Ioane 8
8
O le Fafine na Mulilua
1‘Ona maliu atu lea o Iesu i le mauga o Olive. 2O le segisegi o le taeao#8.2 segisegi o le taeao: po o le taeao po; na toe maliu ane ai Iesu i le malumalu; ‘ua ō mai fo‘i le nu‘u uma ‘iā te ia; ‘ona nofo lea o ia i lalo, ma a‘oa‘o atu ‘iā te i latou. 3‘Ua ta‘ita‘iina mai e le ‘au tusi‘upu ma le ‘au faresaio le fafine na maua ‘ina o mulilua; ‘ua tu‘uina o ia e i latou i totonu; 4‘ua fa‘apea mai i latou ‘iā te ia, “Le a‘oa‘o e, ‘ua maua lenei fafine o mulilua. 5‘Ua poloa‘i Mose ‘iā te i tatou i le tulafono ‘ia fetogi i ma‘a o ē fa‘apea; a o oe, pe se a se mea ‘e te fetalai mai i ai?”#Levi 20.10; Teu 22.22-24 6‘Ua latou fa‘apea mai e tofotofo ‘iā te ia, ‘ina ‘ia maua e i latou se mea e molia ai o ia; a ‘ua punou Iesu, ma tusi i lona tamatama‘i lima i le ‘ele‘ele.
7A ‘ua latou fesili atu pea lava ‘iā te ia; ‘ona toe nofo lea o ia i luga, ma fa‘apea atu ‘iā te i latou, “O ai o ‘outou e leai sana agasala, ‘ia muamua togi se ma‘a ‘iā te ia.”#Teu 17.7 8‘Ona toe punou lea o ia ma tusi i le ‘ele‘ele. 9‘Ua latou fa‘alogo i ai, ‘ona ta‘ito‘atasi lea o i latou ma alu i fafo, e āfua mai i toeaina, ‘ua o‘o atu i ē aupito iti. ‘Ua tu‘ua na o Iesu lava, ma le fafine o lo‘o tu i totonu.#Mata 22.22; Roma 2.22 10‘Ua toe nofo i luga Iesu, ‘ua silafia ‘ua leai se tagata, ‘ua na o le fafine lava, ‘ona fetalai atu lea o Iesu#8.10 Iesu: O le fa‘aliliuga tuai; ia. ‘iā te ia, “Funa e, o ifea ‘ea i latou o ē na molia oe? ‘Ua lē fa‘asala mai ‘ea se tasi ‘iā te oe?”
11‘Ua fai mai o ia, “Le Ali‘i e, e leai lava se tasi.”
‘Ona fetalai atu lea o Iesu ‘iā te ia, “‘Ou te lē fa‘asala fo‘i ‘iā te oe; alu ia oe, ‘aua ‘e te toe agasala.”
O Iesu o le Malamalama o le Lalolagi
12‘Ona toe fetalai atu lea o Iesu ‘iā te i latou, ‘ua fa‘apea atu, “O a‘u nei o le malamalama o le lalolagi; o lē mulimuli mai ‘iā te a‘u, e lē savali o ia i le pouliuli, ‘ae ‘iā te ia le malamalama o le ola.”#Mata 5.14; Ioane 9.5; Isai 49.6
13‘Ona fai mai lea o le ‘au faresaio ‘iā te ia, “‘Ua e molimau oe ‘iā te oe lava; e lē fa‘amaoni lau mau.”#Ioane 5.31
14‘Ua tali atu Iesu ‘iā te i latou, ‘ua fa‘apea atu, “E ui lava ‘ina ‘ou molimau a‘u ‘iā te a‘u lava, ‘ae fa‘amaoni lava la‘u mau; auā ‘ua ‘ou iloa le mea na ‘ou sau ai, ma le mea ‘ou te alu i ai; a ‘ua ‘outou lē iloa le mea na ‘ou sau ai, ma le mea ‘ou te alu i ai. 15Tou te fa‘amasino fa‘aletino; ‘ou te lē fa‘amasino i se tasi. 16‘Ae ‘āfai ‘ou te fa‘amasino, e moni la‘u fa‘amasinoga auā ‘ou te lē to‘atasi lava a‘u, peita‘i o i mā‘ua ma le Tamā ‘ua ‘auina mai a‘u. 17‘Ua tusia i la ‘outou tulafono, E moni le mau a tagata e to‘alua.#Teu 19.15 18O a‘u nei lē molimau ‘iā te a‘u, o lo‘o molimau fo‘i ‘iā te a‘u le Tamā ‘ua ‘auina mai a‘u.”
