Iopu 40
40
O isi Afioga a le Atua ‘iā Iopu
1‘Ua tali mai pea le ALI‘I ‘iā Iopu, ‘ua fa‘apea mai,
2“O lē finau ma Lē e ona le malosi uma lava, na te a‘oa‘i mai ‘ea?#Iopu 33.13
O lē fa‘atonu mai i le Atua, ‘ia tali mai o ia i lea mea.”
Iopu.
3‘Ona tali atu ai lea o Iopu i le ALI‘I, ‘ua fa‘apea atu,
4“Fa‘auta, ‘ua fa‘atauva‘a lava a‘u, se a se mea ‘ou te tali atu ai ‘iā te oe?#Esera 9.6; Iopu 21.5
‘Ou te tu‘u a‘e lo‘u lima i lo‘u gutu.
5‘Ua ‘ou tautala atu fa‘atasi, ‘ae ‘ou te lē toe tali atu;
‘ua fa‘alua fo‘i, ‘ae ‘ou te lē toe fa‘aopoopo i ai.”
6‘Ona tali mai ai lea o le ALI‘I ‘iā Iopu mai le afā, ‘ua fa‘apea mai:
O le Ali‘i
7“‘Inā fusi ia lou sulugātiti e pei o le tagata malosi;#Iopu 42.4
‘ou te fesili atu ‘iā te oe, ‘inā e fa‘ailoa mai ia ‘iā te a‘u.
8‘E te fa‘alēaogāina ‘ea la‘u lava fa‘atonuga?
‘E te fa‘asala ‘ea ‘iā te a‘u, ‘ina ‘ia ta‘uamiotonuina oe?
9‘Ua ‘iā te oe ‘ea le lima e pei o lo le Atua?#Iopu 37.4; Sala 89.13; Isai 63.12
pe ‘e te faititili ‘ea ma le leo e pei o ia?
10“‘Inā e teteu ia oe i le mamalu ma le maluali‘i;
ma ‘ia e ‘ofu i le vi‘iga ma le matagofie.
11‘Inā sasa‘a solo atu ia le tele o lou ita;#Isai 2.11-17; Tani 4.7
‘ia e va‘ai atu fo‘i i ē fa‘amaualuga uma lava, ma ‘ia e fa‘amaulaloina i latou.
12Va‘ai atu ia i ē fa‘amaualuga uma,#Iopu 36.20; Isai 63.3
ma ‘ia e fa‘ato‘ilaloina i latou;
‘ia e solipalaina fo‘i o ē amio leaga i le mea o i ai i latou.
13‘Ia e tanumia i latou fa‘atasi i le ‘ele‘ele;#Isai 2.10
‘ia e fusi o latou mata i le mea lilo.
14‘Ona ‘ou ta‘utino atu ai lea ‘iā te oe,#Isai 59.16
‘ua mafai ‘ona fa‘aolaina oe i lou lima taumatau.
15“Fa‘auta ‘ea i le Pemota, o lē na ‘ou faia fa‘atasi ma oe,
na te ‘aina le mutia e pei o le povi.
16Fa‘auta, ‘ua i ai lona malosi i lona pāpātua,
ma lona malosi fo‘i ‘ua i ai i mea mamaso o i lona manava.
17‘Ua ia fa‘amalo‘u i lona i‘u e pei o le arasi,
‘ua felavasa‘i ua o lona tulāi‘u.
18O ona ivi, o ivi ‘apamemea ia;
o ona ivi e pei o se ‘oso u‘amea.
19“O le sili ia o mea na faia e le Atua;#Fa‘ata 8.22
o lē na faia o ia ‘ua ia tu‘u atu i ai lana pelu.
20Auā ‘ua fua mai mea e ‘ai mā ia i mauga,#Sala 104.26
‘ua ta‘a‘alo ai manu fe‘ai uma o le vao.
21E ta‘oto o ia i lalo o la‘au paolo,#Sala 68.30
i mea lilo o i ai u ma palapala.
22‘Ua malu‘ia o ia i le paolo o la‘au paolo;
‘ua si‘omia o ia i garava i le alia.
23Fa‘auta, a osofia ‘auvai o le vaitafe, e lē sola lava o ia;
e lē fefe fo‘i o ia pe a fa‘atumuina lona gutu i vai o le Ioritana.
24O ai sē na te mafaia ‘ona pu‘e ‘iā te ia
a o va‘ai mai? pe tuia lona isu a o lavea i mailei?
Currently Selected:
Iopu 40: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
