Fa‘amasino 14
14
O le Tala ‘iā Samasoni
1‘Ua alu ifo Samasoni i Timenata, ‘ona iloa ai lea o le fafine i Timenata, o le fafine o Filisitia.#Iosu 15.10; 19.43 2‘Ona alu a‘e lea o ia, ma ta‘u atu ai i lona tamā ma lona tinā, ‘ua fai atu, “‘Ua ‘ou iloa le fafine i Timenata, o le fafine o Filisitia; o lenei, ‘ia ‘oulua ‘aumai o ia e fai ma a‘u avā.”
3‘Ona fai mai lea o lona tamā ma lona tinā ‘iā te ia, “E leai ‘ea se fafine i afafine o o‘u uso ma lo‘u nu‘u uma, ‘ina ‘ua e alu e fai avā i Filisitia e le peritomeina?”
‘Ua fai atu Samasoni i lona tamā “‘Ia ‘aumai lea ma a‘u, auā e lelei lava ia i lo‘u manatu.”#Kene 24.3-4; 28.1-2; 1 Samu 17.26, 36; 2 Samu 1.20
4A ‘ua lē iloa e lona tamā ma lona tinā, ‘ua mai i le ALI‘I lenā mea; e sā‘ili ai e ia se mea e fa‘alani ai se misa ma Filisitia. O ona po ia na mālō ai Filisitia ‘iā Isaraelu.
5‘Ona ō ifo lea o Samasoni, ma lona tamā ma lona tinā i Timenata; ‘ua o‘o atu i tōvine o Timenata, fa‘auta, ‘ua tu mai ‘iā te ia le leona ta‘anoa o tagi mai. 6‘Ona osofia lea o ia e le Agaga o le ALI‘I, ‘ua na saeia le leona, e pei ‘ona saeia se tama‘i ‘oti, ‘ae leai lava se mea i lona lima; ‘ua ia lē ta‘u atu i lona tamā ma lona tinā le mea ‘ua na faia.#Fa‘ama 3.10; 14.19; 15.14; 1 Samu 11.6; 17.34-35; 2 Samu 23.20
7‘Ona alu ifo lea, ma na tautala ma le fafine; ‘ua lelei lava o ia i le manatu o Samasoni. 8‘Ua fo‘i atu o ia ‘ina ‘ua mavae nisi aso ‘ina ‘ia ‘aumaia o ia; ‘ona afe ane lea o ia e matamata i le tino o le leona; fa‘auta, o le vao lagomeli ‘atoa ma le meli i le tino o le leona. 9‘Ua ia tō mai ai i ona lima, ‘ua ‘ai fano, ‘ua o‘o atu i lona tamā ma lona tinā, ‘ona avatu lea e ia ‘iā te i lā‘ua, na la ‘a‘ai ai; ‘ae lē ta‘u atu e ia ‘iā te i lā‘ua, na ia tō mai le meli a‘i le tino o le leona.
10‘Ua alu ifo lona tamā i le fafine, ‘ona fai ai lea e Samasoni i lea mea o le tausama‘aga, auā na fa‘apea le tu i taulele‘a. 11‘Ua latou iloa o ia, ‘ona latou tu‘u atu lea o ana aumea e to‘atolugafulu, latou te i ai ma ia. 12‘Ua fai atu Samasoni ‘iā i latou, “Se‘i ‘ou fai atu ‘iā te ‘outou la‘u tupua, ‘āfai tou te matea mai lona uiga, i aso e fitu o le tausama‘aga, ma ‘outou maua, ‘ona ‘ou avatu lea ‘iā te ‘outou o ‘ie e tolugafulu ma ‘ofu e tolugafulu;#2 Tu 5.5; Eseki 17.2 13‘ae ‘āfai tou te lē mafai ‘ona matea mai lona uiga, ‘ona ‘outou ‘aumai lea ‘iā te a‘u o ‘ie lino e tolugafulu ma ‘ofu e tolugafulu.”
‘Ua latou fai mai ‘iā te ia, “‘Inā fai mai ia lau tupua, matou te fa‘alogologo atu ai.”
14‘Ona fai atu lea o ia ‘iā te i latou,
“Na alu atu le mea e ‘ai nai lē ‘ai mea;
na alu atu fo‘i le mea suamalie nai lē malosi.”
‘Ua latou lē mafai ‘ona matea le tupua i aso e tolu.
15‘Ua o‘o i le aso fitu, ‘ona latou fai ane lea i le avā a Samasoni, “‘Ia e fa‘aoleole i lau tane, ma fa‘aali mai ‘iā i matou le tupua, ne‘i matou susunuina oe ma le ‘āiga o lou tamā i le afi; pe na ‘outou ‘a‘ami ‘ea ‘iā i matou e fa‘amativa ‘iā te i matou? E lē o lea ‘ea?”#Fa‘ama 15.6; 16.5
16‘Ona tagi lea o le avā a Samasoni ‘iā te ia, ‘ua fa‘apea atu, “‘Ua na ‘ona e ‘ino‘ino ‘iā te a‘u, a ‘e te lē alofa mai lava ‘iā te a‘u; ‘ua e fai atu le tupua i tagata o lo‘u nu‘u, a ‘e te le‘i fa‘aali mai ai ‘iā te a‘u.”
‘Ua fai mai o ia ‘iā te ia, “Fa‘auta, ‘ou te le‘i fa‘aali atu i lo‘u tamā ma lo‘u tinā; ‘ou te fa‘aali atu ‘ea ‘iā te oe?” 17‘Ua tagi lava o ia ‘iā te ia i aso e fitu sa fai ai le tausama‘aga; ‘ona o‘o lea i le aso fitu ‘ua ia fa‘aali atu ai ‘iā te ia, auā na fa‘atauānauina o ia e ia, ‘ona fa‘aali atu lea e ia o le tupua i tagata o lona nu‘u.#Fa‘ama 16.16 18‘Ona fai mai lea ‘iā te ia o tagata o le nu‘u i le aso fitu, a o le‘i alu ifo le lā,
“Se a se mea e sili ‘ona suamalie i le meli?
Se a fo‘i se mea e sili ‘ona malosi i le leona?”
‘Ona ia fai atu lea ‘iā i latou,
“‘Ana le se anoa la‘u povi na ‘outou suatia ai le ‘ele‘ele,
po ‘ua ‘outou le matea la‘u tupua.”
19‘Ona osofia lea o ia e le Agaga o le ALI‘I; ‘ona alu ifo lea o ia i Asekelona ma na fasia o latou o tagata e to‘atolu gafulu, ‘ona ‘ave lea e ia o latou ‘ofu, na ia avatu ai ‘ofu i ē na matea mai le tupua; ‘ua matuā ita o ia, ‘ona alu a‘e lea o ia i le fale o lona tamā. 20A ‘ua ‘ave le avā a Samasoni ma lana uō, lē na fai ma uō ‘iā te ia.#Ioane 3.29
Currently Selected:
Fa‘amasino 14: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
