Iopu 12
12
O le Tali a Iopu i le Lauga a Sofara
Iopu
1‘Ona tali atu lea o Iopu, ‘ua fa‘apea atu,
2“E moni, o le nu‘u lava ‘outou,
e oti fa‘atasi ‘outou ma le poto.
3O ‘iā te a‘u fo‘i le mafaufau e pei o ‘outou,#Iopu 13.2; 15.9
‘ou te lē fa‘atauva‘a ‘iā te ‘outou;
o ai ‘ea fo‘i sē ‘ua lē i ai mea fa‘apenā?
4‘Ua tauemu a‘u uō ‘iā te a‘u, ‘ae ‘ou te vala‘au atu i le Atua,
‘ona tali mai ai lea o ia ‘iā te a‘u,
‘ua tauemua le tagata amiotonu, o lē ‘ua sa‘o lana amio.
5E leai ni a ‘outou puapuagā
‘ae ‘ua ‘outou tauemu mai ‘iā te a‘u,
ma taia le tagata ‘ua mapeva lona vae.
6E saogalemū fale ‘ie o ē ‘ua fao mea,#Iopu 21.7
‘ua saogalemū fo‘i i latou o ē fa‘a‘ono‘ono i le Atua;
o ē ‘ua tu‘uina mai i ai mea e le Atua i o latou lima.
7“‘Ae peita‘i ‘inā e fesili atu ia i manu vaefā,
latou te a‘oa‘o mai ‘iā te oe;
ma manu felelei, latou te fa‘ailoa mai ‘iā te oe.
8Pe ‘e te tautala i le lau‘ele‘ele,
e a‘oa‘o mai ai o ia ‘iā te oe;
e fa‘amatala mai fo‘i ‘iā te oe e i‘a o le sami.
9Po o ai ‘ea e lē iloa i nei mea uma ‘ua faia ia mea e le ‘a‘ao o le ALI‘I?#Iopu 1.21; Isai 41.20
10‘Ua i ai i lona ‘a‘ao o le ola o mea ola uma,
ma le mānava a tagata ola uma lava.
11E lē fa‘amasino ‘ea e le taliga i ‘upu?#Iopu 34.3
e lē tofotofo ‘ea fo‘i e le gutu i ana mea e ‘ai?
12O lo‘o i ai le poto i ē ‘ua toeaina;
o le fa‘alevaleva fo‘i o aso e i ai le fa‘autauta.
13“O lo‘o i le Atua le poto ma le malosi,#Iopu 9.4; 36.5
o lo‘o ‘iā te ia le mafaufau ma le fa‘autauta.
14Fa‘auta, e lepetia e ia, ‘ae lē mafai ‘ona toe atiina a‘e;
e puipuia e ia le tagata, ‘ae lē toe tatalaina.
15Fa‘auta, e tāofia e ia le vai, ‘ona pe ai lea;#Kene 7.11-24; Teu 11.17; 1 Tu 8.35; 17.1; Sala 147.18; Amo 9.6
na te tu‘uina mai fo‘i,
‘ona olopalaina ai lea o le nu‘u.
16O lo‘o ‘iā te ia le malosi ma le poto;
o le fa‘asesē ma le tau fa‘asesē o lo‘o ‘iā te ia lea.
17Na te ta‘ita‘iina faipule fa‘atagataotau‘a,#2 Samu 17.23; Iopu 9.24; Isai 29.1, 4; 1 Kori 1.19
na te fa‘avaleaina fo‘i fa‘amasino.
18Na te tatalaina le noanoaga a tupu,
na te fusia fo‘i o latou sulugātiti i le fusi.
19Na te ta‘ita‘iina ositaulaga fa‘atagataotau‘a,
na te lafotū fo‘i i ē malolosi.
20Na te ‘avea le tautalaga a‘i i ē ‘ua fa‘amaoni,
na te ‘ave‘esea fo‘i le mafaufau o toeaina.
21Na te fa‘a‘inosia ali‘i,#Sala 107.40
na te tatalaina fo‘i le fusi o ē malolosi.
22Na te fa‘aalia mea loloto a‘i le pouliuli,
na te ‘aumaia fo‘i le ata o le oti i le malamalama.
23Na te fa‘ato‘ateleina nu‘u, na te fa‘aumatia fo‘i;#2 Tu 18.11; Isai 9.3; 26.15
na te fa‘alauteleina nu‘u, na te fa‘alauiti‘itia fo‘i.
24Na te ‘ave‘esea loto o ali‘i sili o nu‘u o le lalolagi,#Iopu 6.18; Sala 107.40
ma fa‘asesēina i latou i le mea gaogao, e lē o i ai se ala.
25E tautago i latou i le pouliuli, e leai se malamalama;#Iopu 5.14; Sala 107; 27; Isai 19.14
na te fa‘asesēina fo‘i i latou e pei o le tagata ‘ua ‘onā.
Currently Selected:
Iopu 12: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
