Ioane 12
12
‘Ua Maliu atu Iesu i Petania
(Mata 26.6-13; Mare 14.3-9)
1‘Ua maliu atu Iesu i Petania, a o toe aso e ono i le fai ai le paseka, sa i ai Lasalo na oti, na ia toe fa‘atū ‘iā te ia nai ē ‘ua oti. 2‘Ona sauni ai lea e i latou o le faigā‘ai ma ia i lea mea, na ‘au‘auna ai fo‘i Mareta; a o Lasalo, o ia o le tasi o ē na nonofo e ‘a‘ai fa‘atasi ma ia. 3‘Ona tago ai lea o Maria i le pauna o le u‘u nato tau tele; ‘ua ia u‘u ai vae o Iesu, ma sōloi ona vae i lona lauulu; ‘ua tumu fo‘i le fale i le manogi o le u‘u. #Luka 7.37-38 4‘Ona fai ane lea o le tasi o ona so‘o, o Iuta le atali‘i o Simona le Sekara, o lē fa‘alata ‘iā te ia, 5“Pe se a le mea na lē fa‘atau ai lenā u‘u manogi i tenari e tolu selau, ma avatu ai i ē matitiva?” 6‘Ua lē fa‘apea ane o ia, ‘ina ‘ua alofa o ia i ē matitiva, a ‘ona o ia o le gaoi, ‘ua ‘iā te ia fo‘i le ‘ato tupe, ma na tau‘ave mea na fafao ai.
7‘Ona fa‘apea mai ai lea o Iesu, “Tu‘u pea ia ‘iā te ia; ‘ua teu e ia lenei mea mo le aso o le fa‘ata‘imū‘aga o lo‘u tanuga. 8Auā tou te nonofo pea ma ē matitiva, ‘ae tatou te lē nonofo pea ma a‘u.” #Teu 15.11
O le Taupulepulega Leaga e Fa‘asaga ‘iā Lasalo
9‘Ua iloa e le motu o tagata Iutaia e to‘atele, ‘ua i ai o ia i lea mea; ‘ona ō atu ai lea o i latou; e lē ‘ona o Iesu lava, a ‘ia latou iloa fo‘i Lasalo, na ia toe fa‘atūina nai ē ‘ua oti. 10A ‘ua taupulepule le ‘au ositaulaga sili, e fasioti fo‘i ‘iā Lasalo. 11Auā e to‘atele Iutaia na ō ‘ese ‘ona o ia ma latou fa‘atuatua ‘iā Iesu.
‘Ua Ulufale atu Iesu i Ierusalema
(Mata 21.1-11; Mare 11.1-11; Luka 19.28-40)
12O le taeao ‘ua fa‘alogo ai le motu o tagata ‘ua ō mai i le tausamiga, ‘ua maliu mai Iesu i Ierusalema. 13‘Ona ‘ave lea e i latou o lau o pama, ma ō mai e fa‘afetaia‘i ‘iā te ia; ‘ona latou ‘alalaga lea, “Osana! ‘Ia manuia lē afio mai i le suafa o le Ali‘i, o le Tupu o Isaraelu.” #Sala 118.25, 26
14‘Ua maua e Iesu le tama‘i asini, ‘ona ti‘eti‘e ai lea, fa‘apei ‘ona tusia,
15“‘Aua ‘e te fefe, o oe le tama fafine a Siona; #Saka 9.9
Fa‘auta, e afio mai lou Tupu,
o lo‘o ti‘eti‘e i le tama‘i asini.”
16‘Ua lē iloa e ona so‘o ia mea i le taimi lava lea; ‘ae ‘ina ‘ua o‘o Iesu i lona mamalu, ‘ona latou manatua lea ‘ua tusia ia mea ‘iā te ia; ‘ua latou faia fo‘i ia mea ‘iā te ia.#Ioane 7.39
17‘Ona molimau ai lea o le motu o tagata sa latou i ai ma ia, ‘ina ‘ua vala‘auina e ia o Lasalo nai le tu‘ugamau, ma toe fa‘atū mai ‘iā te ia nai ē ‘ua oti. 18O le mea lea ‘ua fa‘afetaia‘i ai ‘iā te ia le motu o tagata, auā ‘ua latou fa‘alogo atu na ia faia lenā fa‘ailoga. 19‘Ona fetautalatala‘i ai lea o le ‘au faresaio, “Tou te lē iloa ‘ea, ‘ua lē aogā sa tatou mea e fai? Fa‘auta, ‘ua mulimuli atu le lalolagi ‘iā te ia.”