19‘Ona latou fai mai lea ‘iā te ia, “O ifea lou Tamā?”
‘Ua tali atu Iesu, “E le‘i iloa e ‘outou o a‘u, po o lo‘u Tamā; ‘ana iloa e ‘outou o a‘u, po ‘ua iloa fo‘i e ‘outou o lo‘u Tamā.”
20‘Ua fetalai atu Iesu i nei mea i le mea e teu ai ‘oloa, ‘ina o a‘oa‘o atu o ia i le malumalu ‘ae le‘i pu‘ea o ia e se tasi, auā e le‘i o‘o i lona taimi.#Ioane 7.30; 13.1; Luka 22.53
E lē Mafai ‘ona e Alu i le mea ‘Ou te Alu i Ai
21‘Ona toe fetalai atu lea o Iesu ‘iā te i latou, “‘Ou te alu ‘ese, ‘ona ‘outou sā‘ili lea ‘iā te a‘u, ‘ae oti ‘outou ‘iā ‘outou agasala; e lē mafai e ‘outou ‘ona ō i le mea ‘ou te alu i ai.”
22‘Ona fai ane lea o Iutaia, “E fasioti ‘ea o ia ‘iā te ia lava? ‘ina ‘ua fa‘apea mai o ia, ‘E lē mafai e ‘outou ‘ona ō i le mea ‘ou te alu i ai.’”
23‘Ua fetalai atu fo‘i o ia ‘iā te i latou, “O ‘outou o lalo nei, o a‘u mai lugā; o ‘outou mai le lalolagi nei, ‘ae o a‘u ‘ou te lē mai le lalolagi nei.#Ioane 3.31 24O lea ‘ua ‘ou fai atu ai ‘iā te ‘outou, e oti ‘outou ‘iā ‘outou agasala; auā a ‘outou lē talitonu, o a‘u lenei o ia, ‘ona oti lea o ‘outou ‘iā ‘outou agasala.”
25‘Ona fai mai ai lea o i latou ‘iā te ia, “O ai ‘ea oe?”
‘Ona fetalai atu lea o Iesu ‘iā te i latou, “O a‘u o lē ‘ua ‘ou fai atu ai ‘iā te ‘outou talu le amataga. 26E tele mea ‘ua ‘iā te a‘u e tautala atu ai ma fa‘amasino ai ‘iā te ‘outou; a o ia ‘ua ‘auina mai a‘u, e moni lava o ia o mea ‘ua ‘ou fa‘alogo ai ‘iā te ia, o mea ia ‘ou te fai atu ai i le lalolagi.”#Ioane 8.38; 12.49
27E le‘i iloa e i latou ‘ua ia fetalai ‘iā te i latou i le Tamā. 28‘Ona fetalai atu lea o Iesu ‘iā te i latou, “Pe a si‘itia i luga e ‘outou le Atali‘i o le tagata, ‘ona iloa lea e ‘outou o a‘u lenei o ia; ‘ou te lē fai fua fo‘i se mea, ‘ae peita‘i, fa‘apei ‘ona a‘oa‘o mai e lo‘u Tamā ‘iā te a‘u, o mea ia ‘ou te tautala atu ai. 29O ia fo‘i ‘ua ‘auina mai a‘u, o lo‘o ‘iā te a‘u ia; e lē tu‘ua to‘atasi a‘u e le Tamā, auā ‘ou te faia pea lava o mea e lelei ‘iā te ia.”#Ioane 8.16; Mata 27.46
30‘Ua fetalai atu o ia i nei mea, ‘ona to‘atele ai lea o ē na fa‘atuatua ‘iā te ia.
