Mataio 23

O le Amio Leaga a le ‘au Tusi‘upu ma le ‘au Faresaio

(Mare 12.38-39; Luka 11.39-52; 20.45-46)

1‘Ona fetalai atu ai lea o Iesu i le motu o tagata ma ona so‘o, 2‘ua fa‘apea atu, “‘Ua ti‘eti‘e le ‘au tusi‘upu ma le ‘au faresaio i le nofoa o Mose. 3O lea ‘ia ‘outou usiusita‘i ma ‘ia ‘outou faia mea uma latou te fai atu ai ‘iā te ‘outou; ‘ae ‘aua tou te fa‘aa‘oa‘o ‘iā latou amio; auā ‘ua latou fai atu, ‘ae latou te lē faia. 4Auā ‘ua latou saisai avega mamafa ma le ‘avegatā ma latou fa‘ae‘e i ua o tagata; ‘ae latou te lē mafafai ‘ina fa‘agāoioi ai i so latou tamatama‘i lima. 5‘Ua latou fai a latou galuega uma, ‘ina ‘ia iloa ai e tagata; ‘ua latou fa‘alautele ‘iā latou filateri ma fa‘atele i tu‘upao o latou ‘ofu.#Mata 6.1; Nume 15.38; Teu 6.8 6‘Ua latou fiafia fo‘i i nofoaga tāua i faigā‘ai ma nofoa e sili i sunako, 7ma ‘ia alofaina i latou i malae, ‘ia ta‘ua fo‘i i latou e tagata, Rapi.#23.7 Rapi: mai le gagana fa‘a-Arama o lona uiga “Pule” po o le “Matai” po o le “A‘oa‘o.” 8A o ‘outou, ‘aua ne‘i ta‘ua ‘outou o rapi; auā e to‘atasi la ‘outou a‘oa‘o; a o ‘outou uma o le ‘au uso. 9‘Aua fo‘i ne‘i tou ta‘ua se tasi i le lalolagi o lo ‘outou tamā; auā e to‘atasi lo ‘outou Tamā, o i le lagi ia. 10‘Aua fo‘i ne‘i ta‘ua ‘outou o a‘oa‘o; auā e to‘atasi la ‘outou a‘oa‘o, o le Keriso lea. 11A o lē sili ‘iā te ‘outou ‘ia fai lea ma a ‘outou ‘au‘auna.#Mata 20.26-27; Mare 9.35; 10.43-44; Luka 22.26 12O sē fa‘amaualuga o ia ‘iā te ia, e fa‘amaulaloina lea; a o sē fa‘amaulalo o ia ‘iā te ia, e fa‘amaualugaina lea.#Fa‘ata 29.23; Iopu 22.29; Eseki 21.26; Luka 18.14; 1 Pete 5.5

O ‘Upu Fāifai a Iesu i le ‘au Tusi‘upu ma le ‘au Faresaio

(Mare 12.40; Luka 11.39-42, 44, 52; 20.47)

13“‘Oi talofa ‘iā te ‘outou tusi‘upu ma faresaio, tagata fa‘afiaamiotonu auā ‘ua ‘outou pupuni le mālō o le lagi i tagata; auā tou te lē ulu atu i ai ‘outou, ‘ua ‘outou vavao fo‘i i ē a ulu atu i ai. 14‘Oi talofa ‘iā te ‘outou tusi‘upu ma faresaio, tagata fa‘afiaamiotonu! auā ‘ua ‘outou fa‘auma fale o fafine ‘ua oti a latou tane, ‘ua fa‘alevaleva fo‘i a ‘outou tatalo e fai ma ufiufi; o le mea lea e atili ai lava ‘ona fa‘asalaina ‘outou.#23.14 O nisi fa‘aliliuga e lē maua ai le fuai‘upu 14. 15‘Oi talofa ‘iā te ‘outou tusi‘upu#23.15 tusi‘upu: mai le fa‘a-Eperu “sopher,” tagata poto faitau tusi ma tusitusi ma faresaio, tagata fa‘afiaamiotonu. Auā ‘ua so‘o le sami ma le lau‘ele‘ele ‘iā te ‘outou ‘ina ‘ia lotu mai o se tasi; pe a maua fo‘i o ia, ‘ona ‘outou faia lea o ia ma tagata o Kēna ‘ua sili ‘ona leaga ‘iā te ‘outou.

16“‘Oi talofa ‘iā te ‘outou ta‘ita‘i tauaso! o ē fai mai, ‘‘Ai sē tautō i le malumalu ‘ua leai lea; a o sē tautō i le auro o le malumalu, ‘ua mau lea.’ 17Tagata vālea e ma le tauaso; auā o lē fea ‘ua sili, o le auro ‘ea po o le malumalu ‘ua pa‘ia ai le auro? 18I le ma lea, ‘‘Ai sē tautō i le fatafaitaulaga, ‘ua leai lea; a o sē tautō i le taulaga ‘ua i ona luga, ‘ua mau lea.’ 19Tagata vālea e ma le tauaso; auā o lē fea ‘ua sili, o le taulaga ‘ea, po o le fatafaitaulaga ‘ua pa‘ia ai le taulaga?#Eso 29.37 20O lenei, o lē tautō i le fatafaitaulaga, ‘ua ia tautō i ai ma mea uma ‘ua i ona luga; 21o lē tautō fo‘i i le malumalu, ‘ua ia tautō i ai ma lē o afio ai. 22O lē tautō fo‘i i le lagi, ‘ua ia tautō i le nofoāli‘i o le Atua ma lē o ti‘eti‘e ai.#Isai 66.1; Mata 5.34

