Nauma 1
1
O le To‘asā o le Ali‘i ‘iā Nineva
1O le avega ‘iā Nineva o le tusi o le fa‘aaliga ‘iā Nauma le Elekosi.#Isai 10.5-34; 14.24-27; Sefa 2.13-15
2O le ALI‘I o le Atua fuā ia, o le taui ma sui,
o le ALI‘I o lē taui ma sui ma lē matuā to‘asā;
e taui ma sui le ALI‘I i ē ita ‘iā te ia,
o lo‘o fa‘amoemoe fo‘i o ia i ē ‘ua fai o ia ma o latou fili.
3O le ALI‘I e telegese lona to‘asā,#Sala 97.2; 102.9; 147.5
‘ae tele lona mana;
na te lē fa‘asaoina lava ē ‘ua agasala.
O le ALI‘I o lo‘o i ai lona ala i le asiosio ma le afā,
o ao o le efuefu ia o ona ‘a‘ao.
4E a‘oa‘i o ia i le sami ma fa‘amateina ai.
Na te fa‘amamateina fo‘i o vaitafe uma.
E mamae Vasana ma Karamelu,
e mamae fo‘i fuga o Lepanona.
5E gatete mauga ‘iā te ia,#Sala 98.7; Iere 4.24; Sapa 3.6
e liu suāvai mauga iti.
E mafui‘e le ‘ele‘ele i ona luma,
o le lalolagi fo‘i ‘atoa ma i latou uma o ē nonofo ai.
6O ai sē tu i luma o lona to‘asā?
O ai fo‘i sē tu i luga pe a tupu lona ma‘ema‘eā?
‘Ua sasa‘a atu lona to‘atama‘i e pei o le afi,
‘ua fulisia papa e ia.
7O lo‘o agalelei le ALI‘I,#Sala 46.1; 100.5; Isai 25.4; Ioane 10.14, 27; 1 Kori 8.3
o le ‘olo ia i le aso o le puapuagā;
o lo‘o silafia e ia o ē fa‘atuatua ‘iā te ia.
8O le tafe e lofia ai na te fa‘aumatia ai le mea o i ai le ‘a‘ai,
e tuliloaina e le pouliuli ē ‘ua ita ‘iā te ia.
9Se a ‘ea se mea ‘ua ‘outou mafaufau ai i le ALI‘I?
E fa‘aumatia lava e ia;
e le tupu fa‘alua mai le puapuagā.
10E ui lava ‘ina filia i latou e pei o la‘au talatala,#Ioe 2.5; Mika 7.4
ma latou matuā ‘onā i le inugāuaina,
‘ae fa‘aumatia i latou pei o tagutugutu o saito e matuā magumagu lava.
11‘Ua sau mai ‘iā te oe o ia o lē ‘ua mafaufau i mea leaga e faia i le ALI‘I, o le faipule amio leaga. 12O lo‘o fa‘apea mai le ALI‘I, “E ui lava ‘ina ‘ato‘atoa i latou ma ‘ua fa‘apea ‘ona to‘atele, ‘ae fa‘apea lava ‘ona fasia i latou, ‘ona mavae atu ai lea o ia. Na a‘u fa‘atigāina oe; ‘ae ‘ou te lē toe fa‘atigāina oe.#Isai 10.33-34; 37.36 13Auā ‘ou te gauia nei lana amo o ‘iā te oe, ‘ou te motusi fo‘i ou noanoaga.”
14‘Ua fetalai le ALI‘I ‘iā te oe, “E lē toe totōina nisi o lou igoa; ‘ou te vavae‘eseina le tupua ‘ua ta ma le tupua u‘amea i le fale o ou atua; ‘ou te faia ai lou tu‘ugamau; auā na leaga lava oe.”#2 Tu 19.37; Isai 30.33; Eseki 32.21-23
15Fa‘auta ‘ea, o i luga o mauga o vae o lē fai mai le tala lelei, o lē logologo mai i le manuia; Iuta e, ‘ia e fai au tausamiga, ‘ia e avatu mea na e tautō ai; auā e lē toe ui atu lava ‘iā te oe le tagata amio leaga; ‘ua matuā fano o ia.#Isai 52.7; Ioe 3.17; Roma 10.15
Currently Selected:
Nauma 1: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
