Mataio 27

O Iesu i Luma o Pilato

(Mare 15.1; Luka 23.1-2; Ioane 18.28-32)

1‘Ua ao, ‘ona taupulepule ai lea o le ‘au ositaulaga sili uma ma toeaina o le nu‘u ‘iā Iesu ‘ina ‘ia fasioti ‘iā te ia. 2‘Ua latou noanoa ‘iā te ia, ‘ona latou ta‘ita‘i ai lea ‘iā te ia ma tu‘u atu ai ‘iā Pilato le ali‘i pule.

O le Oti o Iuta

(Galu 1.18-19)

3‘Ua iloa e Iuta le fa‘alata, ‘ua fa‘asalaina o Iesu,#27.3 Iesu: O le fa‘aliliuga tuai; ia. ‘ona salamō ai lea o ia, ‘ua toe ‘ave tupe e tolugafulu i le ‘au ositaulaga sili ma toeaina.#Galu 1.16-18 4‘Ua fa‘apea atu, “‘Ua ‘ou agasala, ‘ina ‘ua ‘ou fa‘alata i lē ‘ua lē sala.” A ‘ua latou fa‘apea mai,

“Sa matou mea ‘ea lenā? Faitalia lava oe.”

5‘Ona lafo ai lea e ia o tupe i le malumalu, ‘ua alu ‘ese; ‘ona alu ai lea o ia ma sisi lona ua.#27.5 ‘ona alu ai lea o ia ma sisi lona ua: O le fa‘aliliuga tuai; ‘ona alu ai lea o ia ‘ua noa o ia e ia. #Galu 1.18; 2 Samu 17.23

6‘Ona tago ai lea o le ‘au ositaulaga sili i tupe, ‘ua fa‘apea ane. “E sā ‘ona tu‘u ia mea i le tu‘ugā‘oloa o le malumalu auā o le tau o le toto.” 7‘Ua latou filifili, ‘ona fa‘atau ai lea o le fanua o le fai ipu ‘omea, e tatanu ai tagata ‘ese. 8O le mea lea ‘ua igoa ai lea fanua, o le Fanua o le Toto, ‘ua o‘o lava i nei ona po.

9‘Ona taunu‘u ai lea o le ‘upu a le perofeta o Ieremia, ‘ua fa‘apea mai, “‘Ua latou tago i tupe e tolugafulu, o le tau lea o lē na fa‘atatauina, ma fa‘atatauina e nisi o le fānauga a Isaraelu;#Saka 11.12-13; Iere 32.6-9 10‘ona latou fa‘atau ai lea o le fanua o le fai ipu ‘omea, e pei ‘ona fetalai mai ai ‘iā te a‘u o le Ali‘i.”

‘Ua Fesiligia e Pilato Iesu

(Mare 15.2-5; Luka 23.3-5; Ioane 18.33-38)

11‘Ua tu Iesu i luma o le ali‘i pule; ‘ona fesili mai ai lea o le ali‘i ‘iā te ia, ‘ua fa‘apea mai, “O oe ‘ea o le tupu o tagata Iutaia?”

‘Ona fetalai atu ai lea o Iesu ‘iā te ia, “O lea lava.” 12‘Ua momoli ‘iā te ia e le ‘au ositaulaga sili ma toeaina, a ‘ua leai sana tali.

13‘Ona fai mai ai lea o Pilato ‘iā te ia, “‘Ua e lē fa‘alogo ‘ea i le tele o mea ‘ua latou molimau mai ai ‘iā te oe?”

14A ‘ua lē tali atu o Iesu#27.14 Iesu: O le fa‘aliliuga tuai; ia. ‘iā te ia i se ‘upu e tasi, ‘ona matuā ofo ai lea o le ali‘i pule.