O le ‘Upu Moni na te Fa‘asa‘olotoina ai Oe
31‘Ona fetalai atu lea o Iesu ‘iā Iutaia, o ē ‘ua fa‘atuatua ‘iā te ia, “‘Āfai tou te tumau pea i la‘u a‘oa‘oga, o o‘u so‘o moni ‘outou. 32E iloa fo‘i e ‘outou le mea moni, e tu‘u sa‘oloto fo‘i ‘outou e le ‘upu moni.”
33‘Ona tali mai lea o i latou ‘iā te ia, “O i matou nei o le fānau a Aperaamo, e le‘i fai lava i matou ma pologa o se tasi; pe fa‘apefea ‘ona e fai mai, ‘E tu‘u sa‘oloto ‘outou?’”#Mata 3.9; Luka 3.8
34‘Ua tali atu Iesu ‘iā te i latou, “E moni, e moni, ‘ou te fai atu ‘iā te ‘outou, o sē faia le agasala, o le pologa lea o le agasala.#Roma 6.16, 20; 1 Ioane 3.8 35O le pologa fo‘i, e lē tumau pea i le ‘āiga; a o le atali‘i, e tumau pea lava ia.#Kala 4.30 36O lenei pe ā tu‘u sa‘oloto ‘outou e le Atali‘i, ‘ona sa‘oloto fa‘amaoni ai lea o ‘outou. 37‘Ua ‘ou iloa o le fānau ‘outou a Aperaamo; a ‘ua ‘outou fia fasioti ‘iā te a‘u, auā ‘ua lē talia e ‘outou la‘u ‘upu. 38O a‘u nei ‘ou te tautala i mea na ‘ou iloa mai i lo‘u Tamā; o ‘outou fo‘i tou te faia mea ‘ua ‘outou iloa mai ō ‘outou tamā.”
39‘Ona tali mai lea o i latou ‘iā te ia, ‘ua fa‘apea mai, “O Aperaamo lo matou tamā.”
‘Ua fetalai atu Iesu ‘iā te i latou, “‘Āfai o fānau ‘outou a Aperaamo, po ‘ua faia e ‘outou o le amio a Aperaamo. 40A ‘ua ‘outou fia fasioti ‘iā te a‘u le tagata ‘ua tautala atu ‘iā te ‘outou i le ‘upu moni, sa ‘ou fa‘alogo ai mai le Atua. Sa le‘i faia lava e Aperaamo ni mea fa‘apea. 41‘Ua faia lava e ‘outou amio a lo ‘outou tamā.”
‘Ona fa‘apea mai lea o i latou ‘iā te ia, “E le ni tama toifale i matou; e tasi lo matou Tamā, o le Atua lea.”#Kene 3.15; Teu 23.2
42‘Ona fetalai atu Iesu ‘iā te i latou, “‘Āfai o lo ‘outou Tamā le Atua, po ‘ua ‘outou alofa mai ‘iā te a‘u, auā ‘ua ‘ou sau mai le Atua, ma ‘ou sau ‘i‘inei, auā fo‘i ‘ou te le‘i sau fua, a o ia lava ‘ua ‘auina mai a‘u. 43‘Ai se a le mea tou te lē malamalama ai i la‘u ‘upu? Auā tou te lē fia fa‘alogo i la‘u a‘oa‘oga.#Ioane 12.39; Mata 12.34; Roma 8.7 44O ‘outou nai lo ‘outou tamā, le tiapolo, tou te fia faia fo‘i mea e tu‘inanau i ai lo ‘outou tamā. O le fasioti tagata ia talu le amataga, e lē tu lava ia i le ‘upu moni, auā e lē o i totonu lava ‘iā te ia le ‘upu moni. A tautala ia i le tala pepelo, o lana lava lea e tautala ai, auā o le pepelo ia ma le tamā o le pepelo.#1 Ioane 3.8-10; Kene 3.4; 2 Pete 2.4 45‘Ae tou te lē talitonu mai ‘iā te a‘u, auā ‘ou te tautala i le ‘upu moni. 46O ai ‘ea o ‘outou na te fa‘ailoa mai sa‘u agasala? ‘Āfai fo‘i ‘ou te tautala i le mea moni, pe se a le mea tou te lē talitonu mai ai ‘iā te a‘u?#2 Kori 5.21; 1 Pete 2.22 47O lē mai le Atua, e fa‘alogo o ia i afioga a le Atua; o le mea lea tou te lē fa‘alogo ai, auā e lē mai le Atua ‘outou.”#Ioane 18.37; 1 Ioane 4.6
O Iesu ma Aperaamo
48‘Ona tali mai lea o Iutaia, ‘ua fa‘apea mai ‘iā te ia, “E lē ‘ua tonu ‘ea la matou ‘upu, o le Samaria oe, o lo‘o ‘iā te oe fo‘i le temoni?”