23“‘Oi talofa ‘iā te ‘outou tusi‘upu ma faresaio, tagata fa‘afiaamiotonu. ‘Ua ‘outou avatu mea e sefulua‘i o le mili ma le aneto ma le kumina, a ‘ua tu‘u e ‘outou o mea silisili o i le tulafono, o le amiotonu ma le alofa ma le fa‘amaoni; e tatau pe ana faia nei mea, ‘ae ‘aua fo‘i le tu‘u na mea.#Levi 27.30 24O ‘outou ta‘ita‘i tauaso, ‘ua ‘outou fa‘apilia le namu, a ‘ua ‘outou folo ‘atoa le kamela.

25“‘Oi talofa ‘iā te ‘outou tusi‘upu ma faresaio, tagata fa‘afiaamiotonu. ‘Ua ‘outou fa‘amamā i le tua o le ipu ma le tanoa, a o totonu ‘ua tūtūmu i mea ‘ua faoa ma le amio leaga.#Mare 7.4 26O oe nā lē faresaio tauaso, ‘ia e mua‘i fa‘amamā i totonu o le ipu ma le tanoa, ‘ina ‘ia mamā ‘atoa ma le tua.#Tito 1.15; Ioane 9.40

27“‘Oi talofa ‘iā te ‘outou tusi‘upu ma faresaio, tagata fa‘afiaamiotonu. Auā e tutusa ‘outou ma tu‘ugamau ‘ua fa‘asinasinaina, o lo‘o matagofie i fafo, a o totonu ‘ua tūtūmu i ivi o tagata oti ma mea leaga uma.#Galu 23.3 28E fa‘apea fo‘i ‘outou, o fafo ‘ua mataamiotonu i luma o tagata, a o totonu, ‘ua tūtūmu ‘outou i le pepelo ma le amioletonu.#Luka 16.15

‘Ua Valo‘ia e Iesu le I‘uga o le ‘au Fa‘afiaamiotonu

(Luka 11.47-51)

29“‘Oi talofa ‘iā te ‘outou tusi‘upu ma faresaio, tagata fa‘afiaamiotonu. Auā, ‘ua ‘outou ati a‘e tu‘ugamau o perofeta, ‘ua ‘outou teuteu fo‘i loa o tagata amiotonu, 30ma ‘outou fa‘apea ane, ‘‘Ana matou i ai i ia ona po o matou tamā, po ‘ua matou lē ‘au fa‘atasi ma i latou i le fasiga o perofeta.’ 31O lea, ‘ua molia ai ‘outou e ‘outou, o fānau ‘outou a ē na fasiotia perofeta.#Galu 7.52 32O ‘outou fo‘i, ‘ia ‘outou fa‘atumuina le fua a o ‘outou tamā. 33O ‘outou gata, o fānau a gata fe‘ai pe fa‘apefea ‘ona ‘outou sōsōla i le fa‘asala i Kēna? 34Fa‘auta mai, o le mea lea ‘ou te ‘a‘auina atu ai ‘iā te ‘outou o perofeta, ma tagata popoto, ma tusi‘upu; o isi o i latou tou te fasiotia ma fa‘asatauroina; a o isi, tou te sasaina i o ‘outou sunako, ma tulituliloa ‘iā te i latou i lea ‘a‘ai ma lea ‘a‘ai.#Mata 13.52; 10.23; 1 Tesa 2.15 35‘Ina ‘ia o‘o ‘iā te ‘outou le toto uma a ē amiotonu ‘ua fa‘amaligiina i le lalolagi, e āfua i le toto o Apelu le tagata amiotonu, e o‘o i le toto o Sakaria le atali‘i o Parakaio, na ‘outou fasiotia i le vā o le malumalu ma le fatafaitaulaga.#Kene 4.8; 2 No 24.20-21 36E moni, ‘ou te fai atu ‘iā te ‘outou, e o‘o mai nei mea uma i luga o lenei tupulaga.

O le Alofa o Iesu ‘iā Ierusalema

(Luka 13.34-35)

37“Ierusalema e, Ierusalema e, o lē fasiotia perofeta ma fetogi i ma‘a i ē ‘ua ‘a‘auina atu ‘ia te oe; ‘ua tele lava lo‘u mana‘o e fa‘apotopoto i lau fānau, e pei o le moa ‘ona ofaofata‘i i lana toloa‘i i lalo i ona ‘apa‘au ‘ae le‘i mafafai ‘outou.#Luka 13.34, 35; Galu 7.59; 1 Tesa 2.15 38Fa‘auta, ‘ua tu‘ua lo ‘outou fale, e fa‘atafunaina.#Iere 22.5 39Auā ‘ou te fai atu ‘iā te ‘outou, tou te lē toe iloa mai a‘u, se‘ia ‘outou fai mai, ‘‘Ia manuia lē maliu mai i le suafa o le Ali‘i.’”#Sala 118.26

Currently Selected:

Mataio 23: RSCB

Highlight

Copy