‘Ua Fa‘asalaina Iesu i le Oti

(Mare 15.6-15; Luka 23.13-25; Ioane 18.39—19.16)

15‘Ua masani le ali‘i pule e tatala atu i lea tausamiga ma lea tausamiga i le motu o tagata se tasi tagata ‘ua noanoatia, o lē ‘ua latou loto i ai. 16O ona po ia sa i ai ‘iā te i latou le tagata ‘ua noanoatia na logologoā, e igoa ‘iā Parapa. 17O lea na fai atu ai Pilato ‘iā te i latou, ‘ina ‘ua potopoto i latou, “Po o ai tou te loto i ai ‘ou te tatalaina atu ‘iā te ‘outou? O Parapa ‘ea? po o Iesu lē ‘ua igoa ‘iā Keriso?” 18Auā ‘ua nā iloa o le matau‘a ‘ua latou tu‘uina atu ai o ia.#Ioane 11.47, 48; 12.19

19‘Ua ti‘eti‘e o ia i le nofoa fa‘amasino, ‘ona sau ai lea o le fe‘au mai lana avā, ‘ua fa‘apea mai, “Ne‘i e mao i lea tagata amiotonu; auā na ‘ou matuā tigāina analeilā i le miti ‘iā te ia.”

20A ‘ua fa‘aoso e le ‘au ositaulaga sili ma toeaina i le motu o tagata ‘ia latou fai atu, o Parapa, a ‘ia fasiotia Iesu. 21‘Ona fai atu ai lea o le ali‘i pule, ‘ua fa‘apea atu ‘iā te i latou, “O ai so lā‘ua tou te loto i ai ‘ou te tatalaina atu ‘iā te ‘outou?”

‘Ona latou fai mai ai lea, “O Parapa.”

22‘Ona fai atu ai lea o Pilato ‘iā te i latou, “Se a fo‘i le mea ‘ou te faia ‘iā Iesu o lē ‘ua igoa ‘iā Keriso?”

‘Ona fai mai ai lea o i latou uma ‘iā te ia, “‘Ia fa‘asatauroina o ia.”

23A ‘ua fai atu le ali‘i, “Pe se a fo‘i se leaga ‘ua ia faia?”

A ‘ua atili ai ‘ona ‘alalaga i latou, ‘ua fa‘apea mai, “‘Ia fa‘asatauroina o ia.”

24‘Ua iloa e Pilato, ‘ua lē aogā lana ‘upu, ‘ae atili ai le vāvāō, ‘ona tago ai lea o ia i le vai, ‘ua fafano ai ona lima i luma o le motu o tagata, ‘ua fa‘apea atu, “‘Ou te mamā a‘u i le toto o lenei tagata amiotonu faitalia lava ‘outou.”#Teu 21.6-9

25‘Ona tali mai ai lea o le nu‘u uma, ‘ua fa‘apea mai, “‘Ia i luga ‘iā i matou ma matou fānau lona toto.”#Galu 5.28

26‘Ona tatalaina atu ai lea e ia o Parapa ‘iā te i latou, a ‘ua sasaina e ia o Iesu ma tu‘uina atu o ia ‘ia fa‘asatauroina.

O le Fa‘atauemu o le ‘au Fitafita ‘iā Iesu

(Mare 15.16-20; Ioane 19.2-3)

27‘Ua ta‘ita‘iina Iesu e le ‘au a le ali‘i pule i le maota o le ali‘i, ‘ona latou fa‘apotopotoina ai lea ‘iā te ia o le ‘au uma. 28‘Ua latou tō‘eseina ona ‘ofu, ‘ona latou fa‘a‘ofuina ai lea o ia i le ‘ofu mūmū. 29‘Ua latou ta‘ata‘ai fo‘i la‘au tuitui ‘ua fai a‘i le pale, ‘ona latou fa‘ae‘e ai lea i lona ao, ‘ua tu‘u fo‘i le ū i lona ‘a‘ao taumatau; ‘ona latou to‘otuli ai lea i ona luma ‘ua fa‘atauemu mai ‘iā te ia, ‘ua fa‘apea mai, “Talofa le tupu o tagata Iutaia!” 30‘Ua feanu i latou ‘iā te ia, ‘ona latou tago ai lea i le ū, ma tā i lona ao.#Isai 50.6 31‘Ua uma ‘ona latou fa‘atauemu mai ‘iā te ia ‘ona latou tatala ‘ese lea o le ‘ofu ma fa‘a‘ofu ‘iā te ia i ona lava ‘ofu; ‘ona latou ta‘ita‘i atu ai lea ‘iā te ia ‘ia fa‘asatauroina.