49‘Ua tali atu Iesu, “E lē ‘iā te a‘u le temoni; a ‘ou te āva lava a‘u i lo‘u Tamā; tou te lē āva mai fo‘i ‘iā te a‘u. 50‘Ou te lē sā‘ili fo‘i i so‘u vi‘iga; o le tasi o lo‘o sā‘ili, o lo‘o fa‘amasino fo‘i. 51E moni, e moni, ‘ou te fai atu ‘iā te ‘outou; ‘ai sē tausi i la‘u ‘upu, e lē iloa e ia le oti, e o‘o i le fa‘avavau.”#Ioane 5.24; 6.40, 47; 11.25
52‘Ona fai mai lea o Iutaia ‘iā te ia, “O lenei ‘ua matou iloa ‘ua ‘iā te oe le temoni; ‘ua oti Aperaamo ma le ‘au perofeta, a ‘ua e fai mai, ‘‘Ai sē tausi i la‘u ‘upu e lē o‘o le oti ‘iā te ia e o‘o i le fa‘avavau.’ 53‘Ua sili ‘ea oe i lo matou tamā o Aperaamo ‘ua oti o ia? O le ‘au perofeta, ‘ua oti i latou. Po o ai ‘ea oe ‘e te tautala ai fa‘apenā?”
54‘Ua tali atu Iesu, “‘Āfai ‘ou te vivi‘i a‘u ‘iā te a‘u, e lē aogā la‘u vi‘iga. O lo‘u Tamā o ia na te vi‘ia mai a‘u, ‘ua ‘outou fai mai, ‘o lo ‘outou Atua lea.’ 55E le‘i iloa fo‘i o ia e ‘outou, a ‘ua ‘ou iloa lava o ia; ‘āfai fo‘i ‘ou te fai atu, ‘ua ‘ou lē iloa lava o ia, ‘ona ‘avea lea o a‘u o le pepelo, e pei o ‘outou; peita‘i ‘ua ‘ou iloa lava o ia, ‘ou te tausi fo‘i i lana afioga. 56O Aperaamo lo ‘outou tamā, na matuā fiafia o ia auā sa va‘ai o ia i lo‘u aso, na va‘ai o ia ma ‘oli‘oli ai.”
57‘Ona fa‘apea mai lea o Iutaia ‘iā te ia, “E le‘i o‘o i le lima sefulu o ou tausaga, po ‘ua e iloa ‘ea Aperaamo?”#8.57 po ‘ua e iloa ‘ea Aperaamo?: O nisi fa‘aliliuga; pe na va‘ai Aperaamo ‘iā te oe?
58‘Ua fa‘apea mai Iesu ‘iā te i latou, “E moni, e moni, ‘ou te fai atu ‘iā te ‘outou, o a‘u o lē ola a o le‘i ola mai Aperaamo.”
59‘Ona latou fetāgofi lea i ma‘a e fetogi ‘iā te ia. ‘Ona lafi lea o Iesu, ‘ua ulufafo i le malumalu.#Ioane 10.31
Currently Selected:
Ioane 8: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.