O Tagata Eleni na latou Sā‘ili ‘iā Iesu
20Sa i ai isi tagata Eleni fa‘atasi ma ē na ō a‘e i le tausamiga e tapua‘i.#Ioane 7.35; 11.55 21O i latou ia na ō ane ‘iā Filipo o le Petesaita i Kalilaia o ia, ‘ua latou ole atu ‘iā te ia, ‘ua fa‘apea atu, “Le ali‘i e, matou te fia feiloa‘i ma Iesu.”
22‘Ona alu ane lea o Filipo, ‘ua ta‘u atu ‘iā Aneterea; ‘ona ta‘u atu ai lea e Aneterea ma Filipo ‘iā Iesu. 23‘Ua tali atu Iesu ‘iā te i lā‘ua, ‘ua fa‘apea atu, “‘Ua o‘o mai ona po e o‘o ai le Atali‘i o le tagata i lona mamalu. 24E moni, e moni, ‘ou te fai atu ‘iā te ‘outou, ‘Āfai e pa‘ū le fua o le saito i le ‘ele‘ele ma pala ai, e tumau pea o le mea e tasi; ‘ae ‘āfai e pala, ‘ona fua tele mai ai lea.#Roma 14.9; 1 Kori 15.36 25O lē fa‘apelepele i lona ola, e fa‘amaumau e ia i ai; a o lē ‘ino‘ino i lona ola i lenei lalolagi, e maua ai pea e ia e o‘o i le ola fa‘avavau. #Mata 10.39; 16.25; Mare 8.35; Luka 9.24; 17.33 26A fia ‘au‘auna mai se tasi ‘iā te a‘u, ‘ia mulimuli mai o ia ‘iā te a‘u; o le mea ‘ou te i ai, e i ai fo‘i la‘u ‘au‘auna; pe a ‘au‘auna mai fo‘i se tasi ‘iā te a‘u, ‘ona vi‘ia lea o ia e le Tamā.
‘Ua Fetalai Iesu i lona Maliu
27“O lo‘o ātu ne‘i lo‘u loto, pe se a fo‘i se tala ‘ou te fai atu? ‘Lo‘u Tamā e, fa‘aola mai ‘iā te a‘u a‘i lenei itū aso; a o le mea lava lea na ‘ou o‘o mai ai i lenei itū aso.’#Sala 6.3; 42.5; Mata 26.38 28Lo‘u Tamā e, ‘ia e tu‘uina atu le mamalu i lou suafa.”
‘Ona o‘o mai ai lea o le si‘ufofoga mai le lagi, “‘Ua ‘ou tu‘uina atu le mamalu, ‘ou te toe tu‘uina atu fo‘i i ai le mamalu.”#Ioane 1.51; 5.37; Mata 3.17; 17.5
29‘Ona fa‘apea ai lea o le motu o tagata sa tutū ma fa‘alogologo i ai, o lo‘o ‘ua faititili; a ‘ua fai mai nisi, “‘Ua fetalai se agelu ‘iā te ia.”
30‘Ona fetalai atu lea o Iesu, ‘ua fa‘apea atu, “E le‘i o‘o mai lenei si‘ufofoga ‘ona o a‘u, a ‘ona o ‘outou.#Ioane 11.42 31O lo‘o fa‘amasinoina nei lenei lalolagi; e tulia nei le ali‘i o lenei lalolagi.#Ioane 14.30; 16.11; Luka 10.18 32O a‘u fo‘i, ‘āfai e si‘itia a‘u ai le ‘ele‘ele, ‘ou te tōsina uma mai tagata ‘iā te a‘u.” 33‘Ua fetalai ane ia lea ‘upu e fa‘ailoa ai le uiga o lona maliu o le a maliu ai o ia.