‘Ua Fa‘asatauroina o Iesu

(Mare 15.21-32; Luka 23.26-43; Ioane 19.17-27)

32‘Ua latou ō atu, ‘ona iloa ai lea e i latou o le tagata Kurene, e igoa ‘iā Simona, ‘ua latou fa‘atauānau ‘iā te ia ‘ia ‘ave lona satauro. 33‘Ua latou o‘o atu i le mea ‘ua igoa o Kolokota, o lona uiga, o le mea o i ai le ulupo‘o; 34‘ona latou avatu lea ‘iā te ia le uaina ‘ua fefiloi ma le la‘au ‘o‘ona, ‘ia inu ai; ‘ua tofotofo e ia, a ‘ua lē mafai ‘ona inu ai.#Sala 69.21

35‘Ua latou fa‘asatauro ‘iā te ia, ‘ona tufatufa ai lea e i latou o ona ‘ofu, ‘ua latou fai ai le vili.#Sala 22.18 36‘Ua latou nonofo i lea mea ‘ua leoleo ‘iā te ia. 37‘Ua latou tu‘u fo‘i i luga a‘e o lona ao le tusi i le mea na molia ai o ia, “O IESU LENEI, O LE TUPU O TAGATA IUTAIA.” 38‘Ona latou fa‘asatauro lea fa‘atasi ma ia tagata fao mea e to‘alua, o le tasi i le itū taumatau, ma le tasi i le itū tauagavale.#Isai 53.12

39‘Ua fāifai ‘iā te ia o ē na ui ane ma lialia‘i o latou ulu,#Sala 22.7; 109.25 40‘ua fa‘apea mai, “O oe nā, o lē lepeti i le malumalu, ma toe faia i aso e tolu, ‘inā fa‘aola ia oe ‘iā te oe. ‘Āfai o oe o le Alo o le Atua, ‘inā alu ifo ia i le satauro.”

41‘Ua fa‘apea fo‘i ‘ona fa‘atauemu o le ‘au ositaulaga sili, ma le ‘au tusi‘upu, ma toeaina, ‘ua fa‘apea ane, 42“Na ia fa‘aolaina isi tagata, e lē mafaia e ia ‘ona fa‘aola ‘iā te ia. O le Tupu o Isaraelu o ia, ‘inā alu ifo nei lava o ia i le satauro, ‘ona tatou fa‘atuatua ai lea ‘iā te ia. 43Na fa‘atuatua o ia i le Atua, ‘inā lavea‘i mai nei le Atua#27.43 Atua: O le fa‘aliliuga tuai; ia. ‘iā te ia, ‘āfai e finagalo o ia ‘iā te ia; auā na ia fai mai, ‘O a‘u o le Atali‘i o le Atua.’”#Sala 22.8

44‘Ua fa‘apea fo‘i ‘ona tauemu ‘iā te ia o tagata fao mea ‘ua fa‘asatauroina ma ia.

O le Maliu o Iesu

(Mare 15.33-41; Luka 23.44-49; Ioane 19.28-30)

45‘Ua āfua mai i le tutonu o le lā, ‘ua pogisā uma ai le nu‘u, ‘ua o‘o lava i le itūlā e tolu. 46‘Ua lata i le itūlā e tolu, ‘ona ‘alaga ai lea o Iesu ma le leo tele, ‘ua fa‘apea atu, “Eli, Eli, lama sapatani?” O lona uiga lenei, “Lo‘u Atua e, lo‘u Atua e, se a le mea ‘ua e tu‘ulafoa‘i mai ai a‘u?”#Sala 22.1

47‘Ua fa‘alogo ai nisi o ē nā tutū mai, ‘ona latou fa‘apea atu ai lea, “‘Ua vala‘au atu lenei tagata ‘iā Elia.” 48‘Ona momo‘e mai ai lea o le tasi o i latou ‘ua tago i le omomi, ‘ua fufui ai i le vineka, ma tu‘u i luga i le pito la‘au, ‘ua fa‘ainu ‘iā te ia.#Sala 69.21

49A ‘ua fa‘apea ane i latou uma, “Tu‘u ai pea o ia, se‘i tatou iloa pe sau Elia na te fa‘aolaina o ia.”

