Mareko Fa‘atomuaga.
Fa‘atomuaga.
O ai Mareko? E i ai le talitonuga o le isi igoa o le tusitala lenei o Ioane Mareko, o le tama a le fafine e igoa ‘iā Maria sa nofo i Ierusalema (Galu 12.12). E i ai fo‘i le talitonuga o se tagata e ‘āiga ma Panapa (Kolo 4.10) lea sa galulue ma Paulo i le tala‘i atu o le Tala Lelei (Kolo 4.10; Galu 12.12, 13.5-13, 15.37-79; 2 Timo 4.11). O Mareko o se tasi fo‘i o so‘o sa fesoasoani tele ‘iā Peteru ‘Aposetolo i le galuega fa‘atala‘i. E masani Peteru ‘ona fa‘aigoa Mareko o lona atali‘i i le Tala Lelei. (1 Peteru 5.13)
O le aotelega o le manatu ‘autū o le tusitala; o Iesu o le Tala Lelei (Euaggelion) ma o le Alo moni o le Atua. ‘Ua fa‘aalia lea i ana galuega mamana ma lana pule faitalia. ‘Ua manino mai lenei pule e ala mai i ana a‘oa‘oga, galuega fa‘avāvega, fa‘amāgaloga o agasala a tagata ma le tutuliga o temoni. O nei mea uma ma isi galuega lelei e tele sa faia e Iesu e atagia mai ai o Iesu o le Atua moni. O le isi itū e fia fa‘ailoa mai e Mareko, o le itū tagata lea o Iesu, e ala lea i fa‘aosoosoga na o‘o ‘iā te ia, le papatisoga i le vai o Ioritana, ‘ae maise fo‘i lona fa‘asatauroina ‘ua vavala mai ai e leai sona natura atua. O le toetū a‘e o Iesu mai le oti o se tala maoa‘e ma ofoofogia, ‘ua fa‘amautūina ai, o Iesu o le Mesia moni sa folafolaina, e ao ‘ona fa‘atuatua i ai.
E le‘i mautinoa lelei le aso, le tausaga sa tusia ai lenei Evagelia, ‘ae o le tele o tāofi o le ‘au popoto i le ‘upu a le Atua e i le vā o le 65-70 tausaga i le vaitaimi ‘ua fa‘aigoaina o le tausaga o le Ali‘i. (Anno Domini)
O le Fa‘asologa o Matā‘upu:
O le amataga o le Evagelia 1.1-13
O galuega fa‘atala‘i a Iesu i Kalilaia 1.14—9.50
Mai Kalilaia i Ierusalema 10.1-52
O puapuagā i Ierusalema 11.1—15.47
O le maliu ma le toetū a‘e o Keriso 16.9-20
Currently Selected:
Mareko Fa‘atomuaga.: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.