Mika 2
2
O le A‘oa‘iga ‘ona o le Amio Leaga
1‘Oi talofa i ē mafaufau i amioletonu ma latou saunia mea leaga i o latou moega; pe a malama a‘e le taeao ‘ua latou faia auā ‘ua mafai ‘iā te i latou.#Isai 5.8; 10.1-2 2‘Ua latou manana‘o fo‘i i fanua ma latou fao ai fa‘asauā, ‘atoa ma fale ma latou ‘avea; ‘ua latou sauā atu i le tagata ma lona ‘āiga, o le tagata ma lona tofi.
3O le mea lea o lo‘o fa‘apea mai ai le ALI‘I: Fa‘auta, o lo‘o ‘ou mafaufau i se mea leaga i lenei lava ‘āiga, tou te lē mafai ‘ona ‘alo ‘ese ai o ‘outou ua tou te lē sāvavali fo‘i ma le fa‘asiasia; auā e leaga ia ona po.#Iere 8.3; Amo 3.1-2; 5.13 4E saunia se fa‘ata‘oto ‘iā te ‘outou i lea aso, e pese le pese e aualofa ai tele lava, e fa‘apea,
“‘Ua matuā fa‘atafunaina i tatou;
‘ua suia e ia le tofi o lo‘u nu‘u;
auē! ‘ua ia ‘ave‘eseina ai ‘iā te a‘u,
‘ua na tufatufa i o tatou fanua ‘ina ‘ia liliu‘eseina.”
5O le mea lea o le a leai ai ‘iā te oe sē na te lāfolafoina se maea pe a fai le vili i le fa‘apotopotoga a le ALI‘I.#Iosu 14.1-2
6‘Ua latou fa‘apea mai i ē vavalo mai, “‘Aua ne‘i ‘outou vavalo.” “Latou te lē vavalo ‘iā te i latou nei, e lē mavae le māsiasi.” 7‘Oi! o ‘upu fa‘apea a le ‘āiga o Iakopo! E vaivai ‘ea le Agaga o le ALI‘I. O ana ‘ea ia galuega? O a‘u ‘upu e lē lelei ai ‘ea le ‘ua savali ma le amiotonu?
8A ‘ua tula‘i lo‘u nu‘u talu mai anamua pei o sē ‘ua ita mai lava; ‘ua ‘outou fao le pulupulu ‘atoa ma le ‘ofu tele ‘iā te i latou o ē ui ane ma le fa‘atalanoa, o ē ‘ua fo‘i mai i le tau‘a.#2 No 28.8 9‘Ua ‘outou tulia fafine o lo‘u nu‘u i o latou fale e fiafia i ai; ‘ua ‘outou ‘ave ‘ese fo‘i lo‘u mamalu ‘iā latou fānau e fa‘avavau. 10Tutū ia i luga ‘outou, ‘inā ō ‘ese ia; auā e lē o lo ‘outou mālōlōga lenei; ‘ua leaga, o le mea lea e malaia ai ‘outou, e matuā tele fo‘i le malaia.#Levi 18.25; Teu 12.9; Epe 13.14
11‘Ai se tagata e savali e tusa ma lona loto ma le fa‘a‘ole‘ole e pepelo mai, e fa‘apea mai, “‘Ou te vavalo ‘iā te oe i le uaina ma le ‘ava; e ‘avea lava ia ma perofeta i lenei nu‘u.”
12Iakopo e, ‘ou te fa‘apotopoto lava ‘iā te ‘outou uma lava; ‘ou te aofa‘iina lava o ē totoe o Isaraelu, ‘ou te fa‘atasia i latou pei o le lafu mamoe i Posara, pei o le lafu manu i totonu o le mea e fafaga ai, latou te so‘ona ualolo ‘ona o le vao tagata.#Iere 31.10; Mika 4.7
13‘Ua alu a‘e i o latou luma lē na te lepetia, ‘ua latou lepeti ma latou ui ane i le faitoto‘a, ‘ua latou ō atu ai lava, e afio atu fo‘i lo latou Tupu i o latou luma, e muamua fo‘i le ALI‘I ‘iā te i latou.#2 Tu 25.10-11; Isai 52.12
Currently Selected:
Mika 2: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