34‘Ua tali mai le motu o tagata ‘iā te ia, “‘Ua matou fa‘alogo i le tulafono, e tumau pea le Keriso e fa‘avavau; pe fa‘apefea fo‘i ‘ona e fai mai, E tatau ‘ona si‘itia i luga o le Atali‘i o le tagata? O ai ‘ea lenei Atali‘i o le tagata?” #Sala 110.4; Isai 9.7; Eseki 37.25; Tani 7.14
35‘Ona fetalai atu lea o Iesu ‘iā te i latou, “E toe itiiti nai aso e i ai ‘iā te ‘outou le malamalama; sāvavali ia manū o ‘iā te ‘outou le malamalama, ne‘i maua ‘outou e le pogisā; o lē savali i le pogisā e lē iloa e ia le mea e alu i ai. 36‘Ia ‘outou talia le malamalama, manū o ‘iā te ‘outou le malamalama, ‘ina ‘ia ‘avea o ‘outou ma fānau a le malamalama.”#Efe 5.8; Mata 23.39
O le lē Talitonu o Tagata ‘iā Iesu
‘Ua fetalai atu ia mea e Iesu, ‘ona maliu ane lea o ia ‘ua lafi ‘iā i latou.
37‘Ua ia faia fa‘ailoga, e tele lava i o latou luma, ‘ae le‘i fa‘atuatua i latou ‘iā te ia, 38‘ina ‘ia taunu‘u ai le ‘upu a Isaia le perofeta, ‘ua ia fa‘apea mai:
“Le Ali‘i e, o ai ‘ea ‘ua talitonu i la matou ‘upu e taulogologo atu?
‘Ua fa‘aalia fo‘i ‘iā te ai le ‘a‘ao o le Ali‘i?”#Isai 53.1; Roma 10.16
39O lenei, e lē mafai e i latou ‘ona talitonu, auā ‘ua toe fa‘apea mai Isaia:#Isai 6.9, 10; Mata 13.14, 15
40“‘Ua ia fa‘atauasoina o latou mata,
ma na fa‘ama‘a‘aina o latou loto,
ne‘i va‘ai o latou mata,
ma lagona o latou loto,
ne‘i liliuina fo‘i i latou,
ma fa‘amālōlōina i latou.”
41Na fai mai ia ‘upu e Isaia ‘ina ‘ua va‘ai atu o ia i lona mamalu ma tautala mai ‘iā te ia.#Isai 6.1
42‘Ae peita‘i e to‘atele ali‘i ‘ua fa‘atuatua ‘iā te ia; ‘ae le‘i ta‘u atu ai, ‘ona o le ‘au faresaio, ne‘i tulia i latou i le sunako. 43Auā ‘ua sili lo latou mana‘o i le vi‘iga mai tagata, i le vi‘iga mai le Atua.
O le Atua le Tamā
44‘Ua ‘alaga atu Iesu, ‘ua fetalai atu, “O lē fa‘atuatua mai ‘iā te a‘u, e lē fa‘atuatua mai o ia ‘iā te a‘u ‘ae ‘iā te ia ‘ua ‘auina mai a‘u. 45O lē va‘ai mai fo‘i ‘iā te a‘u, e va‘ai atu o ia ‘iā te ia#12.45 ia: po o Atua le Tamā. ‘ua ‘auina mai a‘u.#Ioane 14.9 46‘Ua ‘ou sau o le malamalama i le lalolagi, ‘ina ‘ia lē tumau pea i le pouliuli se tasi e fa‘atuatua mai ‘iā te a‘u. 47‘Āfai fo‘i e fa‘alogologo se tasi i a‘u ‘upu, ‘ae lē talitonu i ai, ‘ou te lē fa‘amasino ‘iā te ia; auā ‘ou te le‘i sau e fa‘amasino i le lalolagi, a ‘ia ‘ou fa‘aolaina le lalolagi.#Ioane 3.17; 8.15; Luka 9.56 48O lē fa‘alēaogā ‘iā te a‘u, ma ‘ua lē talia a‘u ‘upu, o ‘iā te ia le tasi na te fa‘amasinoina o ia; o le ‘upu ‘ua ‘ou tautala atu ai, e fa‘amasino lea ‘iā te ia i le aso gata‘aga.#Epe 4.12; Fa‘aa 19.15 49Auā ‘ou te lē tautala fua na o a‘u; a o le Tamā ‘ua ‘auina mai a‘u, na ia tu‘u mai le poloa‘iga ‘iā te a‘u i mea ‘ou te fai atu ai, ma mea ‘ou te tautala atu ai. 50‘Ua ‘ou iloa fo‘i o lana poloa‘iga o le ola fa‘avavau lea. O lenei, o mea ‘ou te tautala atu ai, fa‘apei ‘ona fetalai mai ai le Tamā ‘iā te a‘u, e fa‘apea ‘ona ‘ou tautala atu ai.”#Ioane 8.26, 28
Currently Selected:
Ioane 12: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.