‘eseina lava lea tagata, e ‘iā te ia lava lana agasala.#Levi 26.15, 43; 2 Samu 12.9; Fa‘ata 13.13
O le soli Sapati
32Sa i le vao le fānauga a Isaraelu, ‘ua iloa e i latou o le tagata na fai seuseu#15.32 seuseu: po o se ‘upu e fa‘atatau i se tagata o lo‘o faigaluega i le aso sapati. i le aso sapati. 33O i latou fo‘i na iloa o ia e fai seuseu, ‘ua latou ‘aumaia o ia ‘iā Mose, ma Arona, ma le fa‘apotopotoga uma lava. 34‘Ona latou tu‘uina atu ai lea o ia ‘ia leoleoina, auā e le‘i ‘iloga se mea e fai ‘iā te ia. 35‘Ona fetalai mai ai lea o le ALI‘I ‘iā Mose, “E matuā fasiotia lea tagata, e fetogia o ia i ma‘a e le fa‘apotopotoga uma i tua o le toagalauapi.” 36‘Ona ta‘ita‘iina lea o ia e le fa‘apotopotoga uma i tua o le toagalauapi, ma latou fetogi ‘iā te ia i ma‘a, ‘ona oti ai lea o ia, e pei ‘ona poloa‘i mai ai o le ALI‘I ‘iā Mose.
O Tulafono o Tu‘upao
37‘Ua fetalai mai fo‘i le ALI‘I iā Mose ‘ua fa‘apea mai: 38‘Ia e fai atu i le fānauga a Isaraelu, ‘ia fa‘apea atu ‘iā te i latou, ‘ia latou faia mo i latou o tu‘upao i pito o latou ‘ofu ‘iā latou augatupulaga, ‘ia latou tu‘u fo‘i le si‘i uliuli i luga o le tu‘upao i le tafatafa;#Teu 22.12 39e fai fo‘i lea ‘iā te ‘outou ma tu‘upao, ‘ina ‘ia ‘outou va‘ava‘ai i ai, ma ‘ia ‘outou mānatunatu ai i poloa‘iga uma a le ALI‘I, ‘ina ‘ia ‘outou faia; ‘ina ne‘i usiusita‘i ‘outou i o ‘outou loto ma o ‘outou mata, auā o mea ia ‘ua fa‘asesē so‘oina ai ‘outou; 40‘ina ‘ia ‘outou manatua, ma ‘ia ‘outou faia a‘u poloa‘iga uma lava, ‘ia pa‘ia fo‘i ‘outou mo lo ‘outou Atua.#Levi 11.44-45 41O a‘u lava o le ALI‘I o lo ‘outou Atua, o lē na ‘aumaia ‘outou a‘i le nu‘u o Aikupito, ‘ina ‘ia fai a‘u mo ‘outou Atua: O a‘u lava o le ALI‘I o lo ‘outou Atua.
Currently Selected:
Numera 15: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