50‘Ua toe ‘alaga Iesu ma le leo tele, ‘ona tu‘uina atu ai lea e ia o lona agaga.

51Fa‘auta fo‘i, ‘ua saeluaina le ‘ie puipui o le malumalu, ‘ua amata ifo i luga ‘ua o‘o i lalo; ‘ua lūlūina fo‘i le ‘ele‘ele, ‘ua māvaevae fo‘i papa;#Eso 26.31-33; Epe 10.19, 20 52‘ua avanoa fo‘i tu‘ugamau, ‘ua toe tutū mai fo‘i tino o tagata pa‘ia e to‘atele na momoe, 53na mavae fo‘i lona toetū mai, ‘ona latou ō mai ai lea mai tu‘ugamau, ma latou ō atu i le ‘a‘ai pa‘ia, ‘ua iloa i latou e tagata e to‘atele.

54O le ta‘ita‘i fo‘i o le to‘aselau ma ē na leoleo ‘iā Iesu fa‘atasi ma ia, na latou iloa le mafui‘e ma mea na faia, ‘ona latou matuā matata‘u ai lea, ‘ua fa‘apea ane, “E moni, o le Alo lava lenei o le Atua.”

55Sa i ai fo‘i fafine e to‘atele na va‘ava‘ai mamao mai, o i latou ia na mulimuli mai ‘iā Iesu mai Kalilaia ma ‘au‘auna mai ‘iā te ia;#Luka 8.2-3 56sa i ai ‘iā te i latou o Maria le Makatala, ma Maria le tinā o Iakopo ma Iosefa, o le tinā fo‘i o atali‘i o Sepetaio.

O le Falelauasiga o Iesu

(Mare 15.42-47; Luka 23.50-56; Ioane 19.38-42)

57‘Ua o‘o i le afiafi, ‘ona sau ai lea o le tasi tagata mau‘oa, o le Arimataia, e igoa ‘iā Iosefa, o ia fo‘i o le so‘o o Iesu; 58‘ua alu atu o ia ‘iā Pilato, ‘ua fa‘anoi atu ai i le tino o Iesu. ‘Ona fai atu ai lea o Pilato ‘ia tu‘u ane le tino. 59‘Ua ‘ave e Iosefa le tino, ‘ona aui ai lea i le ‘ie lino e mamā. 60‘Ua tu‘u ai i lona tu‘ugamau fou na foa i le papa; ‘ua fuli atu e ia le ma‘a tele i le gutu o le tu‘ugamau, ‘ona alu ai lea o ia.#Isai 53.9 61Sa i ai Maria le Makatala ma le isi Maria, sa la nonofo feagai ma le tu‘ugamau.

O le ‘au Leoleo i le Tu‘ugamau

62O le taeao, o le aso lea e tuā‘oi ma le aso o le sauniga, ‘ua fa‘apotopoto atu ai ‘iā Pilato le ‘au ositaulaga sili ma le ‘au faresaio, 63‘ua fa‘apea atu, “Le ali‘i e, ‘ua matou manatua, na fai mai lenā tagata pepelo, ‘ina o ola mai o ia, ‘A mavae aso e tolu ‘ou te toetū mai ai lea.’#Mata 16.21; 17.23; 20.19; Mare 8.31; 9.31; 10.33-34; Luka 9.22; 18.31-33 64O lenei, ‘ia e fetalai ane, ‘ia fa‘amauina le tu‘ugamau se‘ia o‘o i le aso tolu, ‘ina ne‘i ō atu ona so‘o i le po ma gaoi ‘iā te ia, ma latou fai atu i le nu‘u, ‘‘Ua toetū mai o ia nai ē ‘ua oti;’ ‘ona sili ai lea o le pepelo e mulimuli i le na muamua.”

65‘Ona fai ane ai lea o Pilato ‘iā te i latou, “‘Ua ‘iā te ‘outou leoleo, ‘inā ō ia, faitalia lava ‘outou ‘ona fa‘amau ai.”

66‘Ona latou ō ai lea, ‘ua fa‘amauina le tu‘ugamau, ‘ua fa‘amaufa‘ailoga i le ma‘a ma tu‘u ai tagata e leoleo.#Tani 6.17

Currently Selected:

Mataio 27: RSCB

Highlight

Copy