Iopu 20
20
O le Tali a Sofara ‘iā Iopu
Sofara
1‘Ona tali mai ai lea o Sofara o le Naama, ‘ua fa‘apea mai,
2“E moni, o o‘u mafaufauga lava ‘ou te tali atu ai,
‘ona o lo‘u popole fo‘i o i totonu ‘iā te a‘u.
3‘Ua ‘ou fa‘alogo atu i le a‘oa‘iga e fa‘amāina ai a‘u,
o le fa‘autauta fo‘i o lo‘u loto ‘ou te tali atu ai.
4‘Ua e lē iloa ‘ea lenei mea talu mai le fa‘avavau,#Teu 4.32
talu ‘ona tu‘uina o le tagata i le lalolagi,
5e sa‘asa‘a le ‘alaga fiafia o ē amio leaga,
o le ‘oli‘oli fo‘i o le tagata fa‘alēmata‘u o le ‘emo o le mata lea?
6E ui lava ‘ina o‘o a‘e lona silisili i le lagi,#Isai 14.13-14; Ope 1.4
ma papa‘i atu lona ulu i ao,
7e fano o ia e fa‘avavau e pei o lona otaota;
e fai mai i latou o ē na iloa o ia,
‘O ifea o i ai o ia?’
8E lele ‘ese o ia e pei o le li‘a, e lē maua fo‘i o ia:#Sala 83.10; 90.5
e tuli‘eseina lava o ia e pei o le mea e va‘aia i le po.
9O mata na va‘ai ‘iā te ia, e lē toe iloa o ia;
e lē toe iloa fo‘i o ia i le mea sa i ai o ia.
10E fa‘alelei atu ona atali‘i i ē matitiva,
ma toe avatua e ona lima lona ‘oloa.
11‘Ua tūtūmu ona ivi i ana agasala na faia ‘ina o taule‘ale‘a,#Iopu 21.26
e ta‘o‘oto fo‘i fa‘atasi ma ia i le ‘ele‘ele.
12“E ui lava ‘ina suamalie le amio leaga i lona gutu,#Sala 10.7
ma ‘ua ia natia ai i lalo o lona laulaufaiva;
13e ui lava ‘ina fa‘apelepeleina ai e ia, ma na lē lafoa‘iina;
‘ae tāofia pea i lona gutu;
14‘ae liua ana mea e ‘ai i lona manava,#Teu 32.33
e ‘avea ma mea ‘o‘ona a asipi i totonu ‘iā te ia.
15Na ia foloina le ‘oloa, ‘ae toe pua‘i mai ai,
e fa‘ate‘aina ai e le Atua i lona manava.
16E miti e ia le mea ‘o‘ona a asipi,#Isai 59.5
e oti o ia i le laulaufaiva o le gata.
17E lē va‘ai o ia i vaitafe,#Teu 32.13-14; Iopu 29.6; Sala 36.8
o tafe o alia o le meli ma le suāsusu.
18E toe avatua e ia o le mea na ia galue ai, na te lē ‘ai ai fo‘i;
e pei o ‘oloa e toe avatua, na te lē fiafia i ai.
19Auā ‘ua ia fa‘asauāina ma tu‘ulafoa‘iina ē ‘ua matitiva;
‘ua ia faoa le fale na ia lē faia.
20“O le mea lea e lē iloa ai e ia se filemū i totonu ‘iā te ia,#Fa‘ata 17.1; Fai 5.13-14; Isai 59.8
e lē fa‘asaoina e ia lana mea ‘ua ia mana‘o tele i ai.
21E lē toe i ai sina ana mea e ‘ai;
o le mea lea e lē tumau ai lona manuia.
22E puapuagātia o ia a o faula‘i lava ana mea;
e o‘o atu ‘iā te ia lima uma o ē ‘ua tigāina.
23A o fa‘atumuina lona manava,
e fa‘ao‘oina e le Atua ‘iā te ia lona to‘asā tele,#Nume 11.33
e fa‘atotō ifo ai fo‘i e ia i luga ‘iā te ia a o ‘ai o ia.
24E sola ‘ese o ia i le ‘au‘upega u‘amea,#2 Samu 22.35; Amo 5.19
e fana ‘ia ati i le ‘aufana ‘apamemea.
25E tōina ia, e fa‘ate‘a‘eseina fo‘i i le tino;
e alu atu le pelu pupula a‘i lona au ‘o‘ona;
‘ua i ona luga o mea e mata‘utia.
26‘Ua teteu pouliuli uma e fai mōna ‘oloa;#Iopu 15.34; Sala 21.9
e ‘aina o ia e le afi ‘ua lē ulaina;
e malaia lē ‘ua toe i lona fale ‘ie.
27E fa‘aalia e le lagi lana amioleaga;#Iopu 16.18-19
e tula‘i atu fo‘i le lalolagi e tete‘e ‘iā te ia.
28E ‘ave‘esea le ‘oloa o i lona fale,
e tāfea i le aso o lona to‘asā.
29O le tofi lenei o le tagata amio leaga mai le Atua,#Iopu 18.21; 27.13
o le tofi fo‘i ‘ua tofia ‘iā te ia e le Atua.”
Currently Selected:
Iopu 20: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
