Iopu 14
14
O ‘Upu a Iopu i le Pu‘upu‘u o lenei Olaga ma lona Leaga
1“O le tagata na fānau mai i le fafine,#Kene 47.9; Iopu 5.7; 10.20; 15.14; 16.22; Sala 39.5; 89.47
‘ua sa‘asa‘a ona aso, ‘ua tumu fo‘i o ia i le atuatuvale.
2E tupu a‘e o ia e pei o le fuga, ‘ae sala‘eseina;#Iopu 8.9; 17.7; Sala 37.2; Fai 6.12; Isai 40.6-7; Iako 1.10; 1 Pete 1.24
e mavae atu fo‘i o ia e pei o le ata ma ‘ua lē tumau.
3Se tagata fa‘apenā ‘ea e silasila i ai ou fofoga,
ma e ‘aumai ‘iā te a‘u e fa‘amasinoina fa‘atasi ma oe?
4Po o ai ‘ea e ‘aumai se mea mamā#Iopu 15.14; Sala 51.5; Ioane 3.6
nai le mea ‘ele‘elea? e leai se tasi.
5Fa‘auta, ‘ua tu‘upoina ona aso; o lo‘o ‘iā te oe le faitau o ona masina;
‘ua e tu‘uina lona tuā‘oi e lē sopo‘ia e ia.
6O lea ‘ia e silasila ‘ese ai ‘iā te ia,#Iopu 7.1, 19
‘ia mapu ai o ia, se‘ia fa‘a‘atoaina e ia lona aso e pei o lē ‘ua galue i le taui.
7“Auā a tā le la‘au, e fa‘amoemoe e toe tupu,
e lē aunoa fo‘i ma ona tātupu.
8E ui lava ‘ina ‘ua leva ona a‘a i le ‘ele‘ele#Isai 11.1
ma ‘ua mate lona tafu‘e i le ‘ele‘ele,
9‘ae toe tupu a‘e i le susū o le vai,
ma tutupu ‘ona la, e pei o le la‘au tupu.
10A o le tagata e oti o ia ma ta‘atia,#Iopu 20.7
e tō fo‘i le mānava a le tagata, ‘ona ifea lea o ia?
11E pe le suāvai nai le vai,
e mate fo‘i le vaitafe ma ‘ua matūtū.
12E ta‘oto fo‘i le tagata ‘ae lē toe tula‘i,#Sala 72.5; 89.29; Mata 5.18; Ioane 11.11
se‘ia mavae le lagi, latou te lē ala,
e lē fāgua fo‘i i latou i lo latou moe.
13E! fia natia a‘u e oe i le tu‘ugamau ma ‘ia e fa‘aliloina a‘u,#Isai 26.20
se‘ia mavae atu lou to‘asā.
‘Ia e ‘atofaina mai se aso mo a‘u,
ma ‘ia e manatua mai ai a‘u.
14‘Āfai e oti le tagata, e toe ola mai ‘ea o ia?
‘Ou te fa‘atalitali atu i aso uma o le tau‘a ‘ua tofia ai a‘u,
se‘ia o‘o ‘ina suia o a‘u.
15‘Ia e vala‘au mai, ‘ona ‘ou tali atu ai lea ‘iā te oe;#Iopu 10.3; 13.22
‘ia e finagalo alofa i le galuega a ou ‘a‘ao.
16Auā ‘ua e faitaulia nei ‘ou la‘asaga,
e lē ‘ua e lamalama ‘ea i a‘u agasala?
17‘Ua fa‘amaufa‘ailogaina lo‘u solitulafono i le taga,#Teu 32.34; Hose 13.12
ma e fa‘aopoopoina fa‘atasi la‘u amioletonu.
18“E moni e mavae le mauga ‘ua solo,#Iopu 18.4; Isai 34.4
e si‘itia fo‘i le papa a‘i le mea sa i ai.
19E ‘aia ma‘a e le vai; e tāfea i le lolo le ‘ele‘ele o le fanua,
‘e te fa‘aumatia fo‘i le fa‘amoemoe o le tagata.
20‘E te manumālō pea lava ‘iā te ia, e alu ‘ese ai fo‘i o ia;
‘ua e liua ona mata, ‘ona e ‘auina atu ai lea o ia.
21E o‘o ‘ina mamalu ona atali‘i, ‘ae lē iloa e ia;#Fai 9.5
e fa‘alēaogāina fo‘i i latou, ‘ae lē lagona ai e ia.
22‘Ae tigāina lona lava tino,
ma fa‘anoanoa lona lava loto.”
Currently Selected:
Iopu 14: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
